Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! FEBRUARY 2014

 POLEDIŠANO | HANS KRISTIAN KOTLAR

Setsebi sa Thekinolotši ya tša Thutaphedi se Hlalosa Tumelo ya Sona

Setsebi sa Thekinolotši ya tša Thutaphedi se Hlalosa Tumelo ya Sona

Ka 1978, mošomo wa mathomo wa Ngaka Hans Kristian Kotlar wa go dira nyakišišo go tša thutamahlale o be o le kua Sepetleleng sa Norway sa Radium, moo a bego a ithuta ka kankere le tshepedišo ya motho ya go lwantšha malwetši. Ka yona nako yeo, o be a kgahlegela go tseba ka mathomo a bophelo. Phafoga! e mmotšišitše ka nyakišišo ya gagwe le tumelo ya gagwe.

Ke eng seo se dirilego gore o nyake go tseba ka mathomo a bophelo le morero wa bjona?

Tate e be e le Mokhatolika gomme mma e le Moprotestanta. Seo se bolela gore ba be ba sa lebelele bodumedi e le selo se bohlokwa. Ge ke be ke sa le mahlalagading ke be ke ipotšiša ka morero wa bophelo, gomme ke ile ka bala dipuku tša Bobuddha, Bohindu le Bomoseleme. Ke ile ka ba ka kgopela Modimo gore a nkutollele therešo.

Ka bo-1970, thutaphedi ya dimolekule e be e dirile tšwelopele e makatšago gomme ke be ke ipotšiša ge e ba e ka utolla gore bophelo bo thomile bjang. Ditshepedišo tša disele tše di phelago di be di nkgahla, ka gona ke ile ka kgetha go ithutela thekinolotši ya tša thutaphedi. Ka lehlakoreng le lengwe, bontši bja baprofesara ba be ba re bophelo bo bile gona ka mesepelo ya tlhago, gomme ke ile ka ba dumela.

Ke ka baka la eng o ile wa kgahlegela Beibele?

Banna ba babedi ba Dihlatse tša Jehofa ba ile ba re etela ka gae. Gaešita le ge ba be ba le botho, ga se ka ba swara gabotse gomme ke ile ka ba botša gore ke be ke sa kgahlegele seo ba se bolelago. Mosadi wa ka o be a theeditše. O ile a re: “Hans Kristian, yeo e be e se tsela e botse ya go boledišana le batho. Ka mehla o be o dutše o nyaka go tseba ka morero wa bophelo.” O be a nepile, gomme ke ile ka ikwa ke lewa ke dihlong. Ka gona ke ile ka šala Dihlatse tšeo morago. Poledišanong ya rena, ke ile ka ba botšiša ge e ba Beibele e dumelelana le thutamahlale.

Ba ile ba arabela bjang?

Ba ile ba mpontšha seo Beibele e se bolelago ka Mothopo wa matla ao a bonagalago legohleng. Lengwalo leo ba le badilego le re: “Emišetšang mahlo a lena godimo le bone. Ke mang yo a hlodilego dilo tše? . . . Ka baka la boati bja matla a magolo, e bile e le yo matla kudu, ga go le e tee ya tšona yeo e hlaelago.” * Mantšu ao a ile a nkgoma pelo. Le gona, go a kwagala  gore ke Mmopi yo bohlale feela yo a ka rulaganyago legohle ka tsela ye.

Na pono ya gago mabapi le tlhagelelo e ile ya fetoga?

Ganyenyane-ganyenyane ke ile ka lemoga gore dithuto tše di fapafapanego tša tlhagelelo di be di se na bohlatse bja thutamahlale. Ge e le gabotse, e fo ba dinonwane tšeo go itlhametšwego tšona bakeng sa go hlalosa kamoo dilo tšeo di hlamilwego ka tsela e makatšago tšeo di hwetšwago dilong tše di phelago tše bjalo ka tshepedišo ya go lwantšha malwetši, di ka fo go ba gona ka go itiragalela. Ge ke dutše ke ithuta ka mo go oketšegilego ka tshepedišo ya go lwantšha malwetši, ke moo ke ilego ka lemoga kamoo e raraganego le kamoo e lego bohlokwa ka gona. Ka go re’alo, nyakišišo ya ka e ile ya dira gore ke phethe ka gore bophelo bo tšweleditšwe ke Mmopi yo bohlale.

