Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JULY 2015

 PONO YA BEIBELE

Mošomo

Mošomo

Le ge Beibele e le puku ya kgale, melao ya yona ya motheo ga e fetwe ke nako. Seo e se bolelago ka mošomo lehono se bohlokwa go etša le nakong ya ge Beibele e be e ngwalwa.

Pono e botse ka mošomo ke efe?

SEO BATHO BA BANGWE BA SE BOLELAGO

E le gore o se ke wa lahlegelwa ke mošomo, o swanetše go o etiša pele ga dilo ka moka. Kgopolo yeo e dirile gore ba bangwe ba swarege ka mešomo ya bona gomme ba hlokomologe malapa a bona gaešita le maemo a bona a tša maphelo.

SEO BEIBELE E SE BOLELAGO

Beibele e kgothaletša go ba le pono e lekalekanego ka mošomo. E reta go šoma ka thata gomme ya sola go tšwafa. (Diema 6:6-11; 13:4) Ka mo go swanago, Beibele ga e re kgothaletše go fetša nako le matla a rena ka moka re šoma. Go e na le moo, e re kgothaletša go ba le nako e itšego ya go iketla. Mmoledi 4:6 e re: “Seatla se se tletšego khutšo se phala diatla tše pedi tše di tletšego boitapišo gotee le go kitimiša phefo.” Ka gona ga se ra swanela go swarega kudu ka mešomo ya rena gomme ra hlokomologa malapa a rena goba maemo a rena a tša maphelo. Go šoma ka mo go feteletšego ga go na mohola le gatee!

“Ga go se se phalago gore motho a je le go nwa gomme a thabiše moya wa gagwe ka tše botse ka baka la boitapišo bja gagwe.”Mmoledi 2:24.

 Na go na le taba gore mošomo wa gago ke wa mohuta mang?

SEO BATHO BA BANGWE BA SE BOLELAGO

 Ge e ba mošomo o lefa tšhelete e ntši, gona o lokile. Kgopolo ye, ge e kopane le molaba wa go rata go hwetša tšhelete e ntši gabonolo, e dirile gore batho ba bangwe ba tsenele dikgwebo tše di sa botegego gaešita le go amogela mešomo yeo e sego molaong.

Ba e na le kgopolo ya gore ‘o swanetše go latela ditoro tša gago’ le ya ‘dira seo o se ratago,’ ba bangwe ba amogela feela mošomo woo o ba kgahlago. Ge e ba mošomo e se wa “ditoro” tša bona, ba tšea gore o a tšwafiša. Se se feleletša ka gore ba be le pono e fošagetšego ka mošomo wa bona gomme ba se o dire ka mafolofolo. Ba ka ba ba gana le mešomo e mebotse ka ge ba nagana gore ga e ba swanele.

SEO BEIBELE E SE BOLELAGO

Beibele ga e dumelele mošomo wa go se botege goba wo o kwešago batho bohloko ka tsela le ge e le efe. (Lefitiko 19:11, 13; Baroma 13:10) Mošomo o mobotse o hola batho ba bangwe gomme o dira gore mošomi ‘a be le letswalo le lebotse.’—1 Petro 3:16.

Beibele gape e ruta gore mošomo o phetha morero o bohlokwa, e lego go kgotsofatša mošomi le go mo nea sa go iphediša le go hlokomela lapa la gagwe. Le ge o swanetše go thabela mošomo wa gago, ga se wa swanela go o etiša pele bophelong bja gago.

“Tate o dula a swaregile. Ka ntle ga mošomo wa gagwe, o na le maikarabelo ka phuthegong yeo re lego go yona ya Dihlatse tša Jehofa. Lega go le bjalo, tate o phetha mošomo wa gagwe ka bokgwari. O dira seo a swanetšego go se dira, gomme a ipha nako ya go ba le rena bjalo ka lapa. Tate o dula a swaregile, eupša o bea dilo tšohle maemong a tšona.” —Alannah.

Ke therešo gore go hlatloga ga ditheko go ka dira gore re belaele ka gore re tla lefelela bjang ditshenyagalelo, eupša Beibele e gatelela go ba le tekatekano. E re: “Ge re na le dijo le diaparo re tla kgotsofala ka tšona.” (1 Timotheo 6:8) Mantšu ao ga a bolele gore re swanetše go itima dilo tše itšego. Eupša re swanetše go ba le tekatekano mabapi le dilo tšeo re ka kgonago go di fihlelela.—Luka 12:15.

SEO E SE BOLELAGO GO WENA

Phetha mošomo wa gago ka mafolofolo. Bontšha gore o tloga o o kgahlegela. Leka go dira mošomo wa gago ka bokgwari le ge e se wa ditoro tša gago goba o lebelelwa e le wa tlasana. Mošomo wo o phethilwego ka mafolofolo o dira gore o ikwe o thabile, gomme go kaonefatša bokgoni bja gago go ka oketša go kgotsofala ga gago ka mošomo.

Ka mo go swanago, eba le tekatekano. Iphe nako ya go khutša le go iketla. Dinako tše bjalo di thabiša kudu ka morago ga gore re šome ka thata. Le gona, go hwetša dinyakwa tša rena go dira gore re kgotsofale gaešita le go hwetša tlhompho ya ba bangwe—go akaretša le ya ba malapa a rena.—2 Bathesalonika 3:12.

“Le ka mohla le se ke la belaela la re: ‘Re tla ja’ng, ra nwa’ng goba ra apara’ng?’ . . . Tatago lena wa legodimong o a tseba gore dilo tše ka moka le a di nyaka.”Mateo 6:31, 32.

Ithute ka mo go oketšegilego

Ditekanyetšo tšeo ka Mehla di Šomago go Batho Bohle—Potego

Raquel nkabe a dirile tšhelete ka go amogela letsogo-le-kobong, eupša o lemoga gore o hweditše selo se bohlokwa le go feta ka go se dire bjalo.

Kamoo o ka Hwetšago Katlego ya Kgonthe

Megato e mehlano e šomago e ka go thuša go hwetša katlego ya kgonthe.