Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! FEBRUARY 2014

 NA LE HLAMILWE?

Lebone la Senakangwedi Seo se Bitšwago Photuris

Lebone la Senakangwedi Seo se Bitšwago Photuris

LEBONE, goba setho seo se nago le seetša, sa senakangwedi seo se bitšwago Photuris se dikologilwe ke dikgapetla tša go hlatlagana tšeo di oketšago seetša se se phadimago seo khunkhwane ye e se tšweletšago. *

Dikgapetla tša go hlatlagana

Ela Hloko: Banyakišiši ba hweditše gore dikgapetla tše dinyenyane tše di lego karolong yeo e bonegago ya dinakangwedi tše dingwe, di ka sebopego sa go hlatlagana go swana le dithaele tšeo go ruletšwego ka tšona. Dikgapetla di kobegela godimo ka mafelelong a lehlakore le tee ka botelele bja di-micrometer tše tharo feela, e lego tekanyo e nyenyane kudu ge e bapetšwa le bokoto bja moriri wa motho. Eupša go kobega ga tšona go dira gore lebone la senakangwedi le phadime mo e ka bago 50 lekgolong go feta ge nkabe dikgapetla tša sona di be di sa kobega!

Na se se ka kaonefatša seetša sa mabone a di-LED, ao a šomišwago go didirišwa tša elektroniki? Go re borathutamahlale ba tsebe seo, ba ile ba dira mabone ao go swana le kamoo dikgapetla tša lebone la senakangwedi di lego ka gona. Mafelelo e bile afe? Mabone ao a ile a dira seetša se se oketšegilego go fihla go 55 lekgolong! Rathutamahlale Annick Bay o re: “Selo se bohlokwa seo re se hweditšego nyakišišong ye ke gore go na le dilo tše dintši tšeo re ka ithutago tšona ka go hlahlobišiša tlhago.”

O nagana eng? Na lebone la dinakangwedi tšeo di bitšwago Photuris le bile gona ka tlhagelelo? Goba na le hlamilwe?

^ ser. 3 Borathutamahlale ga se ba tšwa ba ithuta mehuta ka moka ya dikhunkhwane tše tša dinakangwedi.