Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! APRIL 2015

 TABA YA LETLAKALA LA KA NTLE | GO DIREGILE ENG KA TAYO?

Tayo Yeo e Šomago

Tayo Yeo e Šomago

GA GO pelaelo gore go godiša bana go thata. Eupša go se ba nee tayo ge go swanetše go dira gore go be thata le go feta. Ka baka la’ng? Ka gobane ka ntle le tayo (1) bana ba tšwela pele ba sa laolege, e lego seo se lapišago batswadi ba bona, gomme (2) batswadi ba ba nea keletšo e fetofetogago yeo e dirago gore bana ba gakanege.

Ka lehlakoreng le lengwe, tayo e lerato le e lekalekanego, e ka tlwaetša tsela ya ngwana ya go nagana le go bopa semelo sa gagwe. Le gona e thuša bana go ikwa ba šireletšegile ge ba dutše ba gola gore ba be le maikarabelo. Eupša o ka hwetša kae tlhahlo e ka botwago bakeng sa go laya bana ba gago?

Mehola ya go Diriša Melao ya Motheo ya Beibele

Bagatiši ba makasine wo, e lego Dihlatse tša Jehofa, ba dumela gore Beibele e a kwagala ge e re, e “hola ka go ruta, go kgala, go phošolla le go laya.” (2 Timotheo 3:16) Beibele ga e fo ba puku yeo e go rutago kamoo o ka godišago bana; melao ya yona ya motheo e nea tlhahlo e šomago bakeng sa malapa. Ela hloko mehlala ya se.

BEIBELE E RE: “Bošilo bo kgokeletšwe pelong ya mošemane.”—Diema 22:15.

Le ge bana ba ka bonagala e le bao ba naganelago le go ba le botho, le bona ba ka dira dilo tša bošilo. Ka gona, bana ba hloka tayo. (Diema 13:24) Go kwešiša ntlha yeo go tla go thuša go phetha boikarabelo bja gago bjalo ka motswadi.

BEIBELE E RE: “O se ke wa hlokiša mošemanyana tayo.”—Diema 23:13.

Ga se wa swanela go boifa gore go nea tayo e lekalekanego go tla gobatša goba gwa dira gore bana ba gago ba go hloye ge ba godile. Ge e newa ka lerato, tayo e tla thuša bana ba gago go ithuta go amogela phošollo ka boikokobetšo, e lego seka seo ba tlago go se hloka ge ba godile.—Baheberu 12:11.

BEIBELE E RE: “Se sengwe le se sengwe seo motho a se bjalago, ke sona seo a tlago go se buna.”—Bagalatia 6:7.

 Ka tlhago batswadi ba nyaka go šireletša bana ba bona, e bile ba na le tshwanelo yeo. Lega go le bjalo, le tabeng yeo go sa nyakega tekatekano. Ga o hole bana ba gago ka selo ka go ba “šireletša” ditlamoragong tša ditiro tša bona goba go ba emelela ge morutiši goba motho yo mongwe yo mogolo a go botša ka boitshwaro bja bona bjo bo sa lokago. Go e na le moo, lebelela batho bao e le bathuši ba gago. Ka go dira bjalo, o tla be o ruta ngwana wa gago go hlompha bolaodi—go akaretša le bja gago.Bakolose 3:20.

BEIBELE E RE: “Mošemane yo a ipušago o tla hlabiša mmagwe dihlong.”—Diema 29:15.

Bontšha lerato, se fetofetoge gomme o be le tekatekano

Le ge batswadi ba sa swanela go tlaiša bana ba bona, ba sa dutše ba swanetše go phema kotsi e nngwe, e lego go tlogelela dilo. Puku ya The Price of Privilege e re: “Bana bao batswadi ba bona ba tlogelelago dilo ga ba tsebe gore seeta go lla sa mang ka gae.” Ge e ba o sa diriše bolaodi bja gago, ngwana wa gago a ka nagana gore ke yena a laolago. Ga go pelaelo gore o tla dira diphetho tša bošilo tšeo di tlago go nyamiša yena gaešita le wena.—Diema 17:25; 29:21.

BEIBELE E RE: “Monna o tla . . . kgomarela mosadi wa gagwe gomme ba babedi ba e tla ba nama e tee.”—Mateo 19:5.

Go ya ka Beibele, monna le mosadi ba swanetše go nyalana pele ba ka ba le bana gomme ba swanetše go kgomarelana le ka morago ga ge bana ba gotše e bile ba tlogile ka gae. (Mateo 19:5, 6) Ka mantšu a mangwe go ba molekane go tla pele—go ba motswadi go tla ka morago. Lega go le bjalo, ge e ba go ba motswadi go ka tla pele bophelong bja gago, ngwana wa gago a ka “ikgopola kudu go feta kamoo go nyakegago gore a nagane ka gona.” (Baroma 12:3) Lapa leo le “šetšago ngwana kudu” le fokodiša tswalano ya lenyalo.

Thušo Bakeng sa Batswadi

Go re o phethagatše morero wa gago bjalo ka motswadi, tayo yeo o e neago e swanetše go dumelelana le melao ye ya motheo.

Bontšha lerato. “Le se ke la befediša bana ba lena e le gore ba se nyame.”—Bakolose 3:21.

O se fetofetoge. “Anke ‘ee’ ya lena e be ee, ‘aowa’ ya lena e be aowa.”—Mateo 5:37.

Eba le tekatekano. “Ke tla go phošolla go fihla tekanyong e swanetšego.”—Jeremia 30:11. *

^ ser. 21 Bakeng sa tsebišo e oketšegilego eya go jw.org/nso. Lebelela ka tlase ga DITHUTO TŠA BEIBELE > BANYALANI LE BATSWADI, moo o tlago go hwetša dihlogo tše bjalo ka “Go Laya Bana,” “Kamoo o ka Lebeletšanago le Nako ya go ba le Matepe,” “Nweletša Ditekanyetšo tša Boitshwaro Baneng ba Gago,” le “Kamoo o ka Layago Ngwana wa Gago yo a Lego Mahlalagading.”

Ithute ka mo go oketšegilego

Lapa la Gago e ka ba Leo le Thabilego Bjang?

Jehofa, Modimo yo a thabilego, o nyaka gore lapa le thabe. Hwetša keletšo e šomago e tšwago ka Beibeleng bakeng sa banna, basadi, batswadi le bana.