Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  January 2015

 Pono Ya Beibele

Tlaišego

Tlaišego

Batho ba bangwe ba nagana gore Modimo ke yena a bakelago batho tlaišego, goba ge e ba ga se yena a e bakago, ga a tshwenyege ka yona. Eupša na se ke seo Beibele e se rutago? Karabo e ka go makatša.

Na Modimo o re bakela tlaišego?

Ee, ka kgonthe Modimo yena ga a dire tše kgopo.”—Jobo 34:12.

SEO BATHO BA SE BOLELAGO

Ba bangwe ba re dilo ka moka tšeo di diregago ke thato ya Modimo. Ka gona, ba dumela gore Modimo ke yena a re bakelago tlaišego. Ka mohlala, ge go direga dikotsi tša tlhago ba nagana gore ditiragalo tše ke tsela ya Modimo ya go otla bao ba dirilego dibe.

SEO BEIBELE E SE BOLELAGO

Beibele e ruta ka mo go kwagalago gore Modimo ga se yena a re bakelago tlaišego. Ka mohlala, Beibele e re ge re welwa ke diteko, e tla ba phošo go bolela gore: “Ke lekwa ke Modimo.” Ka baka la’ng? Ka gobane “Modimo a ka se ke a lekwa ka dilo tše mpe le gona yena ga a leke motho le ge e le ofe.” (Jakobo 1:13) Ka mantšu a mangwe, Modimo le ka mohla ga se yena a re bakelago diteko tšeo di re welago goba tlaišego. Go dira bjalo e tla ba go bontšha bokgopo, eupša “Modimo yena ga a dire tše kgopo.”—Jobo 34:12.

Ge e ba Modimo e se yena a re bakelago tlaišego, gona ke mang goba ke’ng seo se e bakago? Ka maswabi, gantši batho ba swarwa gampe ke batho ba bangwe bao ba sa phethagalago. (Mmoledi 8:9) Go oketša moo, re ka welwa ke dikotsi ka baka la “ditiragalo tšeo di sa letelwago,” e le ka gobane re bile lefelong le le fošagetšego ka nako e fošagetšego. (Mmoledi 9:11) Beibele e ruta gore “mmuši wa lefase le,” e lego Sathane Diabolo, ke yena a ikarabelago ka tlaišego ya batho, ka ge “lefase ka moka le rapaletše matleng a yo kgopo.” (Johane 12:31; 1 Johane 5:19) Ke Sathane—e sego Modimo—yo a bakelago batho tlaišego.

 Na Modimo o na le taba le go tlaišega ga rena?

“Tlalelong ka moka ya bona le yena o be a tlalelwa.”Jesaya 63:9.

SEO BATHO BA SE BOLELAGO

Ba bangwe ba nagana gore Modimo ga a na taba le diteko tša rena. Ka mohlala, mongwadi yo mongwe o boletše ka Modimo gore, “ge e le gabotse ga a na kgaugelo goba lešoko ge re tlaišega.” Mongwadi yo o boletše gore ge e ba Modimo a le gona, o swanetše go ba a “sa kwele [batho] bohloko.”

SEO BEIBELE E SE BOLELAGO

Go e na le gore Beibele e hlalose Modimo e le motho wa go se be le kwelobohloko goba wa go se be le taba, e ruta gore Modimo o kgongwa kudu ke tlaišego ya rena, gomme kgauswinyane o tla e fediša. Ela hloko ditherešo tše tharo tšeo di homotšago tšeo di hwetšwago ka Beibeleng.

Modimo o bona tlaišego ya rena. Go tloga mathomong a tlaišego ya batho, ga gona le lerothi le letee la megokgo leo le ilego la wa Jehofa * a sa le lemoge, ka gobane “mahlo a gagwe a phadimago” a bona dilo tšohle. (Psalme 11:4; 56:8) Ka mohlala, ge barapedi ba gagwe mehleng ya bogologolo ba be ba gateletšwe, Modimo o itše: “Ke bone mohlako wa batho ba ka.” Eupša na o be a fo lemoga feela bohloko bja bona? Aowa, ka gobane o okeditše ka gore: “ke tseba mahloko a bona gabotse.” (Ekisodo 3:7) Batho ba bantši ba homotšwa ke go tseba therešo yeo—kgopolo ya gore Modimo o tseba ditlaišego tša rena ka moka, gaešita le diteko tšeo batho ba bangwe ba sa di tsebego goba go di kwešiša ka mo go feletšego.—Psalme 31:7; Diema 14:10.

Modimo o a re kwela ge re tlaišega. Jehofa Modimo ga a bone feela tlaišego ya batho eupša gape o kgomega kudu ka yona. Ka mohlala, Modimo o be a tloga a tshwenyegile ge barapedi ba gagwe ba bogologolo ba be ba lebane le diteko. Beibele e re: “Tlalelong ka moka ya bona le yena o be a tlalelwa.” (Jesaya 63:9) Le ge Modimo a phagametše batho kudu, o kwela bohloko bao ba tlaišegago—bjalo ka ge eka bohloko bjoo bo ka pelong ya gagwe! Ge e le gabotse, “Jehofa o na le lerato le legolo e bile ke yo a gaugelago.” (Jakobo 5:11) Go oketša moo, Jehofa o re thuša go kgotlelela tlaišego ya rena.—Bafilipi 4:12, 13.

Modimo o tla fediša tlaišego ka moka ya batho. Go ya ka Beibele, Modimo o tla fediša tlaišego ya batho ka moka polaneteng. Ka Mmušo wa gagwe wa legodimong, Jehofa o tla fetoša maemo a batho—gore e be a makaone. Ka nako yeo, Beibele e holofetša gore Modimo “o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” (Kutollo 21:4) Go thwe’ng ka bao ba šetšego ba hwile? Modimo o tla ba bušetša bophelong gona mo lefaseng e le gore le bona ba thabele bophelo bja go se be le tlaišego. (Johane 5:28, 29) Na go na le yo a tla tshwenywago ke go nagana ka dilo tšeo di kwešago bohloko tša tlaišego ya nakong e fetilego? Aowa, ka gobane Jehofa o holofetša gore: “Dilo tša pele di ka se sa gopolwa, e bile di ka se sa rotoga pelong.”—Jesaya 65:17. *

^ par. 13 Jehofa ke leina la Modimo bjalo ka ge le utolotšwe ka Beibeleng.

^ par. 15 Bakeng sa go tseba lebaka leo ka lona Modimo a dumelelago tlaišego ka nakwana le kamoo a tlago go e fediša ka gona, hle bala kgaolo  8 le 11 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.