Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! FEBRUARY 2015

 TABA YA LETLAKALA LA KA NTLE | NA BEIBELE E BOHLOKWA LEHONO?

Ditekanyetšo tšeo ka Mehla di Šomago go Batho Bohle—Potego

Ditekanyetšo tšeo ka Mehla di Šomago go Batho Bohle—Potego

MOLAO WA MOTHEO WA BEIBELE: “Ke mang a ka bago moeng tenteng ya [Modimo]? . . . Ke yo a sepelago ka go hloka bosodi gomme a tlwaetše go dira toko e bile a bolela therešo ka pelong ya gagwe.”Psalme 15:1, 2.

MEHOLA: Batho ba bantši ba lebelela go botega go le bohlokwa. Eupša go thwe’ng ge e ba go ka tšwelela sebaka seo motho a ka ikholago ka go se botege—gomme gwa se be le yo a tsebago ka seo? Boemong bjoo, go tla ithekga ka pelo, e lego motho wa ka gare.

Raquel, yoo mošomo wa gagwe o akaretšago go reka didirišwa o re: “Barekiši ba bangwe ba dikhamphani ba ile ba leka go mpha letsogo-le-kobong. Ba nkholofetša gore ge e ba ke reka go bona, tšhelete ya diphokoletšo e be e tla tla go nna go e na le gore e ye khamphaning ya ka. Eupša ke ile ka gopola keletšo ya Beibele ya mabapi le go botega gomme ka gana. Mong wa ka o ile a kwa ka seo gomme o ile a mpota le go feta.”

Ge nkabe Raquel a ile a dumela, a ka ba a ile a holega ka tša ditšhelete ka nakwana. Eupša go be go tla direga’ng ge nkabe mothwadi wa gagwe a tsebe ka seo? Na Raquel o be a tla tšwela pele a šoma? Na o be a tla kgona go hwetša mošomo o mongwe nakong e tlago? Sa bohlokwa kudu go Raquel e be e le letswalo la gagwe le go itlhompha. Diema 22:1 e re: “Leina le lebotse le phala mahumo a mantši kudu; go amogelwa go phala silifera le gauta.”

Jessie o ile a itirela leina le lebotse ka ge e le mošomi yo a botegago

Jessie le yena o be a botega, gomme a itirela leina le lebotse le mothwadi wa gagwe. Mehola e bile efe? O ile a newa maemo a go ba mookamedi gaešita le tokologo e oketšegilego mošomong wa gagwe. Ka baka la seo, o ile a kgona go ba le nako e oketšegilego le mosadi wa gagwe le bana gotee le nako ya mediro ya moya.

Ge bathwadi ba bangwe ba tsoma bašomi, ba ya dihlopheng tšeo di tsebjago ka go botega. Ka mohlala, mookamedi wa khamphani e itšego kua Philippines o ile a ngwalela ofisi ya lekala ya Dihlatse tša Jehofa a laletša Dihlatse gore di tsenye dikgopelo tša mošomo. O itše: “Ba šoma ka thata, ba a botega e bile ba ineetše.” Lega go le bjalo, theto e išwa go Jehofa Modimo, yo a re rutago gore re ‘hloye se sebe’ gomme re “rate se se botse.”—Amose 5:15.

Ithute ka mo go oketšegilego

Melao ya Motheo ya Beibele e re Hola Bjang?

Jesu o hlalositše lebaka leo re hlokago tlhahlo le melao ya motheo e mebedi ya Beibele yeo e lego bohlokwahlokwa.

Ditekanyetšo tša Boitshwaro Tšeo di Humišago e le ka Kgonthe

Kgopolo e tlwaelegilego ke ya gore, ‘Ge e ba o nagana gore selo se itšego se lokile, se dire. Latela pelo ya gago.’ Na ke gabohlale go nagana ka tsela ye? Bona kamoo Beibele e neago ditekanyetšo tšeo o ka di botago.