Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JULY 2014

 TABA YA LETLAKALA LA KA NTLE | GE O WELWA KE MASETLAPELOKAMOO O KA LEBELETŠANAGO LE BOEMO

Go Lahlegelwa ke Dithoto

Go Lahlegelwa ke Dithoto

Ka Labohlano la March 11, 2011, kua Japane go bile le tšhišinyego ya lefase ya bogolo bja 9.0, yeo e bolailego batho ba fetago 15 000 gomme ya dira gore go senyege diranta tše fetago dibilione tše 2000. Ka ge Kei wa nywaga e 32 a be a lemošitšwe ka tsunami yeo e bego e le kgauswi le go direga, o ile a itšhireletša ka go tšhabela lefelong le le phagamego. O re: “Mesong e latelago ke ile ka boela gae gore ke yo topa seo nka se hwetšago, eupša meetse a be a gogotše dilo ka moka a di lahletše lewatleng go akaretša le ntlo ya ka. Go be go šetše motheo wa ntlo feela.

“Go tšere nako gore ke amogele gore ga se ka lahlegelwa feela ke dithoto tša ka eupša le tikologo ya gešo ka moka. Ka moka di be di ile—koloi ya ka; dikhomphutha tšeo ke bego ke šoma ka tšona; ditafola, ditulo le sofa yeo ke bego ke e dirišetša baeng; keyboard ya ka, katara e kgolo le e nyenyane le naka ya go letša; didirišwa tša ka tša go penta, dioli le diphensele tša mebala; le diswantšho tša ka ka moka tšeo ke di thadilego.”

GO LEBELETŠANA LE MASETLAPELO

Leka go nagana ka seo o sa nago le sona e sego seo se go lahlegetšego. Beibele e re: “Gaešita le ge motho a atetšwe ke dilo, fela bophelo bja gagwe ga bo tlišwe ke dilo tše a nago le tšona.” (Luka 12:15) Ge Kei a gopola boemo bja gagwe o re: “Mathomong, ke ile ka dira lelokelelo la dilo tšeo ke di nyakago, eupša se se ile sa fo nkgopotša dilo tšeo di gogotšwego ke meetse. Ke ile ka dira phetho ya go ngwala feela dilo tšeo ke bego ke tloga ke di hloka gomme ka fetoša lelokelelo leo ge ke hwetša dilo tšeo. Lelokelelo leo le nthušitše go thomološa bophelo bja ka lefsa.”

Go e na le go nagana ka wena o nnoši, diriša phihlelo ya gago go kgothatša ba bangwe. Kei o re: “Ke ile ka hwetša thušo e kgolo go ba tša tlhakodišo le go bagwera, eupša ge ke thoma go tlwaela go fiwa, ke ile ka thoma go se sa itlhompha. Ke moka ka gopola mantšu a Beibele go Ditiro 20:35 yeo e rego ‘go na le lethabo le legolo go neeng go feta go amogeleng.’ Ka ge ke be ke se na dilo tše dintši tšeo nka fanago ka tšona, ke ile ka kgothatša bao ba wetšwego ke kotsi yeo. Go bontšha moya wa go fa ka tsela yeo e bile thušo e kgolo go nna.”

Rapela Modimo gore a go nee bohlale bja go lebeletšana le maemo a gago. Kei o be a bota kgonthišetšo ya Beibele ya gore Modimo o tla “araba dithapelo tša bao ba hutšwego dilo ka moka.” (Psalme 102:17) O ka dira se se swanago.

Na o be o tseba? Beibele e bolela e sa le pele ka nako yeo go tla bego go se na yo a tshwenyegago ka go lahlegelwa ke dilo ka baka la kotsi ya tlhago. *Jesaya 65:21-23.

^ ser. 9 Bakeng sa go ithuta gore morero wa Modimo ke ofe ka lefase, bona kgaolo 3 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

Ithute ka mo go oketšegilego

Na Dikotsi tša Tlhago ke Kotlo e Tšwago go Modimo?

Ela hloko dintlha tše tharo tšeo di hlaolago dikahlolo tša Modimo tšeo di begilwego ka Beibeleng.

Dikotsi di ka se sa hlwa di Eba Gona!

Dikotsi tša tlhago di bonagala eka di ka se fele, eupša Beibele e nea motheo wa kgonthe wa kholofelo ya gore se se tla fetoga—kgauswinyane.