Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! APRIL 2014

 DINAGA LE BATHO

Go Etela Cambodia

Go Etela Cambodia

METSE yeo e phaphametšego godimo ga meetse, mabenkele ao a tletšego batho, ditarata tše di tletšego ka dithuthuthu tšeo di rwelego mehuta ka moka ya dilo go tloga ka dikgogo go ya go ditšidifatši—tše ke dilo tše o tlago go di bona le medumo yeo o tlago go e kwa dikarolong tše dingwe tša Cambodia.

Batho ba Cambodia ba tsebega ka go ba ba borutho, ba nago le bogwera le botee. Ge ba le gae, ba ka bitšana ka gore ngwanešo, kgaetšedi, rakgadi, malome, makgolo goba rakgolo—gaešita le ge ba kopana la mathomo!

Badudi ba bangwe ba Cambodia ba dula ka gare ga dintlo tša dikepe, mola ba bangwe ba dula dintlong tšeo di thekgilwego ka dikota tše di telele goba meagong e phaphametšego godimo ga meetse. Gape go na mafelo a go tšhela peterole le meago ya dikolo, ya dikliniki le ya mabenkele yeo e phaphametšego godimo ga meetse

Seenywa sa dragon se tlwaelegile kua Cambodia

Reise ke sejo sa mmamoratwa sa batho ba Cambodia. Sejo se se tlwaelegilego se tla ba le mehuta e meraro goba e mene ya dijo, go akaretša le sopo. Hlapi e ratwa kudu. Go tlwaelegile gore dijo tše nago le swikiri, tše galakago le tše nago le letswai di jewe ka nako e tee.

Mo e ka bago nywaga e dikete tše pedi e fetilego, babapatši ba tšwago India le basepedi ba bodumedi ge ba be ba eya China ba ile ba thoma go feta lebopong la  Cambodia gomme ba be ba ananya silika le tšhipi ka dinoko, dikwata tše nkgago bose, manaka a tlou le gauta. Ge nako e dutše e eya, batho ba Cambodia ba ile ba thoma go tlwaela mekgwa e itšego ya India le China, ka baka leo bodumedi bja Mahindu le bja Mabuddha bo ile bja ata. Lehono, badudi ba fetago 90 lekgolong ke Mabuddha.

Dihlatse tša Jehofa di botša batho molaetša o nago le kholofelo wa Beibele kua Cambodia. Di thušitše batho ba bantši di diriša puku ya Ke Eng Seo ge e le Gabotse Beibele e se Rutago? E hwetšagala ka maleme ao e ka bago a 250, go akaretša le leleme la Cambodia.

Batho ba fetago 1 500 kua Cambodia ba ithuta Beibele le Dihlatse tša Jehofa le gona ba hwetša dikarabo tša dipotšišo tše bjalo ka e rego: “Bahu ba kae?” le ya “Morero wa Modimo ka lefase ke ofe?”

Puku ya Ke Eng Seo ge e le Gabotse Beibele e se Rutago?, yeo e gatišitšwego ke Dihlatse tša Jehofa, e a hwetšagala ka leleme la Cambodia (ka ge go bontšhitšwe mo).