Nyakišišo ya ka e ile ya dira gore ke phethe ka gore bophelo bo tšweleditšwe ke Mmopi yo bohlale

Na o ka re nea bohlatse bja gore dilo di hlamilwe?

Ge e le gabotse tshepedišo ya go lwantšha malwetši e bopša ke dilo tše dintši tše di makatšago tšeo di hlametšwego go re šireletša malwetšing a mehutahuta, go akaretša dipaketheria le ditwatši. Ka gona dilo tše mafelelong di ka kopanywa gore di bope dihlopha tše pedi tšeo di šomišanago. Sehlopha sa pele se rulaganya ka diiri tše sego kae gore se hlasele ditwatši tšeo di tšwelelago. Sehlopha sa bobedi se tšea matšatši a mmalwa go ka hlasela eupša ge se hlasela se swana le mosebe wo o lebantšego thwii. Gape sehlopha se sa bobedi ga se lebale, moo e lego gore ge paketheria e itšego e ka hlasela gape nywaga ka morago, lenaba le tla hlaselwa le semeetseng. Tshepedišo ye e šoma ka bokgwari moo e lego gore gantši o ka se lemoge gore o ile wa hlaselwa ke bolwetši bjo itšego le gore e ile ya go šireletša ka katlego. Selo se sengwe gape se se makatšago ke tsela yeo tshepedišo ya motho ya go lwantšha malwetši e kgonago go kgethologanya magareng ga disele dišele le mehuta ya disele tše makgolo tšeo di lego mebeleng ya rena.

Re botše gore go direga eng ge sephedi se senyenyane se tsena mebeleng ya rena?

Diphedi tše dinyenyane di tsena mebeleng ya rena ge re hema, ge re e ja, ka ditho tša rena tša pelego goba ka go tsena letlalong la rena. Ge tshepedišo ya rena ya go lwantšha malwetši e lemoga gore go na le dilo tšeo di šwahlelago, e lokišeletša lelokelelo la diprotheine tšeo di hlamilwego gabotse bakeng sa go hlasela. Karolo e nngwe le e nngwe lelokelelong e tutuetša e nngwe gore e hlasele. Ruri mogato wo o tloga o makatša!

Na re ka bolela gore tsebo ya gago ka thutamahlale e matlafaditše tumelo ya gago go Modimo?

Ruri go bjalo! Matla ao tshepedišo ya rena ya go lwantšha malwetši e nago le ona gotee le go raragana ga yona di bontšha gore go na le Mmopi yo bohlale le yo lerato. Nka oketša ka gore thutamahlale e matlafaditše tumelo ya ka ka Beibele. Ka mohlala, Diema 17:22 e re botša gore “pelo e thabilego e etša sehlare se se fodišago.” Banyakišiši ba hweditše gore boemo bja rena bja monagano bo ka tutuetša tshepedišo ya rena ya go lwantšha malwetši. Ka mohlala, kgateletšego e ka fokodiša tshepedišo ya rena ya go lwantšha malwetši.

Dithaka tša gago tše dintši ga di dumele go Modimo. Lebaka ke eng?

Mabaka a fapafapane. Go swana le nna mathomong, ba bangwe ba fo dumela seo ba se rutilwego. Mohlomongwe ba nagana gore thutamahlale e na le bohlatse bjo bo tiilego bja go thekga tlhagelelo. Ba bangwe ga ba itshwenye gakaalo ka taba ya gore bophelo bo thomile bjang. Seo se a nyamiša. Ke nagana gore ba swanetše go botšiša dipotšišo tše di oketšegilego.

Ke ka baka la eng o ile wa ba yo mongwe wa Dihlatse tša Jehofa?

Ke kgahlilwe ke mokgwa wa bona wa go amogela baeng le go dumela ga bona kholofetšong ya Mmopi ya bokamoso bjo bokaone. * Le gona tumelo yeo e theilwe dinyakišišong le mabakeng a kwagalago, e sego dinonwaneng goba dikakanyetšong. *