Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

PHAFOGA! JUNE 2015

 THUŠO BAKENG SA LAPA | LENYALO

Kamoo o ka Tiišago Tlemo ya Lenyalo

Kamoo o ka Tiišago Tlemo ya Lenyalo

TLHOHLO

Letšatšing la lenyalo la gago, o ile wa dira keno. Kholofetšo yeo e tiilego e be e le keno ya bophelo ka moka, e lego phetho e tiilego ya go kgomarela molekane wa gago le go rarolla mathata ao a ka tšwelelago.

Eupša ge nywaga e dutše e eya, dingangišano di ile tša senya lenyalo la gago. Na tlemo ya gago ya lenyalo e sa tiile?

SEO O SWANETŠEGO GO SE TSEBA

Boitlamo bo swana le tshetledi yeo e ka matlafatšago lenyalo la gago

Boitlamo ke tharollo e sego bothata. Batho ba bantši lehono ba tšhaba go itlama. Ba bangwe ba ka bapetša boitlamo le morwalo woo o gogelago motho diphethong tše mpe. Go e na le moo, tšea go itlama go le bjalo ka tshetledi yeo e ka matlafatšago lenyalo la gago. Mosadi yo a bitšwago Megan o re: “Selo seo se kgahlišago ka go itlama ke go tseba gore ge wena le molekane wa gago le na le diphapano, ga go yo a naganago ka go tlogela yo mongwe.” * Go ba le kgodišego ya gore lenyalo la gago le šireletšegile, gaešita le ge le na le mathata a itšego, seo ka bosona ke motheo wa go rarolla mathata a gago.—Bona lepokisi le le rego: “ Go Itlama le go Botegelana.”

Sa bohlokwa ke gore: Ge e ba o na le mathata lenyalong la gago, ga bjale ke nako ya go tiiša tlemo ya gago, e sego go e belaela. O ka dira bjang seo?

 SEO O KA SE DIRAGO

Hlahloba dipono tša gago. “Lenyalo ke tlemo ya bophelo ka moka.” Na polelwana ye e dira gore o ikwe o kgakgetšwe goba o šireletšegile? Ge mathata a tšwelela, na ka mehla o nagana ka go sepela? E le gore o tiiše keno ya gago ya lenyalo, go bohlokwa gore o lebelele lenyalo e le tlemo ya bophelo ka moka.—Molao wa motheo wa Beibele: Mateo 19:6.

Hlahloba tsela yeo o gotšego ka yona. Pono ya gago ka go itlama e ka ba e tutueditšwe ke tsela yeo batswadi ba gago ba bego ba phela ka yona. Mosadi yo a bitšwago Lea o re: “Batswadi ba ka ba ile ba hlalana ge ke be ke sa gola, gomme ke tshwenywa ke gore phihlelo ya bona e ka ba e ile ya ntlogela ke na le pono e fošagetšego ka go itlama.” Kgodišega gore o ka dira dilo ka tsela e fapanego lenyalong la gago. Ga se wa abela diphošo tša batswadi ba gago!—Molao wa motheo wa Beibele: Bagalatia 6:4, 5.

Hlahloba tsela yeo o bolelago ka yona. Ge wena le molekane wa gago le ngangišana, phema go bolela dilo tšeo o tla itsholelago tšona ka morago, tše bjalo ka “ke a go tlogela” goba “ke tla hwetša motho yo a tlago go nkwešiša!” Dipolelo tše bjalo di fokodiša boitlamo bja lena gomme go e na le gore di rarolle bothata bjoo le nago le bjona, di le tlogela le elwa ka mantšu. Go e na le go bolela mantšu ao a hlabago, mohlomongwe o ka re: “Go molaleng gore bobedi bja rena re galefile. Re ka dirišana bjang go rarolla bothata bjo?”—Molao wa motheo wa Beibele: Diema 12:18.

Bontšha gore o itlamile. Bea senepe sa molekane wa gago tafoleng ya gago ya mošomong. Bolela gabotse ka lenyalo la gago. Ipeele pakane ya go founela molekane wa gago letšatši le letšatši ge o se gona. Ge o bolela, itlwaetše go diriša mantšu a bjalo ka “rena,” gomme o diriše dipolelwana tše bjalo ka “nna le mosadi wa ka” goba “nna le monna wa ka.” Ka go dira bjalo o tla be o bontšha gore o itlamile go molekane wa gago.

Ithute mehlaleng e mebotse. Ithute go banyalani bao ba nago le maitemogelo bao ba kgonnego go rarolla mathata a lenyalo ka katlego. Ba botšiše gore: “Boitlamo bo bolela’ng go lena, gomme seo se le thušitše bjang lenyalong la lena?” Beibele e re: “Tšhipi e loutšwa ke tšhipi e nngwe. Ka go re’alo le sefahlego sa motho se loutšwa ke sa yo mongwe.” (Diema 27:17) O naganne ka molao woo wa motheo, o ka holwa ke dikeletšo tša bao ba dirilego gore lenyalo la bona le atlege.

^ ser. 7 Beibele e dumelela motho yo a lego lenyalong go hlala ge feela molekane yo mongwe a dirile bohlotlolo. Bona sehlogo sa “Pono ya Beibele—Bohlotlolo” tokollong ye ya Phafoga!

Ithute ka mo go oketšegilego

LAPA LA GAGO LE KA THABA

Botegelanang

Na go bohlokwa kudu gore o botege lenyalong go e na le go fo phema bohlotlolo?

MOROKAMI

Go Kgomarela Tlemo Lenyalong la Lena

Lenyalo le tiišwa ke’ng? Le fokodišwa ke’ng? O ka matlafatša bjang tlemo ya gago?

DIPOTŠIŠO TŠA BEIBELE DI A ARABJA

Na Beibele e ka Nthuša go ba le Lapa Leo le Thabilego?

Keletšo e bohlale yeo e tšwago ka Beibeleng e šetše e thušitše banna le basadi ba dimilione go ba le lethabo ka gae.

DITABA TŠE DIBOTSE TŠE DI TŠWAGO GO MODIMO!

Melao ya Motheo ya Beibele e re Hola Bjang?

Jesu o hlalositše lebaka leo re hlokago tlhahlo le melao ya motheo e mebedi ya Beibele yeo e lego bohlokwahlokwa.