Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JULY 2015

 TABA YA LETLAKALALA LA KA NTLE

Na o Laola Bophelo bja Gago?

Na o Laola Bophelo bja Gago?

GE O be o sa le ngwana, o be o na le dipakane dife? Mohlomongwe o be o nyaka go tsena lenyalong, o be le bokgoni bjo itšego goba o šome mošomo woo o o ratago. Eupša bophelo ga bo ke bo eba ka tsela yeo re nyakago. Maemo ao a sa letelwago a ka fetoša bophelo bja gago. Se ke seo se ilego sa diragalela Anja, Delina le Gregory.

  • Ge Anja, wa kua Jeremane a be a na le nywaga e 21 go ile gwa hwetšwa gore o na le bolwetši bja kankere gomme ga bjale ga a sa kgona go ya felo.

  • Delina, wa kua United States, o na le bolwetši bja go kgaotša go šoma ga megalatšhika bjo bo bitšwago dystonia. Go oketša moo, o hlokomela bana babo ba bararo bao ba golofetšego.

  • Gregory wa kua Canada o phela ka bolwetši bjo bo sepedišanago le monagano bjo bo bakwago ke tlalelo goba dipelaelo bjo bo bitšwago crippling anxiety.

Go sa šetšwe maemo a bona, Anja, Delina le Gregory ba kgonne go laola maphelo a bona. Bjang?

Seema sa Beibele se re: “Na o ipontšhitše o nyamile letšatšing la tlalelo? Gona matla a gago a tla hlaela.” (Diema 24:10) Seo se hlaloswago mo se a kwagala: Tsela yeo o naganago ka yona e bohlokwa kudu. Ge e ba o gateletšwa kudu ke boemo bja gago o ka se kgone go dira diphetho tšeo di ka go thušago. Mola ge e ba o ka ba le boemo bjo bo botse bja kgopolo, go tla ba bonolo go dira diphetho tšeo di swanetšego gomme wa hwetša lethabo go sa šetšwe boemo.

Ela hloko kamoo seo se ilego sa itlhatsela e le sa kgonthe go Anja, Delina le Gregory.