Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! SEPTEMBER 2014

 DISWANTŠHO TŠA KGALE

Sepania e Raka Mamorisco

Sepania e Raka Mamorisco

Go thwe mo e ka bago dilo ka moka tšeo di dirilwego ke Masepania kanegelong ye e nyamišago di be di šušumeditšwe ke kereke. Ye ke kanegelo yeo ruri motho a swanetšego go e bala.

DIKGOŠI tša Sepania di be di nyaka gore Mmušo wa Bokriste o diriše melao e swanago. Ka ge go be go thwe Mamorisco ga se badumedi, go ile gwa bewa mabaka a gore ke batho ba babe pele ga Modimo. Ka morago ga nywaga e mentši, go ile gwa dirwa phetho. Tharollo e be e le efe? Ba swanetše go rakwa! *

GO GAPELETŠWA GO SOKOLOGA

Ka nywagakgolo, Mamoor kua Sepania e lego Mamoseleme a sego kae ao a bitšwago Mamudéjar, a be a phela ka khutšo mafelong ao a laolwago ke Katholika. Ka nako e itšego, mafelong a mangwe Mamoor a be a newa ditokelo tšeo di a dumelelago go diriša melao ya ona le metlwae gotee le go phela ka bodumedi bja ona.

Eupša ka 1492, dikgoši tša Katholika e lego Ferdinand II le Isabella di ile tša fenya Granada, e lego karolo ya mafelelo ya Iberia yeo e bego e sa le ka tlase ga taolo ya Mamoseleme. Ge Mamoseleme a lefelong leo a be a ka ineela a be a tla hwetša ditokelo tšeo di swanago le tša Mamudéjar. Eupša baetapele ba Katholika ba ile ba tlaiša Mamoseleme le go feta gomme ba a gapeletša gore a sokologe. Mamoor  a ile a ipelaetša ka ge a be a sa swarwe gabotse, gomme ka 1499, a rabela. Mašole a mmušo a ile a thibela bohlanogi bjoo, eupša ka morago mafelong ka go latelana, Mamoseleme a ile a gapeletšwa go sokologa goba go huduga. Masepania a ile a bitša bao ba ilego ba sokologa le go dula kua Sepania gore ke Mamorisco.

“GA SE BAKRISTE BA BABOTSE GOBA BALATA BA BOTEGAGO”

Ka 1526, Bomoseleme bo ile bja thibelwa Sepania ka moka, eupša Mamorisco a mantši a ile a tšwela pele ka bodumedi bja ona ka sephiring. Bontši bja ona a ile a kgomarela setšo sa ona.

Mathomong boikaketši bja Mamorisco bja gore ke Makatholika bo be bo kgotleletšwe. Taba ke gore ba be ba tseba mešomo e bohlokwa ya diatla, e le babetli, bašomi le gona ba lefa lekgetho. Lega go le bjalo, go gana ga Mamorisco go sokologa go ile gwa a bakela mathata, gomme ba be ba kgethollwa ke mmušo le batho ba tlwaelegilego. Kgethollo yeo e ka ba e hlohleleditšwe ke dipelaelo tša kereke tša gore go sokologa ga Mamorisco ke ga boikaketši.

Go se go ye kae, ba ile ba gatelelwa go e na le go kgotlelelwa. Ka 1567, go ile gwa phatlalatšwa phetho ya Kgoši Philip II ya gore go thibelwe leleme la Mamorisco, moaparo, metlwae le setšo sa bona. Se se ile sa baka borabele le tšhollo ya madi.

Go akanyetšwa gore Mamorisco a 300 000 a ile a gapeletšega go tšhaba Sepania gore a pheme tlaišo e sehlogo

Go ya ka boradihistori, baetapele ba Sepania ba ile ba kgodišega gore “Mamorisco ga se Bakriste ba babotse goba balata ba botegago.” Ka baka leo, ba ile ba latofatšwa ka go loga maanomabe le manaba a Sepania, e lego mahodu a ka lewatleng a Barbary, Maprotestanta a Fora le Maturkey gore ba hlasele naga. Kgethollo le go boifa gore Mamorisco a tla feleletša a fetogile marabele di tlaleleditše tabeng ya gore Philip III a tšee phetho ya go a raka ka 1609. * Nywageng ya go latela, batho bao go bego go gononelwa gore ke Mamorisco ba be ba tlaišwa. Ka ditiro tše bjalo tše sehlogo, go ile gwa tlala bodumedi bja Katholika kua Sepania.

^ ser. 4 Ka Sepania, lentšu Mamorisco le ra gore “Mamoor a Manyenyane.” Boradihistori ba diriša lentšu le e sego ka tsela ya go nyatša ge ba bolela ka bao peleng e bego e le Mamoseleme, gomme ya ba Makatholika ke moka ba dula Pheninsuleng ya Iberia ka morago ga go wa ga mmušo wa mafelelo wa Mamoseleme ka 1492.

^ ser. 12 Boradihistori ba nagana gore mo e ka bago o tee wa baetapele ba Sepania o be a ikhola ka tšhelete ya go hulwa ga dinaga tša Mamorisco.