Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! OCTOBER 2014

 TABA YA LETLAKALA LA KA NTLE

Katlego ya Kgonthe ke Eng?

Katlego ya Kgonthe ke Eng?

KE ENG se se kwešago bohloko go feta go palelwa? Ke katlego yeo e sego ya kgonthe. Go ba gona, ge e ba o paletšwe ke go fihlelela selo se itšego, o ka gata megato ya go lokiša boemo. Mafelelong, o ka ithuta diphošong tša gago ke moka wa lokiša nakong e tlago.

Katlego yeo e sego ya kgonthe e fapane. Ge e šetše e go laola, o ka nagana gore dilo di sepela gabotse mola e le gona ge di senyega. O ka lemoga mola dilo di senyegile gore go nyakega gore o dire diphetogo.

Ela hloko mohlala wo. Jesu Kriste o kile a botšiša gore: “Motho go tla mo hola’ng ge e ba a ka rua lefase ka moka eupša a loba moya wa gagwe?” (Mateo 16:26) Kgopolo yeo e ka šoma kudu go bao ba ineetšego go hwetšeng tšhelete le dilo tšeo e ka di rekago, e lego mohlala o mobotse wa katlego yeo e sego ya kgonthe. Moeletši wa tša mešomo e lego Tom Denham o ngwala gore: “Go nagana feela ka go hlatlošwa mošomong, go dira tšhelete e ntši goba go hwetša dilo tše di oketšegilego, ga go kgotsofatše motho. Go fo ela katlego ka tšhelete ke go iphora, go tla go tlogela o sa thaba.”

Ke therešo gore batho ba bantši lehono ba tla dumelelana le seo. Nyakišišong e nngwe yeo e dirilwego kua United States, e bontšhitše gore lelokelelong la dilo tše 22 “tšeo di dirago gore o atlege bophelong, go ba le tšhelete e ntši” go ile gwa ba maemong a bo-20. Dilo tše bjalo ka go phela gabotse mmeleng, ditswalano tše dibotse le ba bangwe le go ba le mošomo woo o o ratago, di ile tša ba maemong a pele.

Ge batho ba bantši ba botšišwa, go molaleng gore ba kgona go dira phapano magareng ga katlego yeo e sego ya kgonthe le katlego ya kgonthe. Lega go le bjalo, go thata go dira diphetho tšeo di bontšhago gore o na le pono e botse ka katlego.