Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  November 2014

 PONO YA BEIBELE

Bohlweki

Bohlweki

Na Modimo o na le taba le go hlweka ga rena mmeleng?

“A re itlhwekišeng ditšhila tšohle tša nama le tša moya.”2 Bakorinthe 7:1.

SEO BEIBELE E SE BOLELAGO

Mmopi wa rena o a re rata gomme o nyaka gore re thabele bophelo bjo bobotse, bjo botelele le bjo bo kgotsofatšago. Modimo o re: “Anke pelo ya gago e lote ditaelo tša ka, ka gobane o tla okeletšwa matšatši a mantši le nywaga ya bophelo gotee le khutšo.” (Diema 3:1, 2) Tsela yeo Modimo a ratago batho ka yona e bontšhitšwe melaong ya gagwe go Baisiraele, yeo e bego e akaretša ditaelo tše di lebanyago tabeng ya bohlweki. (Doiteronomio 23:12-14) Ge Baisiraele ba be ba phela ka ditekanyetšo tšeo tše di lekalekanego, ba be ba thabela bophelo bjo bokaone le go šireletšega malwetšing ao a bego a swara ditšhaba tše dingwe, tše bjalo ka Egipita, tšeo di bego di se na molao woo wo o bego o le nakong.—Doiteronomio 7:12, 15.

Ka mo go swanago lehono, batho bao ba “[itlhwekišago] ditšhila tšohle tša nama,” tšeo di akaretšago mekgwa e šilafatšago e bjalo ka go kgoga, go nwa bjala kudu le go diriša dihlaretagi gampe, ba fokotša dikotsi tša go babja mmeleng le monaganong—go akaretša le go phema lehu la kapela. Le gona ka ge re sa phele lekatana, go latela ga rena ditekanyetšo tša Modimo tša bohlweki go bontšha gore re naganela ba bangwe.—Mareka 12:30, 31.

 Na Modimo o na le taba le go hlweka boitshwarong le moyeng?

“Ka gona bolayang . . . dithong tša mebele ya lena, e lego bootswa, go se hlweke, kganyogo e fošagetšego ya go robala ga monna le mosadi, kganyogo e gobatšago le megabaru, e lego borapedi bja medimo ya diswantšho. Kgalefo ya Modimo e a tla ka baka la dilo tšeo.”Bakolose 3:5, 6.

SEO BEIBELE E SE BOLELAGO

Bjalo ka ge go hlalositšwe pejana, Beibele e re kgothaletša gore re “itlhwekišeng ditšhila tšohle tša nama le tša moya.” Mehleng ya Jesu Kriste, batho ba bantši go akaretša le baetapele ba bodumedi ba Bajuda, ba be ba dira maiteko a feteletšego gore ba dule ba hlwekile mmeleng eupša ba sa phele ka ditekanyetšo tša boitshwaro le tša moya. (Mareka 7:1-5) Bakeng sa go bea dilo maemong ao a swanetšego, Jesu o itše: “Ga go selo se se tšwago ka ntle seo se tsenago mothong seo se ka mo šilafatšago, ka ge se tsena ka mpeng, . . . gomme sa tšwela mo go elelelago ditšhila?” Go feta moo, a re: “Seo se tšwago mothong ke sona se se šilafatšago motho, gobane ka gare, e lego ka dipelong tša batho, go tšwa dikeleletšo tše di gobatšago tšeo di feleletšago ka mediro ya bootswa, bohodu, dipolao, bohlotlolo, megabaru, ditiro tša bokgopo, bofora, boitshwaro bjo bo hlephilego, leihlo le le nago le mona, . . . le go hloka tlhaologanyo. Dilo tše ka moka tše kgopo di . . . šilafatša motho.”—Mareka 7:18-23.

Go ya ka Jesu, batho bao ba tšeelago godimo taba ya go hlweka mmeleng eupša ka nako e swanago ba sa phele ka ditekanyetšo tša Modimo tša boitshwaro le tša moya ba swana le dinwelo tšeo di hlwekilego kantle eupša di šilafetše ka gare.—Mateo 23:25, 26.

Na ditekanyetšo tša Beibele di a kwagala?

“Se ke seo lerato la Modimo le se bolelago, gore re boloke ditaelo tša gagwe gomme ditaelo tša gagwe ga di boima.”1 Johane 5:3.

SEO BEIBELE E SE BOLELAGO

Go Mika 6:8, re bala gore: “Ke eng seo Jehofa a go kgopelago sona ge e se go bontšha toka, go rata botho le go ba le boipoetšo ge o sepela le Modimo wa gago!” Na yeo ga se kgopelo e kwagalago? Go feta moo, Mmopi wa rena o nyaka gore re mo hlankele ka go rata. Ge re dira bjalo, re hwetša lethabo. (Psalme 40:8) Le gona ge re foša, re hwetša khomotšo kgaugelong ya Modimo. “Go etša ge tate a gaugela bana ba gagwe, le Jehofa o gaugetše bao ba mmoifago. Gobane yena o tseba gabotse kamoo re bopegilego ka gona, a gopola gore re lerole,” goba re a fokola e bile ga se ra phethagala.—Psalme 103:13, 14.

Ka boripana, ditekanyetšo tša Modimo tša go hlweka mmeleng, boitshwarong le moyeng ke pontšho ya botho bja gagwe le gore o a re rata. Go ikemišetša ga rena go phela ka ditekanyetšo tšeo go bontšha gore re bohlale e bile re a mo rata.

Ithute ka mo go Oketšegilego

MOROKAMI

Pono ya Modimo ka go Kgoga ke Efe?

Beibele ga e bolele ka motšoko, bjale re ka tseba bjang?

MOROKAMI

Beibele e Fetoša Maphelo—October 2012

Batho ba babedi ba tlogetše bjang mekgwa ya bona e mebe, go akaretša bjala le dihlaretagi, gomme ba thaba e le ka kgonthe?