Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  May 2015

 PONO YA BEIBELE

Bošoro

Bošoro

Histori ya batho e tletše ka bošoro. Na pego ye yeo e nyamišago e tla tšwela pele go ya go ile?

Modimo o lebelela bjang bošoro?

SEO BATHO BA SE BOLELAGO

Batho ba bantši go akaretša le bao e lego badumedi, ba lokafatša bošoro e le tsela yeo ba arabelago ka yona ge ba rumotšwe. Gomme ba dimilione ba lebelela mananeo a thelebišene le dimobi tšeo di bontšhago bošoro e le mohuta wa boithabišo bjo bo amogelegago.

SEO BEIBELE E SE BOLELAGO

Kgauswi le motse wa Mosul, ka leboa la Iraq, go na le mašope a motse wo e bego e le o mogolo e lego Ninife, motsemošate wa bogologolo wa Mmušo wa Asiria. Beibele e boletše e sa le pele gore Modimo o tla “dira Ninife lešope” e lego motse o mogolo woo o bego o sa atlegile. (Tsefanya 2:13) Modimo o itše: “Ke tla go dira sebogwa.” Ka baka la’ng? Ninife e be e le “motse wo o tletšego tšhollo ya madi.” (Nahume 1:1; 3:1, 6) Le gona Psalme 5:6 e re: “Jehofa o hloile motho yo a tšhollago madi.” Modimo o ile a phethagatša mantšu a gagwe go etša ge mašope a Ninife a hlatsela seo.

Bošoro bo thomilwe ke lenaba le legolo la Modimo le la batho e lego Sathane Diabolo, yoo Jesu Kriste a mmiditšego gore ke “mmolai.” (Johane 8:44) Go feta moo, ka ge “lefase ka moka le rapaletše matleng a yo kgopo,” dika tša gagwe di bonagala tseleng yeo batho ba lebelelago bošoro ka yona, go akaretša le kamoo ba ikwago ka gona ka mananeo a bontšhago bošoro. (1 Johane 5:19) E le gore re kgahliše Modimo, re swanetše go katanela go hloya bošoro gomme re rate seo Modimo a se ratago. * Na seo se a kgonega?

“Jehofa . . . o hloile le ge e le mang yo a ratago bošoro.”Psalme 11:5.

Na batho ba šoro ba ka fetoga?

SEO BATHO BA SE BOLELAGO

Bošoro e fo ba tlhago ya motho, yeo e sa fetogego.

SEO BEIBELE E SE BOLELAGO

Lahlang “kgalefo, pefelo, bobe, polelo e gobošago le polelo e lešago dihlong.” E bolela gape gore: “Hlobolang semelo sa kgale le ditlwaelo tša sona, gomme le apare semelo se sefsa.” (Bakolose 3:8-10) Na Modimo o re nyaka mo gontši? Aowa. Batho ba ka fetoga. * Bjang?

Mogato wa mathomo ke go hwetša tsebo e nepagetšego ka Modimo. (Bakolose 3:10) Ge motho wa pelo e botse a ithuta ka dika  tšeo di kgahlišago le ditekanyetšo tša Mmopi wa rena, o gogelega go Modimo ka lerato gomme o nyaka go mo kgahliša.—1 Johane 5:3.

Mogato wa bobedi o sepedišana le bagwera bao re ba kgethago. “O se ke wa gwerana le mang le mang yo bogale; o se ke wa tlwaelana le motho wa sebefedi, gore o se tlwaelane le ditsela tša gagwe gomme wa beela moya wa gago molaba.”—Diema 22:24, 25.

Mogato wa boraro o akaretša temogo. Tšea bošoro ka tsela yeo bo lego ka gona, e lego bofokodi bjo bogolo bjoo bo bontšhago go hloka boitshwaro. Batho ba šoro ga ba swane le badirakhutšo, ka ge badirakhutšo ba na le kgotlelelo. Diema 16:32 e re: “Yo a diegago go galefa o phala mogale.”

“Phegelelang khutšo le batho bohle.”Baheberu 12:14.

Na bošoro bo tla ka bja fela?

SEO BATHO BA SE BOLELAGO

Ke kgale bošoro bo le gona gomme bo ka se kgaotše.

SEO BEIBELE E SE BOLELAGO

“Go se gokae yo kgopo o tla be a se sa le gona . . . Eupša ba boleta bona e tla ba beng ba lefase, ba tla thaba kudu ka baka la go ata ga khutšo.” (Psalme 37:10, 11) Ee, e le gore a šireletše ba boleta le badirakhutšo, seo Modimo a se dirilego Ninife ya bogologolo o tla se dira le go bao ba ratago bošoro. Ka morago ga moo, bošoro bo ka se sa senya khutšo ya lefase!—Psalme 72:7.

“Ba moya o boleta . . . ba tla ja bohwa bja lefase.”—Mateo 5:5

Ka gona, ga bjale ke nako ya gore re tsome go amogelwa ke Modimo ka go hlagolela go ba le khutšo. 2 Petro 3:9 e re: “Jehofa . . . ga a le felele pelo ka gobane ga a rate gore go fedišwe le ge e le mang, eupša o rata gore bohle ba fihlelele boitsholo.”

“Batho ba tla rula ditšhoša tša bona ba di dira megoma gomme marumo a bona ba a dira disekela.”Jesaya 2:4.

^ ser. 7 Modimo o ile a dumelela Isiraele ya bogologolo gore e tsenele ntwa e le gore e šireletše motse wa yona. (2 Dikoronika 20:15, 17) Lega go le bjalo, maemo ao a ile a fetoga ge Modimo a fediša kgwerano ya gagwe le Isiraele gomme a hloma phuthego ya Bokriste, yeo e se nago mellwane.

^ ser. 11 Mehlala ya batho bao ba fetošitšego maphelo a bona e ka hwetšwa lelokelelong la dihlogo la “Beibele e Fetoša Maphelo” leo le tšwelelago ka go Morokami.

Ithute ka mo go oketšegilego

PHAFOGA!

Bofelo bja Bošoro bja ka Gae

Melao ya motheo ya Beibele e ka thuša bjang le batho ba šorošoro go fetoša mokgwa wa bona?