Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! OCTOBER 2014

 DINAGA LE BATHO

Go Etela Belize

Go Etela Belize

BELIZE e nyenyane e na le dilo tša go fapafapana, go tloga ka dithokgwa tša dipula go ya go meetse a mmala wa thekoise ao a dikologilego dihlakahlaka tše dintši lebopong la yona. Eupša bokgabo bja go fapafapana bja tlhago ke feela mathomomayo a bobotse bja Belize.

Go na le dinonyana le diphoofolo tše makgolo nageng ye. Go diphoofolo tša yona tša naga go na le nonyana ya mebala ya go taga e bitšwago keel-billed toucan (Ramphastos sulfuratus) le phoofolo e bitšwago Baird tapir (Tapirus bairdii), e lego ya legoro la bo tšhukudu, ya nko e boreledi le e telele e bile e kgona go kitima ka ntle le ka gare ga meetse! Gape go na le solitary jaguar (Panthera onca). Ge e le gabotse, Belize e ikgantšha ka go ba naga ya pele lefaseng ya go šireletša di-jaguar.

Belize e ikgantšha ka go ba naga ya pele lefaseng ya go šireletša di-jaguar

Belize e kile ya ba karolo ya Maya yeo e hlabologile. Lekgolong la bo-16 la nywaga, bafenyi ba Masepania ba ile ba fihla eupša ga se ba ka ba fenya batho ba Maya ka mo go feletšego. Ka morago, Mabrithania a ile a lwela go laola naga gomme a e thopa ka mo go feletšego ka 1862  gore e be koloni ya British Honduras ka molao. Belize e ile ya thoma go ipuša ka 1981.

Batho ba Belize ba ikgabiša ka mebala go swana le naga ya bona. Merafo e mengwe e tlwaelegilego ke maCreole, Maindia a Bohlabela, Magarifuna, Mamaya le Mamestizo. Batho ba yona ba na le bogwera e bile ba na le tlhompho. Ge bana ba bolela le batho ba bagolo, gantši ba diriša mantšu a rego “Mma” goba “Morena” gomme ba araba ka gore, “Ee, mma” goba “Aowa mohlomphegi.”

Mmaraka wa Motse wa Belize

Kua Belize, go na le diphuthego tša Dihlatse tša Jehofa ka Polelo ya Diatla ya Amerika, Sekriol sa Belize, Seisemane, se-China sa Mandarin, Sejeremane sa ka Bodikela, Semaya (Mopán) le Sepanishi. Ka 2013, mo e ka bago motho o tee go ba 40 kua Belize o ile a ba gona Segopotšong sa Dihlatse sa ge go gopolwa lehu la Jesu.

NA O BE O TSEBA? Coral reef ya Belize ke ya botelele bja dikhilomithara tše 290. Ke karolo ya barrier reef ya bobedi ka bogolo lefaseng yeo e latelago Great Barrier Reef ya Australia.

Coral reef ya Belize ke karolo ya Barrier reef ya bobedi ka bogolo lefaseng