Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JUNE 2015

 PONO YA BEIBELE

Bohlotlolo

Bohlotlolo

Go sa šetšwe kamoo batho ba tšeelago godimo taba ya go botega lenyalong, bohlotlolo e sa dutše e le tlhobaboroko malapeng a mantši.

Bohlotlolo ke eng?

SEO BATHO BA SE BOLELAGO

Ditšo tše dingwe di lebelela thobalano ka ntle ga lenyalo e se phošo, kudukudu ka lehlakoreng la banna. Le gona tše dingwe ga di lebelele lenyalo e le tlemo ya sa ruri.

SEO BEIBELE E SE BOLELAGO

Ka Beibeleng, gantši bohlotlolo bo bolela thobalano yeo e dirwago ka boithatelo ke monna goba mosadi yo a lego lenyalong le motho yo e sego molekane wa gagwe. (Jobo 24:15; Diema 30:20) Bohlotlolo ke selo se se šišimišago pele ga Modimo. Kotlo ya bootswa Isiraeleng ya bogologolo e be e le lehu. (Lefitiko 18:20, 22, 29) Jesu o rutile gore, balatedi ba gagwe ba swanetše go phema bohlotlolo.—Mateo 5:27, 28; Luka 18:18-20.

LEBAKA LEO KA LONA GO TSEBA SEO GO LEGO BOHLOKWA

Batho bao ba hlotlolago ba roba keno yeo ba e dirilego go balekane ba bona ge ba be ba nyalana. Le gona bohlotlolo ke go “direla Modimo sebe.” (Genesi 39:7-9) Bohlotlolo bo ka aroganya bana le batswadi ba bona ka tsela e sehlogo. Go feta moo, Beibele e lemoša ka gore: “Modimo o tla ahlola . . . dihlotlolo.”—Baheberu 13:4.

“Lenyalo a le hlomphege go bohle gomme malao a lenyalo a se be le ditšhila.”Baheberu 13:4.

 Na bohlotlolo bo fediša tlemo ya lenyalo?

SEO BEIBELE E SE BOLELAGO

Beibele e dumelela motho yo a lego lenyalong go fediša tlemo ya gagwe ya lenyalo ge feela molekane wa gagwe a dirile bohlotlolo. (Mateo 19:9) Se se ra gore ka morago ga go se botege ga molekane yo mongwe, molekane yo a se nago molato o na le tshwanelo ya go kgetha go dula le molekane wa go se botege goba go hlala. Ye ke kgetho ya motho ka noši.—Bagalatia 6:5.

Ka lehlakoreng le lengwe, Modimo o lebelela lenyalo e le tlemo ya bophelo ka moka. (1 Bakorinthe 7:39) Modimo o hloile ge motho a nyaka go hlala ka mabaka ao a sa kwagalego, a bjalo ka go se sa thabela molekane wa gagwe. Ka gona, tlhalo ga se phetho yeo e swanetšego go tšewa gabohwefo.—Maleaki 2:16; Mateo 19:3-6.

“Ke le botša gore yo mongwe le yo mongwe yo a hlalago mosadi wa gagwe ge e se ka lebaka la bootswa, o mmea boemong bja go hlotlola.”Mateo 5:32.

Na bohlotlolo ke sebe seo se sa lebalelwego?

SEO BEIBELE E SE BOLELAGO

Aowa. Beibele e re Modimo o gaugela bao ba itsholago ke moka ba tlogela dibe tša bona—go akaretša le bohlotlolo. (Ditiro 3:19; Bagalatia 5:19-21) Ge e le gabotse, Beibele e bolela ka banna le basadi bao ba kgaoditšego bohlotlolo gomme ka morago ya ba bagwera ba Modimo.—1 Bakorinthe 6:9-11.

Kgaugelo ya Modimo e ile ya bonagala ge a be a dirišana le Kgoši Dafida wa bogologolo. Dafida o ile a dira bootswa le mosadi wa yo mongwe wa ditona tša gagwe tša madira. (2 Samuele 11:2-4) Beibele e bolela ka go lebanya gore seo “Dafida a se dirilego e be e le se sebe mahlong” a Modimo. (2 Samuele 11:27) Ka morago ga gore a kgalemelwe, Dafida o ile a itshola gomme Modimo o ile a mo lebalela. Lega go le bjalo, Dafida o ile a buna ditlamorago tše di nyamišago tša ditiro tša gagwe. (2 Samuele 12:13, 14) Ka morago Kgoši e bohlale e lego Solomone e ile ya bolela gore, “mang le mang yo a hlotlolago . . . o na le pelo ya bošilo.”—Diema 6:32.

SEO O KA SE DIRAGO

Ge e ba o dirile bohlotlolo, o swanetše go kgopela tebalelo go Modimo le go molekane wa gago. (Psalme 51:1-5) Ithute go hloya bohlotlolo go e tša ge Modimo a bo hloile. (Psalme 97:10) Ikemišetše go phema diswantšho tša batho bao ba sa aparago, dikakanyo tše di sa hlwekago tša thobalano, go bapala ka lerato goba selo le ge e le sefe seo se ka dirago gore o kganyoge go robala le motho yo e sego molekane wa gago.—Mateo 5:27, 28; Jakobo 1:14, 15.

Ge e ba molekane wa gago a kile a hlotlola, kgodišega gore Modimo o kwešiša maikwelo a gago. (Maleaki 2:13, 14) Mo kgopele gore a go homotše le go go hlahla, gomme “yena o tla go thekga.” (Psalme 55:22) Ge e ba o kgetha go lebalela molekane wa gago le go tšwela pele ka lenyalo, bobedi bja lena le tla swanelwa ke go šoma ka thata go tsošološa tlemo ya lena ya lenyalo.—Baefeso 4:32.

Moporofeta Nathane o ile a botša Dafida yo a itshotšego gore: “Jehofa o tla go lebalela sebe sa gago.”2 Samuele 12:13.

Ithute ka mo go oketšegilego

Botegelanang

Na go bohlokwa kudu gore o botege lenyalong go e na le go fo phema bohlotlolo?

Go Tsošološa go Botana Lenyalong

Ge e ba o katanela go phološa lapa la gago ka morago ga bothata bjo bogolo bjo bjalo ka bohlotlolo, o lebane le tlhohlo e kgolo. Eupša o ka atlega!

Lapa la Gago e ka ba Leo le Thabilego Bjang?

Jehofa, Modimo yo a thabilego, o nyaka gore lapa le thabe. Hwetša keletšo e šomago e tšwago ka Beibeleng bakeng sa banna, basadi, batswadi le bana.