Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! NOVEMBER 2014

Ke Hweditše Kholofelo ge ke be ke Tloga ke e Hloka

Ke Hweditše Kholofelo ge ke be ke Tloga ke e Hloka

Gateetee ke ile ka ikhwetša ke patlame ka gare ga meetse. Ke ile ka leka go emiša hlogo gore ke kgone go hema, eupša mešifa ya molala wa ka e be e sa šome. Ke tšhogile, ke ile ka leka go šikologa eupša matsogo a ka le maoto di be di sa šikinyege. Maswafo a ka a ile a thoma go tsenwa ke meetse. Letšatšing leo go bego go ruthetše, ka selemo sa 1991, bophelo bja ka bo ile bja fetoga ka mo go feletšego.

KE BELEGETŠWE toropong ya Szerencs gomme ka golela motseng wa Tiszaladány wa leboabohlabela bja Hungary. Ka June 1991, nna le bagwera ba ka re ile ra ya lefelong leo le sa tlwaelegago Nokeng ya Tisza. Ka ge ke be ke nagana gore meetse a be a iša, ke ile ka phonkgela ka gare. Yeo e be e le phošo e kgolo! Ke ile ka robega marapo a mararo a mo molaleng gomme seo se ile sa gobatša lerapo la ka la mokokotlo. Mogwera wa ka o ile a bona gore ga ke šikinyege gomme ka kelohloko o ile a nkgogela ka ntle pele ke kgangwa ke meetse.

Ke ile ka dula ke phafogile gomme ke be ke tseba gore ruri go be go na le bothata. Yo mongwe o ile a bitša ba tša tirelo ya tšhoganetšo gomme sefofane se ile sa fihla gomme sa nkiša bookelong, moo dingaka di ilego tša beakanya lerapo la ka la mokokotlo. Ka morago, ke ile ka fetišetšwa motsengmošate kua Budapest, bakeng sa go nthuša gore ke boele sekeng. Ke feditše dikgwedi tše tharo ke robetše ka mokokotlo. Le ge ke be ke kgona go šikinya hlogo, mešifa ya ka go tloga magetleng go ya fase e be e sa šome. Ge ke na le nywaga e 20, ke ge ke sa kgone go itirela selo. Ke ile ka ikwa ke nyamile moo ke bego ke nyaka le go hwa.

Ge mafelelong ke kgona go boela gae, batswadi ba ka ba ile ba tlwaetšwa gore ba kgone go ntlhokomela. Eupša mošomo woo o be o ba imela mmeleng le maikwelong, gomme ka morago ga mo e ka bago ngwaga ke ile ka ba le kgateletšego ya monagano. Ka nako yeo, ke ile ka hwetša keletšo ya ditsebi, yeo e ilego ya nthuša go fetoša tsela yeo ke bego ke lebelela bogole bja ka ka yona.

Le gona ke ile ka thoma go naganišiša kudu ka bophelo. Na bo na le morero? Ke ka baka la’ng ke wetšwe ke masetlapelo a? Ke badile dimakasine le dipuku e le ge ke nyaka dikarabo. Ke ile ka leka go bala le Beibele, eupša go be go le thata go ikwešiša. Ka gona ka kgaotša go e bala. Ke ile ka ba ka boledišana le moruti, eupša dikarabo tša gagwe di be di sa nkgotsofatše.

Ke moka, ka seruthwane sa 1994, Dihlatse tša Jehofa tše pedi di ile tša etela tate, gomme o ile a di kgopela gore di boledišane le nna. Ke be ke di theeditše ge di hlalosa morero wa Modimo wa go dira lefase paradeise le go fediša bolwetši le tlaišego. Ditaba tšeo di be di kwagala di kgahliša, eupša ke be ke na le dipelaelo. Lega go le bjalo, ke ile ka amogela dikgatišo tše pedi tšeo di theilwego Beibeleng. Ka morago ga go bala dipuku tšeo, Dihlatse di ile tša ithaopela go ithuta Beibele le nna gomme ke  ile ka dumela. Di ile tša ba tša nkgothaletša go rapela.

