Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! MARCH 2014

Megokgo ya Gago Yeo e Makatšago

Megokgo ya Gago Yeo e Makatšago

RE THOMA go lla ka letšatši leo re belegwago ka lona. Setsebi se sengwe se hlalosa gore bjalo ka bana, go lla go fetogile “tsela yeo re hlalosago seo re se nyakago” ka gobane re a lla e le gore dinyakwa tša rena tša maikwelo le tša nama di kgotsofatšwe. Eupša ke ka baka la’ng re lla le ge re godile, mola re ka kgona go bolela ka ditsela tše dingwe?

Re ka lla ka mabaka a go fapafapana. Re ka lla ka baka la go nyama, kgakanego goba go tlaišega mmeleng goba monaganong. Eupša lethabo, kimologo le go fihlelela se sengwe le tšona di ka dira gore motho a ntšhe megokgo, e lego megokgo ya lethabo. Motho yo a llago a ka lliša ba bangwe. María o re: “Ge ke bona motho yo mongwe a lla—go ša šetšwe gore o llišwa ke eng—ga ke kgone go itshwara ge e se gore le nna ke lle.” Mohlomongwe maemo a boikgopolelo filiming goba pukung a ile a dira gore le wena o lle.

Go sa šetšwe lebaka, go lla ke tsela e matla ya go bolela mola motho a sa ntšhe mantšu. Puku ya Adult Crying e hlalosa gore: “Go na le ditsela tše dingwe tše sego kae tšeo go ka bolelwago mo gontši ka boripana feela.” Megokgo e dira gore batho ba arabele. Ka mohlala, ba bantši ba rena ba hwetša go se bonolo go hlokomologa megokgo ya manyami ka gobane e re lemoša gore motho o a tlaišega. Ka baka leo, re ka leka go homotša goba go thuša motho yo a llago.

Ditsebi tše dingwe di dumela gore go lla go re thuša maikwelong gomme go tlwaela go thibela sello go ka gobatša maemo a rena a tša maphelo. Ba bangwe ba ganetša taba ya gore go lla go re thuša mmeleng le monaganong ka ge go se gwa kgonthišetšwa ke thutamahlale. Lega go le bjalo, dinyakišišo di šišinya gore 85 lekgolong ya basadi le 73 lekgolong ya banna ba begile gore ba ikwa ba le kaone ka morago ga go lla. Noemí o hlalosa gore: “Ka dinako tše dingwe, ke a kwa gore ke swanetše go lla. Ka morago ga moo ke buša moya gomme ka bona dilo gabotse, ka tsela ya kgonthe.”

Dinyakišišo di šišinya gore 85 lekgolong ya basadi le 73 lekgolong ya banna ba begile gore ba ikwa ba le kaone ka morago ga go lla

Eupša maikwelo a bjalo a go imologa a ka  fo se tlišwe feela ke go ntšha megokgo. Tsela yeo ba bangwe ba arabelago ka yona ge re lla le yona e kgatha tema e bohlokwa. Ka mohlala, ge megokgo ya rena e dira gore ba bangwe ba re homotše goba ba re thuše, re ikwa re imologile. Eupša ge e ba ba sa arabele gabotse ge re lla, re ka ikwa re lewa ke dihlong goba re hlokomologilwe.

Go molaleng gore go lla go a makatša. Seo re se tsebago ke gore go lla ke e nngwe ya ditsela tše di kgahlišago tšeo Modimo a re filego tšona gore re ntšhe maikwelo.