Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! APRIL 2014

 THUŠO BAKENG SA LAPA | BAFSA

Kamoo o ka Amogelago Phošollo

Kamoo o ka Amogelago Phošollo

TLHOHLO

“Ge motho yo mongwe a go phošolla, ge e le gabotse o go botša gore go na le selo seo o sa se dirego gabotse. Le gona, ga se ka kwa motho le ge e le ofe a re, ‘Ke rata go botšwa gore ga ke dire dilo gabotse!’”—Amy, 17. *

Motho yo a hlokomologago phošollo o swana le mootledi wa sefofane yo a sa elego hloko ditaelo tša gore a otlele bjang. Ditlamorago e ka ba tše kotsi.

Na o thatafalelwa ke go amogela ge o phošollwa ke batswadi ba gago, barutiši le batho ba bangwe ba bagolo? Ge e ba go le bjalo, sehlogo se se tla go thuša.

SEO O SWANETŠEGO GO SE TSEBA

Batho ka moka ba nyaka go phošollwa.

“Ka moka ga rena re kgopša gantši.”—Jakobo 3:2.

“Ga se wa swanela go lewa ke dihlong ge o phošollwa.” —Jessica.

Go phošollwa ga go bolele gore o a palelwa.

“Jehofa * o kgalema yo a mo ratago, go etša ge tate a kgalema morwa wa gagwe yo a mo ratago.”—Diema 3:12.

“Ge batho ba mphošolla, ke leka go nagana kamoo go swanetšego go ba go bile thata gore ba dire seo le kamoo ba nthatago ka gona gore ba nkeletše.”—Tamara.

Phošollo e ka go thuša gore o be motho yo kaone.

‘Theetša tayo gomme o hlalefe.’—Diema 8:33.

“Phošollo e bohlokwa e le gore motho a gole. E go thuša gore o kgone go bona kamoo batho ba go lebelelago ka gona le go go thuša go laola mekgwa e mebe yeo o ka bago o sa lemoge gore o thomile go ba le yona.”—Deanne.

 SEO O KA SE DIRAGO

Leka go ba le monagano o bulegilego. O ka lekega go ikemela ge o phošollwa. Eupša leka go phaela ka thoko maikwelo a gago. E le go go thuša go dira seo, lebala ganyenyane ka boemo bjoo gomme o nagane o nea phošollo e swanago go motho yo mongwe—mohlomongwe moratho wa gago. Na ga bjale o kgona go bona bohlokwa bja keletšo yeo? Ga bjale boela boemong bjola gomme o leke go lebelela dilo ka tsela e swanago.—Molao wa motheo wa Beibele: Mmoledi 7:9.

“Ka dinako tše dingwe o ka nyamišwa ke phošollo moo o ka lebalago gore motho yoo o be a leka go go thuša gore o be motho yo kaone, e sego go go kweša bohloko.”—Theresa.

Dula o ikokobeditše. O se ke wa dumelela boikgantšho bo go thibela gore o se amogele phošollo. Ka lehlakoreng le lengwe, o se ke wa dumelela manyami a go imela ka ge go na le moo o swanetšego go šomela gona. Boikokobetšo bo tla go thuša gore o pheme dilo tšeo. Gopola: Phošollo yeo e kwešago bohloko kudu e ka no ba yeo o tlogago o e hloka kudu. Ge e ba o e gana ka mabaka le ge e le afe, o tla be o lahlegetšwe ke sebaka se bohlokwa sa gore o gole.—Molao wa motheo wa Beibele: Diema 16:18.

Phošollo yeo e kwešago bohloko kudu e ka no ba yeo o tlogago o e hloka kudu

“Go amogela phošollo ke karolo e bohlokwa ya go gola. Re ka se holege ge e ba re sa amogele phošollo yeo re e newago, re ka ba ra ikweša bohloko ka borena.”—Lena.

Leboga. Gaešita le ge o thatafalelwa ke go amogela phošollo, ke ka baka la’ng o sa leboge motho yo a go neilego yona? Ga go pelaelo gore motho yoo o go kganyogela tše dibotse le gore o nyaka gore o atlege e le ruri.—Molao wa motheo wa Beibele: Psalme 141:5.

“O tla be o sa dire phošo ge o ka re, Ke a leboga,’ kudukudu ge e ba go be go nyakega gore o newe keletšo yeo. Le ge e ba go be go sa nyakege, o ka bontšha botho le go leboga motho yoo ka maiteko ao a a dirilego a go go batamela.”—Carla.

^ ser. 4 Maina a mangwe sehlogong se a fetotšwe.

^ ser. 11 Jehofa ke leina la Modimo bjalo ka ge le utolotšwe ka Beibeleng.