Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! MAY 2015

 THUŠO BAKENG SA LAPA | GO GODIŠA NGWANA

Go Ruta Bana go Theetša

Go Ruta Bana go Theetša

TLHOHLO

Wena le ngwana wa gago wa nywaga e mene le dula le elwa, gomme go bonagala ngwana wa gago a dula a fenya.

  • Ge o mmotša gore a dire selo seo a sa nyakego go se dira, ga a go theetše.

  • Ge o mmotša gore a se ke a dira selo seo a nyakago go se dira, o dira matepe.

O ipotšiša gore, ‘Na se se bakwa ke gore e sa le ngwana? Goba na ke swanetše go fo holofela gore o tla gola gomme a lahla?’

O ka ruta ngwana wa gago go theetša. Eupša pele re ahlaahla kamoo o ka dirago seo, ela hloko lebaka le tee leo le ka bago le dira gore a itshware ka tsela yeo.

LEBAKA LA GO DIREGA GA SEO

Ge ngwana wa gago a sa tšwa go belegwa, maikemišetšo a gago a magolo e be e le go mo hlokomela. O be o arabela ka dinako tšohle ge ngwana wa gago a go nyaka. Sa gagwe e be e le go lla, gomme wena o tšwelela o kitima, o tshwenyegile ka go mo nea tšohle tšeo a di nyakago. Ke therešo gore, go dira bjalo go be go swanetše e bile go le bohlokwa. Ngwana yo a sa tšwago go belegwa o hloka tlhokomelo ya batswadi ka dinako tšohle.

Lega go le bjalo, ka morago ga go mo swara ka tsela yeo ka dikgwedi tše dintši, ke ga tlhago gore ngwana a dire dilo bjalo ka ge eka ke mong wa lapa gomme batswadi ke bahlanka ba gagwe bao ba dirago seo a se nyakago. Ke moka, gantši ka morago ga nywaga e mebedi, ngwana o thoma go bona gore dilo di fetogile: “Taolo” e nyenyane yeo a bego a na le yona e fedile. Batswadi ba gagwe ga ba sa latela ditaelo tša gagwe; ba letetše gore yena a latele tša bona. Seo se ka ferekanya bana! Sa dira gore ba bangwe ba thome go ba le matepe. Ba bangwe ba leka matla a taolo a batswadi ba bona ka go se ba theetše.

Nakong yeo e thata, motswadi o swanetše go phetha boika- rabelo bjo bofsa, e lego bja go bontšha matla a taolo le go nea ditaelo tšeo di kwagalago tša go bontšha gore ke eng seo se letetšwego go ngwana. Eupša go thwe’ng ge e ba ngwana a hlokomologa goba a sa theetše ditaelo bjalo ka ge go bontšhitšwe mathomong a sehlogo se?

 SEO O KA SE DIRAGO

Etelela pele. Ngwana wa gago a ka se amogele karolo ya gago ya go ba moetapele go fihlela a bona o etelela pele. Ka gona, o swanetše go diriša matla a gago a taolo ka tsela e lekalekanego. Nywagasomeng e sa tšwago go feta, bao go thwego ke ditsebi ba dirile gore mantšu “matla a taolo” a kwagale a le sehlogo. Yo mongwe e bile o bitša matla a batswadi a taolo gore ke “selo se sebe” le “seo se gobogilego.” Eupša kgopolo ya go dumelela dilo, e ka gakantšha bana, ya ba senya le go dira gore ba itaole. Ga e ba thuše gore e be batho ba bagolo bao ba nago le maikarabelo.—Molao wa motheo wa Beibele: Diema 29:15.

Diriša tayo. Pukuntšu e nngwe e hlalosa tayo bjalo ka “tlwaetšo yeo e dirago gore motho a kwe goba a be le boitshwaro, gantši e dirwa ka tsela ya melao le dikotlo ge e ba e sa latelwe.” Ka gona, tayo ga se ya swanela go ba yeo e sa kwagalego goba yeo e tlaišago. Ka lehlakoreng le lengwe, ga ya swanela go ba yeo e sa kwešišegego goba yeo e sego bohlokwa, yeo e dirago gore ngwana a se ke a tutueletšega go fetoga.—Molao wa motheo wa Beibele: Diema 23:13.

Kwagala. Batswadi ba bangwe ba fo kgopela gore bana ba bona ba ba theetše. (“Ke kgopela o hlwekiše phapoši ya gago—A KERE?”) Mohlomongwe ba ipotša gore seo ke go bontšha mekgwa e mebotse. Lega go le bjalo, mokgwa woo o ka dira gore go bonagale eka motswadi ga se yena a laolago gomme seo sa tlogela ngwana a na le tokologo ya go kgetha ge e ba a tla theetša goba go se theetše kgopelo yeo. Go e na le go se diriše matla a gago a taolo, nea tlhahlo e kwagalago ka tsela ya taelo.—Molao wa motheo wa Beibele: 1 Bakorinthe 14:9.

O se ke wa fetofetoga. Ge e ba o re aowa, kgomarela seo, gomme o kgonthišetše gore wena le molekane wa gago le a dumelelana. Ge e ba le dumelelane gore le tla otla ngwana ka baka la go se kwe, dirang bjalo. Le se ke la dulela go ngangišana mabapi le lebaka leo ka lona le dirilego phetho yeo. Go tla ba bonolo go ngwana wa gago—le go wena—ge e ba ‘Ee ya gago e e ba Ee, gomme Aowa ya gago e e ba Aowa.’—Jakobo 5:12.

Eba le lerato. Ka lapeng bana ga se ba swanela go ipuša goba go gatelelwa. Go e na le moo, ke thulaganyo ya Modimo gore bana ba hlahlwe ka lerato gore e be batho ba bagolo bao ba nago le boikarabelo. Ka ge e le karolo ya thulaganyo yeo, tayo e tla ruta ngwana wa gago go theetša gomme ya mo thuša gore a ikwe a šireletšegile e bile a ratwa.

Ithute ka mo go oketšegilego

Go Godiša Bana ba Botho Lefaseng le Nago le Moya wa Nna Pele

Ela hloko dikarolo tše tharo tšeo go tšona o ka thušago bana ba gago go phema go ba le moya wa nna pele.

Ruta Bana ba Gago

Lena batswadi, dirišang ditaba tše go ruta bana ba lena dithuto tše bohlokwa tša ka Beibeleng.