Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  October 2014

 PONO YA BEIBELE

Diswantšho

Diswantšho

Batho ba dimilione bao ba ineetšego ba diriša diswantšho e le karolo ya borapedi bja bona. Eupša na mokgwa woo o dumeletšwe ka Beibeleng? Na o kgahla Modimo?

Na Bajuda ba botegago ba mehleng ya Beibele ba be ba rapela diswantšho?

“O se ke wa itirela seswantšho se se betlilwego goba sebopego sa selo seo se swanago le selo le ge e le sefe seo se lego godimo magodimong goba seo se lego tlase lefaseng goba seo se lego ka meetseng ka tlase ga lefase. O se ke wa di khunamela goba wa gokeletšwa go di hlankela.”Ekisodo 20:4, 5.

Borapedi bja diswantšho bo ganetšwa leboelela ka Mangwalong a Seheberu, ao a tsebjago e le Testamente ya Kgale

SEO SE TLWAETŠWEGO GO BOLELWA

Go ya ka New Catholic Encyclopedia, Bajuda ba be ba na le diswantšho tše dintši tšeo di bego di sepedišana le borapedi bja bona “gomme diswantšho tše di be di tšeelwa godimo, di hlompšha e bile di rapelwa.” * Ka mohlala, encyclopedia yeo e bolela ka diswantšho tše dintši tša dienywa, matšoba le diphoofolo tšeo di bego di kgabišitše tempele ya Jerusalema.—1 Dikgoši 6:18; 7:36.

SEO O SWANETŠEGO GO SE TSEBA

Go fapana le seo se bolelwago ke New Catholic Encyclopedia, Bajuda bao ba botegago ba be ba sa rapele diswantšho tše itšego tša tempele. Ge e le gabotse, ga gona moo ka Beibeleng re balago ka Moisiraele yo a botegago a diriša diswantšho borapeding.

SEO BEIBELE E SE BOLELAGO

Modimo o boletše a diriša moporofeta Jesaya gore: “Nka se nee yo mongwe letago la ka, le go tumišwa ga ka nka se go nee diswantšho tše di betlilwego.”—Jesaya 42:8.

 Na Bakriste ba pele ba be ba diriša diswantšho borapeding?

“Tempele ya Modimo e na le tumelelano efe le medingwana? . . . Le lese go kgwatha selo se se sa hlwekago.”—2 Bakorinthe 6:16, 17.

“Bakriste ba pele ba be ba tla tšhošwa gaešita le ke tšhišinyo ya gore go bewe diswantšho ka dikerekeng, le gona ba be ba tla lebelela go khunama goba go rapela pele ga tšona e le go rapela medimo ya diswantšho.”—History of the Christian Church

SEO SE TLWAETŠWEGO GO BOLELWA

New Catholic Encyclopedia e re: “Ga go na lebaka la go belaela gore Bakriste ba pele ba be ba diriša diswantšho borapeding. Mabitla a Bakriste ba pele a kgabišitšwe ka diswantšho tše dintši tša Bokriste. . . . Gaešita le diswantšho tša dinonwane di be di kgabišitše diphapoši tša borapedi bjo bokgethwa le tša mabitla.” *

SEO O SWANETŠEGO GO SE TSEBA

Diswantšho tša kgale tšeo di hweditšwego mabitleng—mabato a ka tlase ao a bego a dirišwa bjalo ka mabitla—ke tša lekgolong la boraro la nywaga. E lego nywaga e ka bago e 200 ka morago ga lehu la Jesu. Ka gona, seo New Catholic Encyclopedia e se bitšago “borapedi bja pele bja Bokriste” ga se borapedi bja pele bja Bokriste—bjoo bo bego bo dirwa ke barutiwa ba lekgolong la pele la nywaga le bjo bo hlalositšwego ka Mangwalong a Ba- kriste a Segerika, ao a tsebjago e le Testamente e Mpsha. Taba ya gore diswantšho tše di be di le mabitleng e fo ba e bontšha gore lekgolong la boraro la nywaga, bao ba ipitšago gore ke Bakriste ba be ba thomile go ekiša setlogo sa boheitene sa go diriša diswantšho, e le gore ba goketše basokologi. *

SEO BEIBELE E SE BOLELAGO

“Tšhabang borapedi bja medimo ya diswantšho.”—1 Bakorinthe 10:14.

Na diswantšho di swanetše go dirišwa e le feela thušo borapeding?

“Itišeng go medingwana.”1 Johane 5:21.

Go rapela diswantšho ke mokgwa wa bodumedi woo o sa thekgwego ke Beibele. Ka lebaka leo Dihlatse tša Jehofa ga di rapele diswantšho e bile ga di na diswantšho tša bodumedi magaeng a tšona le mafelong a tšona a borapedi

SEO SE TLWAETŠWEGO GO BOLELWA

New Catholic Encyclopedia e re: “Ka ge borapedi bjo bo newago seswantšho bo fihlelela le go felela mothong yo a emelwago, gona mohuta wona woo wa borapedi bjo bo išwago mothong o ka išwa le seswantšhong ka ge se emela motho.”

SEO O SWANETŠEGO GO SE TSEBA

Ge Jesu a be a ruta balatedi ba gagwe go rapela, ga se a ba botša gore ba diriše diswantšho. Kgopolo ya go diriša diswantšho go rapela Modimo wa therešo ga e gona ka Mangwalong a Bokriste a Segerika.

SEO BEIBELE E SE BOLELAGO

“Ke Jehofa Modimo wa gago yo o swanetšego go mo rapela, e bile ke yena a nnoši yo o swanetšego go mo direla tirelo e kgethwa.”—Mateo 4:10.

^ ser. 7 The New Catholic Encyclopedia e hlalosa go rapela e le “tiro ya bodumedi, tiro ya borapedi.”

^ ser. 13 Tabeng ye, diswantšho di akaretša dinepe, dihlwa-di-eme, maswao le selo le ge e le sefe seo se rapelwago.

^ ser. 14 Go diriša diswantšho go be go tlwaelegile ditšong tše dintši tša bogologolo, go akaretša le tša Egipita, Gerika le India.

Ithute ka mo go Oketšegilego

DIPOTŠIŠO TŠA BEIBELE DI A ARABJA

Na re Swanetše go Rapela Diswantšho?

Na Modimo o na le taba le gore re diriša diswantšho ge re mo rapela?