Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! MARCH 2014

 DINAGA LE BATHO

Go Etela El Salvador

Go Etela El Salvador

MO E ka bago nywaga e 500 e fetilego, ge Masepania a goroga nageng yeo ga bjale e bitšwago El Salvador, go be go na le setšhaba seo se theilego lefelo la sona gore ke Cuscatlán—leina leo le bolelago seo go thwego ke Naga ya Mabenyabje. Lehono, bontši bja batho bao ba dulago El Salvador ke ditlogolwana tša ditšhaba tša naga yeo le batho bao ba tšwago Yuropa.

Badudi ba El Salvador ba tsebja ka go ba mafolofolo le go ba le bogwera. E bile ba na le šedi le go ba le tlhompho. Ba dumedišana pele ba thoma poledišano goba ge ba tsena lefelong la kgwebo ka gore, “Buenos días” (le tsogile bjang?) goba “Buenas tardes” (le hlwele bjang?). Ge e le gabotse, badudi ba El Salvador ba magaeng le ba ditoropong tše dinyenyane ba lebelela go fo feta batho o sa ba dumediše e le go hloka mekgwa.

Go lengwa ga kofi go bile le tutuetšo e kgolo historing ya El Salvador

Mohuta o mongwe wa dijo woo badudi ba El Salvador ba o thabelago kudu ke pupusa—bogobe (goba reise) bja tortilla bjo bo tsentšwego tšhese le dinawa, gotee le nama ya kolobe goba tše dingwe. Di-pupusa gantši di jewa ka tamatisoso le curtido—motswako wa khabetšhe, dikherote, dieie gotee le binika e nago le dinoko. Gaešita le ge batho ba bangwe ba diriša thipa le foroko ge ba e ja, tsela ya setšo ya go ja di-pupusa ke ka diatla.

Pupusa ke mohuta wa dijo tšeo badudi ba El Salvador ba di tlwaetšego kudu

Diphororo tša Los Tercios, Suchitoto

 NA O BE O TSEBA? El Salvador e be e dutše e bitšwa naga ya dithabamollo. Go na le dithabamollo tše ka godimo ga tše 20, tšeo tše dingwe tša tšona di sa dutšego di thuthupa. Diphororo tša Los Tercios di elela godimo ga maswika a dikhutlo tše tshela ao a bakilwego ke go thuthupa ga thabamollo.

Go na le Dihlatse tša Jehofa tše ka godimo ga tše 38 000 kua El Salvador, gomme di rulagantšwe ka diphuthego tše ka bago tše 700. Di ruta batho ba ka bago 43 000 Beibele ka Sepania, Seisemane le ka Polelo ya Diatla ya El Salvado.