Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JUNE 2014

 THUŠO BAKENG SA LAPA | LENYALO

Kamoo le ka Dirišago Tšhelete ka Gona

Kamoo le ka Dirišago Tšhelete ka Gona

TLHOHLO

Ditatamente tša lena tša pankeng le dikoloto di bontšha gore tšhelete ya lena etšwa bjalo ka ge eka ke santa e šwahla menwaneng. Ga se kgale le nyalane gomme ga le kgone go diriša tšhelete gabotse. Na o swanetše go phara molekane wa gago ka molato? O se ke wa kitimela go dira seo! Naganang bjalo ka badirišanigotee, gomme le hlahlobe mabaka ao a ka bago a le baketše bothata bjo. *

LEBAKA LA GO DIREGA GA SEO

Diphetogo. Ge e ba o be o dula ka gae pele o tsena lenyalong, o ka no ba o thoma bophelo bja go lefelela dikoloto le bja go kopanela ditshenyagalelo. Go ka direga gore wena le molekane wa gago ga le na pono e swanago ka go diriša tšhelete. Ka mohlala, yo mongwe a ka ba a rata go reka mola yo mongwe a rata go boloka tšhelete. Go tšea nako gore banyalani ba dire diphetogo le go dumelelana tabeng ya go diriša tšhelete.

Go swana le mefoka serapeng, dikoloto tšeo di hlokomologwago di tla gola ganyenyane-ganyenyane

Go dikadika. Jim, yo ga bjale e lego rakgwebo yo a atlegilego, o dumela gore ge a be a sa tšwa go nyala, go se be le thulaganyo e botse go ile gwa dira gore a senyegelwe ke tšhelete e ntši. O re: “Ka gobane ke ile ka diega go lefelela dikoloto, nna le molekane wa ka re ile ra swanelwa ke go lefa dikete tša diranta. Ra šala re se na selo!”

Kotsi ya “tšhelete yeo o sa e bonego.” Go bonolo go diriša tšhelete e ntši ge o sa bone e etšwa ka sepatšheng. Seo se ka direga kudu ge e ba o diriša karata ya mokitlana goba ya panka le go reka ka Inthanete. Tsela e bonolo ya go adima tšhelete le yona e ka dira gore bao ba sa tšwago go nyalana ba diriše tšhelete e ntši.

Go sa šetšwe sebaki, mathata a tša ditšhelete a ka le bakela mathata a magolo lenyalong. Puku ya Fighting for Your Marriage e re: “Banyalani ba bantši ba begile gore tšhelete ke bothata bjo bogolo, go sa šetšwe gore ba na le bokae. Gantši tšhelete ke yona sebaki sa dingangišano.”

 SEO O KA SE DIRAGO

Katanelang go dirišana. Go e na le go beana molato, šomang bjalo ka badirišanigotee gore le diriše tšhelete gabotse. Mathomong a poledišano ya lena dirang kwano ya gore le ka se dumelele se se le lweša.—Molao wa motheo wa Beibele: Baefeso 4:32.

Ebang le thulaganyo ya go diriša tšhelete. Ngwalang ditshenyagalelo ka moka tša kgwedi, go sa šetšwe gore ke tše dinyenyane gakaakang. Se se tla le thuša gore le bone moo tšhelete ya lena e yago gona le go lemoga ditshenyagalelo tšeo di sego bohlokwa.

Ngwalang ditshenyagalelo tša lena tša bohlokwa, go akaretša dijo, diaparo, rente goba ntlo, go lefelela koloi le tše dingwe. Ngwalang gore tshenyagalelo e nngwe le e nngwe e ja bokae le gore ka moka mohlomongwe di tla nyaka bokae ge kgwedi e fela.—Molao wa motheo wa Beibele: Luka 14:28.

“Moadimi ke mohlanka wa moadimiši.”—Diema 22:7

Kgwedi le kgwedi beelang tšhelete ka thoko bakeng sa ditshenyagalelo tša go fapafapana (dijo, rente, peterole le tše dingwe). Ba bangwe ba dira se ka go tsenya tšhelete ka dienfelopong, go ya ka ditshenyagalelo. * Ge e ba tšhelete ya enfelopo e itšego e fedile, ba ka kgetha go kgaotša go diriša tšhelete bakeng sa selo seo goba ba tsenya tšhelete go tšwa ka enfelopong e nngwe.

Lokiša pono ya gago tabeng ya go ba le dilo. Lethabo ga le tlišwe ke go ba le dilo tša sebjalebjale. Go ba gona, Jesu o boletše gore: “Le ge motho a atetšwe ke dilo, fela bophelo bja gagwe ga bo tlišwe ke dilo tše a nago le tšona.” (Luka 12:15) Ka gona, tsela yeo o dirišago tšhelete e bontšha ge e ba o dumela mantšu ao.—Molao wa motheo wa Beibele: 1 Timotheo 6:8.

Dira diphetogo. Aaron yo a nago le nywaga e mebedi a nyetše o re: “Mathomong go ka bonagala le kgona go fihlelela dilo tša go swana le mananeo a thelebišene ao a lefelelwago le go ja ka ntle, eupša di ka baka mathata a tša ditšhelete ka morago ga nako. Re ile ra swanelwa ke go kgaotša dilo tše dingwe e le gore re phele ka seo re nago le sona.”

^ ser. 4 Le ge sehlogo se se lebišitšwe go bao ba sa tšwago go nyalana, melao ya motheo yeo e ahlaahlwago e šoma go banyalani ka moka.

^ ser. 14 Ge e ba o lefa ka karata ya panka goba ya mokitlana, ngwala pego ya tšhelete yeo o e dirišitšego gomme o e tsenye dienfelopong, go e na le gore o tsenye tšhelete.

Ithute ka mo go oketšegilego

Ke’ng Seo se Dirago Gore Bophelo bja Lapa bo Thabiše?

Jehofa ke mothomi wa lapa e bile o nea dilo tšeo di dirago gore malapa a atlege.