Ke ile ka kgodišega gore Modimo o tloga a na le taba le nna

Ge dipoledišano tša rena di tšwela pele, ke ile ka hwetša dikarabo tša dipotšišo tša ka tše dintši go tšwa ka Beibeleng. Ke ile ka ba ka kgodišega gore Modimo o tloga a na le taba le nna. Mafelelong, ka September 13, 1997, ka morago ga go ithuta Beibele ka nywaga e mebedi, ke ile ka kolobetšwa ka gae ka gare ga pafo ya go hlapela. Leo e bile le lengwe la matšatši a thabišago bophelong bja ka.

Ka 2007, ke ile ka yo dulela sa ruri Budapest legaeng la digole. Go hudugela moo go nneile dibaka tše dintši tša go boledišana le ba bangwe ka dilo tše di kgahlišago tšeo ke ithutilego tšona. Ge boemo bja leratadima bo le gabotse, ke kgona le go ya ka ntle ka yo boledišana le batho, ke thušwa ke setulo sa ka sa digole seo se hlamilwego ka go kgethega, seo ke kgonago go se laola ka seledu sa ka.

Ka thušo ya tša ditšhelete ya lapa leo le lego phuthegong ya gešo, ke ile ka kgona go hwetša khomphutha ya laptop yeo e kgonago go šoma ge ke šikinya hlogo. Ka khomphutha ye ke kgona go leletša batho mogala ka Inthanete le go ngwalela beng ba dintlo bao ba bego ba se gona ge ditho tša phuthego di be di ba etela magaeng a bona. Go thuša ba bangwe ka tsela ye go kaonefaditše bokgoni bja ka bja go bolela gomme go nthušitše gore ke se ke ka nagana kudu ka nna.

Ke botša ba bangwe molaetša wa Beibele ka Inthanete ke diriša khomphutha yeo e kgonago go šoma ge ke šikinya hlogo ya ka

Ke kgona le go ya dibokeng tša Bokriste. Ge ke fihla Holong ya Mmušo, bana bešo ba moya ka šedi ba nkuka ka setulo sa ka sa digole gore ke kgone go fihla lebatong la ka godimo moo go swarelwago diboka. Nakong ya diboka ge batheetši ba laletšwa gore ba nee ditlhaloso, ngwanešo yo a dutšego kgauswi le nna o emiša letsogo la gagwe legatong la ka. Ke moka o ntshwarela Beibele goba kgatišo yeo re ithutago yona ge ke nea tlhaloso.

Ke dula ke opelwa gomme ke hloka gore ba bangwe ba ntirele mo e ka bago dilo ka moka. Ka gona ka dinako tše dingwe ke na le go ikwa ke nyamile. Eupša ke homotšwa ke segwera sa ka le Jehofa Modimo, ka ge ke tseba gore o a ntheetša ge ke mmotša dilo tšeo di ntshwenyago. Gape ke matlafatšwa ke go bala Beibele letšatši le letšatši le ke bana bešo le dikgaetšedi ba moya. Segwera sa bona, go nthekga ga bona maikwelong le dithapelo tša bona di nthuša go ba le tekatekano ya monagano le ya maikwelo.

Jehofa o nneile khomotšo ka nako yeo ke bego ke tloga ke e hloka. Gape o nneile le kholofelo ya boemo bjo bo phethagetšego bja tša maphelo lefaseng le lefsa. Ka gona, ke hlologetše nako yeo ke tla bego ke kgona go ‘sepela, go taboga le go mo tumiša’ ka baka la lerato le botho bja gagwe tšeo di sa lekanywego le selo.—Ditiro 3:6-9.

Ithute ka mo go oketšegilego

Tšwela Pele o Phela—Ka Gobane go na le Kholofelo

Go swana le seetša seo se lego kgojana, kholofelo e ka go thuša go bona ka kua ga leswiswi.

Tšwela Pele o Phela—Ka Gobane o ka Hwetša Thušo

Dilo tše tharo tšeo di ka go thušago gore o tšwele pele o phela.

Ge o Welwa ke Masetlapelo

Beibele e ka go thuša go lebeletšana le boemo.