Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  July 2014

 PONO YA BEIBELE

Bodumedi

Bodumedi

Ke ka baka la eng go na le madumedi a mantši gakaaka?

“Le tlogela taelo ya Modimo la kgomarela tlwaelong ya batho.”—Mareka 7:8.

SEO BEIBELE E SE BOLELAGO

Batho ba na le ‘senyakwa sa dilo tša moya’ seo ba ka se kgotsofatšago ka go rapela Modimo. (Mateo 5:3) Batho ba lekile go kgotsofatša senyakwa seo ka go hlama madumedi a mantši ao a theilwego dikgopolong tša batho e sego tša Modimo.

Ka mohlala, Beibele ge e bolela ka ditho tša sehlopha se sengwe sa bodumedi sa lekgolong la pele la nywaga e re: “Ba fišegela Modimo; eupša e sego go ya ka tsebo e nepagetšego; gobane ka baka la go se tsebe toko ya Modimo eupša ba nyaka go thea ya bona, ga ba ka ba ikokobeletša toko ya Modimo.” (Baroma 10:2, 3) Ka mo go swanago lehono, go na le madumedi a mantši ao a “[rutago] ditaelo tša batho e le dithutatumelo.”—Mareka 7:7.

 Na go bohlokwa go ba setho sa bodumedi bjo itšego?

“A re hlokomelaneng gore re hlohleletšaneng leratong le medirong e mebotse, re sa tlogele go bokana ga rena gotee.” —Baheberu 10:24, 25.

SEO BEIBELE E SE BOLELAGO

Baheberu 10:25 e diriša mantšu a rego “re sa tlogele go bokana ga rena gotee.” Mantšu ao a bontšha gore Modimo o nyaka batho ba bokana e le sehlopha se se rulagantšwego sa borapedi. Eupša na morapedi yo mongwe le yo mongwe o swanetše go ba le pono ya gagwe ka seo Modimo a lego sona le seo a se nyakago? Aowa. Beibele e re bao ba rapelago ka tsela yeo Modimo a e nyakago ‘ka moka ba bolele ka go dumelelana’ le gona e be “batee ka mo go feletšego monaganong o swanago le tseleng e swanago ya go nagana.” (1 Bakorinthe 1:10) Ba swanetše go rulaganywa ka diphuthego gomme ba ‘rate mokgatlo wohle wa bana babo rena’ lefaseng ka bophara. (1 Petro 2:17; 1 Bakorinthe 11:16) Borapedi bjo bjalo bjo bo nago le botee le bjo rulagantšwego bo a nyakega gore re kgahle Modimo.

Re ka tseba bjang bodumedi bja therešo?

“Bohle ba tla tseba ka se gore le barutiwa ba ka, ge e ba le ratana.” —Johane 13:35.

SEO BEIBELE E SE BOLELAGO

Beibele e re thuša go lemoga bao ba lego bodumeding bja therešo, ge e re: “Le tla ba tseba ka dienywa tša bona. Na batho ba ke ba fule diterebe meetlweng goba mago dimeleng tše di hlabago?” (Mateo 7:16) Ga go hlokagale gore o be rathutadimela gore o tsebe phapano magareng ga mohlare wa mogo le wa mootlwa; ka mo go swanago, ga go hlokagale gore o be setsebi sa bodumedi gore o tsebe bja therešo go bja maaka. Ke dienywa goba dibopego dife tšeo di hlaolago bodumedi bja therešo?

  • Bodumedi bja therešo bo ruta therešo e tšwago Lentšung la Modimo, Beibele. (Johane 4:24; 17:17) Ga se bja thewa difilosofing tša batho.

  • Bodumedi bja therešo bo thuša batho go tseba Modimo, go akaretša le leina la gagwe la Jehofa.—Johane 17:3, 6.

  • Bodumedi bja therešo bo lebelela Mmušo wa Modimo e le kholofelo e nnoši bakeng sa batho, e sego dipušo tša batho.—Mateo 10:7; 24:14.

  • Bodumedi bja therešo bo kgothaletša lerato la go hloka boithati. (Johane 13:35) Bo ruta batho go hlompha ditšo ka moka, go diriša nako ya bona le dilo tša bona go thuša ba bangwe, gotee le go se tšee karolo dintweng tša ditšhaba.—Mika 4:1-4.

  • Go ba bodumeding bja therešo ke tsela ya bophelo, ga e fo ba setlwaedi se itšego. Ditho tša bjona di dira seo di se bolelago.—Baroma 2:21; 1 Johane 3:18.

Bagatiši ba makasine wo, e lego Dihlatse tša Jehofa, ba leka go godiša Modimo ka mantšu le ditiro tša bona. Ke ka baka la’ng o sa ye sebokeng Holong ya Mmušo gomme o iponele ka noši?