Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

PHAFOGA! AUGUST 2015

Go tšweleditšwe dikgatišo tše dimilione tša pukwana ya Ithute go Bala le go Ngwala ka maleme a fetago a 100 bakeng sa go thuša batho.

Thuto ya Beibele e Thuša Batho go Bala le go Ngwala

Thuto ya Beibele e Thuša Batho go Bala le go Ngwala

“Ke tshwanelo gore motho yo mongwe le yo mongwe a tsebe go bala le go ngwala, seo se thuša motho gore a kgone go ikemela le go phedišana le batho ba bangwe.”—UNESCO. *

DIPEGO di bontšha gore lefaseng ka bophara, batho ba fetago dimilione tše 700 ba nywaga e 15 le ya ka godimo ga moo ga ba kgone go bala goba go ngwala. Ka baka leo, ba palelwa ke go hwetša tsebo e ntši yeo lefase le nago le yona, go akaretša go ithuta ka ditekanyetšo tše dibotse tša boitshwaro le thuto yeo e lego ka Beibeleng yeo e ilego ya “ngwalelwa go re ruta.” (Baroma 15:4) Ka gona, dinageng tše dintši Dihlatse tša Jehofa di kopantše thuto ya go ithuta go bala le go ngwala le lenaneo la tšona la go ruta Beibele, gomme thuto yeo ka moka ke mahala. Na lenaneo leo le ile la atlega?

Ela hloko mošomo wa Dihlatse tša Jehofa kua Mexico, e lego naga yeo go bolelwago Sepanishi kudu. Ga e sa le go tloga ka ngwaga wa 1946, Dihlatse di rutile batho ba fetago ba 152 000 go bala le go ngwala, gomme ka morago bao ba rutilwego le bona ba ile ba fetoga barutiši. Mmušo o ile wa romela Dihlatse mangwalo a mantši, e le ge o leboga mošomo wa tšona. Lengwalo le lengwe le re: “Mokgatlo  wa General Board of Education o lemoga mošomo wa lena o mobotse le go le lebogiša ka baka la go tsenya letsogo tabeng ya go hlabolla Lenaneo la go Ruta Batho ba Bagolo.”

Bana le batho ba bagolo ba hotšwe ke lenaneo le la go ruta go bala le go ngwala. Ka mohlala, Josefina o be a na le nywaga e 101 ge a thoma thuto ye, gomme o ile a e fetša ka katlego ka nywaga e mebedi!

Le ge leleme leo le bolelwago kudu Mexico e le Sepanishi, ga go dirišwe lona feela go ruta batho go bala le go ngwala. Ka ngwaga wa 2013, batho ba maleme a mangwe a seswai a setlogo le bona ba ile ba ithuta go bala le go ngwala ka maleme a gabo bona ba diriša lenaneo le.

Ruri go kgona go bala le go ngwala go go nea sebaka sa go ithuta dilo tše dintši tše difsa. Eupša go feta tšohle, go kgona go bala le go ngwala go thuša batho ba mehuta ka moka gore ba kgone go bala Beibele, e lego puku yeo e buduletšwego ke Modimo yeo e ka ba lokollago bokgobeng bja ditumelakhwele, ditumelong tša maaka tša bodumedi le boitshwarong bjo bo gobatšago.—Johane 8:32.

^ ser. 2 United Nations Educational, Scientific, and Cultural Organization.