Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  August 2015

 PONO YA BEIBELE

Kgotlelelo

Kgotlelelo

Go amogela, go lebalela le go kgotlelela di tiiša ditswalano tša khutšo. Eupša na kgotlelelo e swanetše go ba le mellwane?

Senotlelo sa go kgotlelela ke sefe?

SEO SE DIREGAGO LEHONO

Lefaseng ka moka, go foka moya wa go hloka kgotlelelo, gomme o gakatšwa ke dilo tša go swana le kgethollo ya semorafo le ya setlogo, botšhaba, kgethollo ka meloko le go fišegela thoko ga bodumedi.

SEO BEIBELE E SE BOLELAGO

Nakong ya bodiredi bja gagwe, Jesu Kriste o be a dikologilwe ke batho ba go hloka kgotlelelo. Bajuda le Basamaria ka go kgethega ba be ba hloyane. (Johane 4:9) Basadi ba be ba swarwa bjalo ka batho ba tlasana go banna. Baetapele ba bodumedi ba Bajuda ba be ba kwera batho ba tlwaelegilego. (Johane 7:49) Jesu Kriste o ile a dula e le yo a fapanego kudu. Baganetši ba gagwe ba boletše gore: “Motho yo o amogela badiradibe e bile o ja le bona.” (Luka 15:2) Jesu o be a na le botho, a sa fele pelo e bile a na le kgotlelelo, ka gobane o be a se a tlela go ahlola batho eupša go ba ruta ka Modimo. O be a tutuetšwa kudu ke lerato.—Johane 3:17; 13:34.

Jesu e lego mohlala wa kgotlelelo, o be a se a tlela go ahlola batho eupša go ba ruta ka Modimo

Lerato, e lego senotlelo se segolo sa go kgotlelela, le re dira gore re bulele ba bangwe dipelo tša rena go sa šetšwe go se phethagale ga bona le dimelo tša bona. Bakolose 3:13 e re: “Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe.”

“Godimo ga tšohle, ratanang ka lerato le le tseneletšego, gobane lerato le bipa dibe tše dintši.”1 Petro 4:8.

 Ke ka baka la’ng kgotlelelo e swanetše go ba le mellwane?

SEO SE DIREGAGO

Ditšhaba tše dintši di leka go kgomarela melao le ditaelo. Ka lebaka la seo, gantši di bea mellwane e lekalekanego tabeng ya boitshwaro.

SEO BEIBELE E SE BOLELAGO

“[Lerato] ga le dire tša go leša dihlong.” (1 Bakorinthe 13:5) Le ge Jesu e be e le mohlala wa kgotlelelo, o be a sa kgotlelele boitshwaro bjo bo bobe, boikaketši le mehuta le ge e le efe ya bobe. Go e na le moo, ka sebete o be a kgalemela mekgwa yeo. (Mateo 23:13) O itše: “Yo a tlwaetšego go dira dilo tše mpe o hloile seetša [sa therešo].”—Johane 3:20.

Moapostola wa Mokriste Paulo o ngwadile gore: “Hlaswang se kgopo, le kgomarele go se sebotse.” (Baroma 12:9) O be a phelela mantšu ao. Ka mohlala, ge Bakriste ba bangwe ba ba Bajuda ba ikgetholla go bao e bego e se badumedi ba Bajuda, Paulo, yo le yena e bego e le Mojuda, o ile a bolela ka go tia eupša a le botho. (Bagalatia 2:11-14) O be a tseba gore Modimo, yo a sa ‘bebego sefahlego’ o be a ka se kgotlelele kgethollo ya semorafo magareng ga batho ba Gagwe.—Ditiro 10:34.

Bjalo ka Bakriste, Dihlatse tša Jehofa di tsoma tlhahlo ya boitshwaro ka Beibeleng. (Jesaya 33:22) Ka baka leo, ga di kgotlelele bobe magareng ga tšona. Phuthego ya Bokriste yeo e hlwekilego ga se ya swanela go šilafatšwa ke batho bao ba sa latelego melao ya Modimo. Ka go re’alo, Dihlatse di kwa taelo e kwagalago ya Beibele e rego: “Tlošang yo kgopo gare ga lena.”—1 Bakorinthe 5:11-13.

“Lena bao ba ratago Jehofa, hloyang se sebe.”Psalme 97:10.

Na Modimo o tla kgotlelela bobe ka mo go sa felego?

SEO BA BANTŠI BA SE DUMELAGO

Ka baka la tlhago ya batho, bobe bo tla tšwela pele bo le gona.

SEO BEIBELE E SE BOLELAGO

Moporofeta Habakuku o rapetše Jehofa Modimo ka gore: “Ke ka baka la’ng . . . o dula o lebeletše bokgopo? Ke ka baka la’ng ke lebane le bohlakodi le bošoro? Ke ka baka la’ng go ngangišanwa le gona ke ka baka la’ng go dirwa bošoro?” (Habakuku 1:3) E le gore moporofeta wa gagwe a se ke a belaela, Modimo o ile a mo kgonthišetša gore O tlo sekiša ba babe. Ge e le mabapi le kholofetšo yeo Modimo o itše: “Etla phethega e le ka kgonthe. E ka se diege.”—Habakuku 2:3.

Ge re sa letetše seo, ba babe ba na le sebaka sa go tlogela tsela ya bona e mpe. “‘Na ruri ke kgahlwa ke lehu la yo kgopo goba ke kgahlwa ke gore a furalele ditsela tša gagwe gomme a dule a phela?’ O re’alo Mmuši Morena Jehofa.” (Hesekiele 18:23) Bao ba tsomago Jehofa ka go tlogela ditsela tša bona tše mpe ba ka letela bokamoso ka kgodišego. Diema 1:33 e re: “Yo a ntheetšago, o tla dula a bolokegile a sa tšhoge go welwa ke masetlapelo.”

“Go se gokae yo kgopo o tla be a se sa le gona . . . Eupša ba boleta bona e tla ba beng ba lefase, ba tla thaba kudu ka baka la go ata ga khutšo.” Psalme 37:10, 11.

Ithute ka mo go Oketšegilego

MOROKAMI

Modimo ke Motho wa Mohuta Mang?

Ke eng seo o se tsebago ka Modimo? Re ka mo tseba bjang gakaone?

MOROKAMI

Seo Modimo a Tlago go se Dira ka Bobe

Na kgopolo ya go phela lefaseng leo dilo tše mpe di ka se sa hlwago di diragalela batho ba go loka e a go kgahla?