Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JULY 2015

 TABA YA LETLAKALALA LA KA NTLE | NA O LAOLA BOPHELO BJA GAGO?

Tlhohlo: Maikwelo a Fošagetšego

Tlhohlo: Maikwelo a Fošagetšego

NA O imelwa ke maikwelo a go nyama, go galefa goba go boloka sekgopi? Ge e ba go le bjalo, o ka thatafalelwa ke go dira dilo tšeo di lego bohlokwa kudu go wena. Ke’ng seo o ka se dirago ka boemo bjoo? *

MOHLALA WA KA BEIBELENG: DAFIDA

Kgoši Dafida o ile a ba le maikwelo a fapafapanego—go akaretša dipelaelo le manyami. O thušitšwe ke’ng go lebeletšana le maemo? Dafida o ile a tlogelela dilo matsogong a Modimo. (1 Samuele 24:12, 15) O ile a ba a ngwala ka maikwelo a gagwe. Ka ge e be e le monna yo a na go le tumelo, o ile a rapela a sa kgaotše. *

SEO GREGORY A SE DIRAGO

Bjalo ka ge go boletšwe sehlogong sa mathomo, Gregory o tshwenywa ke bolwetši bjo bo sepedišanago le monagano bjo bo bakwago ke tlalelo goba dipelaelo (anxiety disorder). O re: “Ke be ke sa kgone go laola dipelaelo tša ka.” Gregory o ile a thušwa ke’ng gore a kgone go laola bophelo bja gagwe gape? O re: “E le gore ke leke go bušetša dilo sekeng, ke ile ka amogela thušo ya mosadi wa ka le ya bagwera. Ke ile ka ba ka ya ngakeng gomme ka hwetša tsebišo e oketšegilego ka boemo bja ka. Ka morago ga go dira diphetogo tseleng yeo ke bego ke phela ka yona, ke ile ka kgona go ikwa ke laola boemo bja ka, e sego gore bo be bo ntaola. Le ge ke sa fela ke lebeletšana le dipelaelo, ga bjale ke lemogile gore di bakwa ke eng, le gore nka dira eng gore ke ikwe ke le kaone.”

“Pelo e thabilego e etša sehlare se se fodišago.”Diema 17:22

SEO O KA SE DIRAGO

Ge e ba maikwelo a fošagetšego a laola bophelo bja gago, leka dilo tše di latelago:

  • Ngwala kamoo o ikwago ka gona.

  • Botša yo mongwe wa leloko la kgauswi goba mogwera kamoo o ikwago ka gona.

  • O se ke wa dumelela maikwelo ao a fošagetšego a go laola. Ka mohlala, ipotšiše gore: ‘Na ke na le lebaka le le kwagalago la go ba le pono e fošagetšego ka nna?’

  • O se ke wa dula o belaela, o galefile goba o bolokile sekgopi. Go e na le moo, diriša matla a gago dilong tša bohlokwa. *

Therešo e sa Fetogego: Gantši, maikwelo a fošagetšego ga a bakwe ke maemo a rena eupša a bakwa ke kamoo re arabelago ka gona.

^ ser. 3 Maikwelo a mangwe a fošagetšego a ka bakwa ke bothata bjo itšego bja tša maphelo bjoo bo ka nyakago gore o hwetše kalafo ya ditsebi. Phafoga! ga e bolelele mokgwa o itšego wa kalafo. Motho yo mongwe le yo mongwe o swanetše go hlahloba dikgetho tša gagwe tša kalafo ka kelohloko pele a dira phetho.

^ ser. 5 Bontši bja dipsalme tša ka Beibeleng ke dithapelo tša Dafida tšeo a ilego a di ngwala.

^ ser. 13 Bakeng sa tsebišo e oketšegilego, bona lelokelelo la dihlogo tše di thomago letlakaleng la ka ntle leo le rego: “Kamoo o ka Lebeletšanago le Dipelaelo,” ka tokollong ya Morokami wa July 1, 2015.

Ithute ka mo go oketšegilego

“Temogo ya Motho e Fokotša Bogale bja Gagwe”

Tiragalo e itšego bophelong bja Dafida, kgoši ya Isiraele, e ka go thuša go laola maikwelo a gago ge o kgopišitšwe goba o galefišitšwe.

Dilo Tšeo di Tlišago Lethabo Bophelong

Na ruri bohlale bja Beibele bo ka go thuša gore o thabe bophelong? Sehlogo se se ahlaahla melao ya motheo e mene ya Beibele yeo ruri e šomago.

Na Beibele e ka Nthuša ge ke Gateletšegile?

Go na le dilo tše tharo tšeo Modimo a di neago ka boati go thuša batho go lebeletšana le maikwelo a go gateletšega.

Na Modimo o tla Nthuša ge ke Rapela?

Na ruri Modimo o tshwenyegile ka mathata a rena?