Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JANUARY 2015

 DINAGA LE BATHO

Go Etela Costa Rica

Go Etela Costa Rica

NYWAGA e makgolo a mahlano e fetilego, Masepania a ile a etela lefelo le la mathomo. A ile a le bitša Costa Rica (Lebopo le Humilego), a nagana gore a tla hwetša gauta e ntši, eupša ga se a ka a hwetša selo lesolong la ona. Lehono naga ye ga se ya tuma ka ditšweletšwa tše bohlokwa, eupša ke naga e tletšego ka mehutahuta ya diphedi lefaseng.

Batho ba Costa Rica ba bitšwa Mataico, e lego lentšu leo le tšwago motlwaeng wa bona wa go rata go tlaleletša ka “-ico” mafelelong a mantšu e le go a nyenyefatša. Ka mohlala, go e na le gore ba re, “un momento” (ema), ba ka re “un momentico” (emanyana). Gantši ge ba bolela ba diriša mantšu a bjalo ka “¡pura vida!” (thobela!) go bontšha gore ba a leboga goba go dumelelana ka selo se itšego goba gore “dumela” goba “šalang gabotse.”

Dithokgwa tša Costa Rica di na le dimela tše di kgahlišago le diphoofolo tša mehutahuta, tše bjalo ka segwagwa se sa mahlo a mahubedu sa go phela mehlareng (Agalychnis callidryas)

Dijo tše dingwe tše ratwago kudu tša Costa Rica ke gallo pinto (phetolelo ya lentšu ka lentšu e re “mogogonope wa maronthorontho”)—reise le dinawa tšeo di apeilwego ka thoko gotee le dinoko. Gallo pinto e ka jewa mesong,  ka matena goba mantšiboa. Seno sa setšo ke café chorreado—kofi yeo e dirwago go šomišwa sefo ya lešela leo le lekeletšego sedirišweng seo gantši se dirwago ka lepolanka.

Go na le mo e ka bago diphuthego tše 450 tša Dihlatse tša Jehofa kua Costa Rica. Diboka tša tšona di swarwa ka maleme a lesome, go akaretša le Polelo ya Diatla ya Costa Rica le maleme a mabedi a setlogo a Costa Rica, e lego Sebribri le se-Cabecar.

NA O BE O TSEBA? Go hweditšwe maswika a makgolo a dinkgokolo a mabotse kua Costa Rica. Le legolo la ona ke la bophara bja dimithara tše 2.4. Go akanyetšwa gore a mangwe a ona a na le nywaga e fetago e 1 400 a le gona. Ga go yo a tsebago gabotse gore a be a diretšwe eng!

Maswika a dinkgokolo