Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  February 2014

 PONO YA BEIBELE

Go Dirišana le Meoya

Go Dirišana le Meoya

Na ke phošo go leka go boledišana le bahu?

‘Le se ke la ya go bao ba dirišanago le meoya e mebe e le gore ba se ke ba le šilafatša.’Lefitiko 19:31.

SEO BATHO BA SE BOLELAGO

Go a kwagala gore batho ba nyake go kgonthišetšwa gore moratiwa wa bona yo a hwilego ga a tlaišege. Ka gona ba re: “Ke ka baka la’ng re sa leke go ikgokaganya le yena ka go dirišana le meoya goba ka bonoge? Mohlomongwe senoge se ka re thuša go amogela boemo ka tsela e itšego le go re nea khutšo ya monagano.”

SEO BEIBELE E SE BOLELAGO

Beibele e bolela ka mo go kwagalago mabapi le taba ya gore ba phelago ba leke go ikgokaganya le bahu, e lego mokgwa woo o bego o tlwaelegile mehleng ya bogologolo. Ka mohlala, Molao wa Jehofa Modimo wo a bego a o ngwaletše Baisiraele o be o re: “Go wena go se ke gwa hwetšwa motho yo a . . . dirišanago le meoya e mebe goba . . . yo a botšišago dilo bahung. Ka gobane motho yo mongwe le yo mongwe yo a dirago dilo tše ke selo se se šišimišago go Jehofa.” (Doiteronomio 18:10-12) Beibele gape e bolela gore bao ba dirišanago le meoya ka tsela le ge e le efe “ba ka se je bohwa bja Mmušo wa Modimo.”—Bagalatia 5:19-21.

 Na bahu ba ka tutuetša bao ba phelago?

“Bao ba phelago ba a tseba gore ba tlo hwa; eupša ge e le bahu ga ba tsebe selo le gatee.”Mmoledi 9:5.

SEO BATHO BA SE BOLELAGO

Ba bangwe ba bolela gore bahu ba tšwela pele ba phela ka sebopego se itšego. Ka baka leo, ba ka leka go boledišana le bahu, mohlomongwe e le gore ba hwetše tsebišo goba go latša bahu ka kholofelo ya gore bahu ba tla ba tlogela ka khutšo.

SEO BEIBELE E SE BOLELAGO

“Bao ba phelago ba a tseba gore ba tlo hwa; eupša ge e le bahu ga ba tsebe selo le gatee. . . . Lerato la bona, lehloyo la bona le lehufa la bona [tšeo ba bego ba na le tšona ge ba sa phela] di fedile.” (Mmoledi 9:5, 6) Ee, Beibele e ruta gore bahu ba ka yona tsela yeo—ba hwile! Ga ba kgone go nagana, go dira selo se itšego goba gaešita le go rapela Modimo. Psalme 115:17 e re: “Bahu bona ga ba tumiše [Modimo], e bile le ge e le mang yo a theogelago mo go homotšego, ga a mo tumiše.”

Na ka dinako tše dingwe bao ba dirišanago le meoya e mebe ba bolela therešo?

“Na [batho] ba ba phelago ba swanetše go botšiša ba ba hwilego?”Jesaya 8:19.

SEO BATHO BA SE BOLELAGO

Ba bangwe ba bolela gore bao ba dirišanago le meoya e mebe ba kgona go tšweletša tsebišo yeo e ka bago e tsebja ke bahu le ba malapa a gabo bona goba bagwera ba bona.

SEO BEIBELE E SE BOLELAGO

Kgaolo 28 ya puku ya Samuele wa Pele e anega kamoo kgoši e sa botegego yeo e bitšwago Saulo e ilego ya roba molao wa Modimo wa go se ikopanye le bao ba dirišanago le meoya e mebe. E ile ya ya go sedupe, mosadi yo go bego go bonagala eka o bolela le monna wa Modimo yo a hwilego, e lego Samuele! Eupša na ge e le gabotse o be a bolela le Samuele? Aowa! Ge e le gabotse, o be a bolela le moikgakanyi—motho yo a bego a itira eka ke mohu Samuele.

Moikgakanyi yoo e be e le moya o kgopo, motseta wa “tatago maaka” e lego Sathane. (Johane 8:44) Ke ka baka la’ng meoya e kgopo, goba batemona, e godiša kgopolo ya gore bahu ba a phela? Morero wa yona ke go senya Modimo leina le go hlompholla Lentšu la gagwe leo le ngwadilwego, e lego Beibele.—2 Timotheo 3:16.

Na seo se sa tšwago go bolelwa se ra gore bahu ga ba na kholofelo? Ga go bjalo le gatee! Beibele e holofetša gore go tla ba le tsogo ya nakong e tlago bakeng sa bao go ka thwego ba “robetše” lebitleng. * (Johane 11:11-13; Ditiro 24:15) Re sa dutše re letile, re kgodišegile gore baratiwa ba rena bao ba hwilego ga ba tlaišege ka tsela le ge e le efe.

^ ser. 16 Kgaolo 7 ya puku ya Ke Eng Seo ge e le Gabotse Beibele e se Rutago? e na le sehlogo se se rego, “Kholofelo ya Kgonthe Bakeng sa Baratiwa ba Gago ba ba Hwilego.”

Ithute ka mo go oketšegilego

DIPOTŠIŠO TŠA BEIBELE DI A ARABJA

Na Diabolo a ka Kgona go Laola Batho?

Diabolo o tutuetša batho bjang le gona o ka phema bjang melaba ya gagwe?