Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JANUARY 2014

 THUŠO BAKENG SA LAPA | BAFSA

Kamoo o ka Fenyago Kgateletšo ya Dithaka

Kamoo o ka Fenyago Kgateletšo ya Dithaka

TLHOHLO

“Ge ke be ke sa le sekolong sa magareng ke be ke sa amogelwe ke bana ba bangwe ba bantši, gomme seo se be se nkweša bohloko. Ka gona, ge ke be ke thoma sekolong se se phagamego, ke ile ka fetoša ponagalo ya ka le mekgwa ya ka—gomme seo ga se sa kaonefatša dilo. Ke be ke tloga ke nyaka go ba le bagwera moo e lego gore ke ile ka ineela kgateletšong ya dithaka, e le feela gore ke amogelwe ke bao ke bego ke tsena le bona sekolo.”—Jennifer, wa nywaga e 16. *

Na o lebeletšane le kgateletšo ya dithaka? Ge e ba go le bjalo, sehlogo se se tla go thuša gore o kgone go lebeletšana le yona.

Ge e ba o ineela kgateletšong ya dithaka, o fetoga roboto yeo e se nago monagano ka gobane o dumelela batho ba bangwe gore ba go laole. Ke ka baka la’ng o ba dumelela gore ba go laole ka tsela yeo?—Baroma 6:16.

SEO O SWANETŠEGO GO SE TSEBA

Kgateletšo ya dithaka e ka dira gore batho ba lokilego ba dire dilo tše mpe.

“Ditlwaelano tše mpe di senya mekgwa e holago.”—1 Bakorinthe 15:33.

“Go bjalo ka ge eka re a tseba gore tsela e itšego e fošagetše, eupša ge re lebeletšane le boemo bjoo, re tšewa ke maikwelo gomme ra nyaka go kgahla batho ba bangwe!”—Dana.

Kgateletšo ya dithaka ga e fo ba kgateletšo yeo o e hwetšago go dithaka tša gago feela.

“Ge ke kganyoga go dira se se lokilego, se sebe se gona go nna.”—Baroma 7:21.

“Gantši kgateletšo yeo ke ekwago e tšwa go nna; ruri, ke nna ke kganyogago dilo tšeo dithaka tša ka di bolelago ka tšona le tšeo di dirago gore di bonagale eka di kgahliša kudu.”—Diana.

Go lebeletšana le kgateletšo ya dithaka ke selo seo o ka se kgonago seo o ka ikgantšhago ka sona.

“Ebang le letswalo le lebotse.”—1 Petro 3:16.

“Go na le nako yeo ke bego ke thatafalelwa ke go lebeletšana le kgateletšo ya dithaka, eupša ga bjale ga ke tšhabe go ba yo a fapanego gomme ke ema ke tiile diphethong tša ka. Ga go na selo seo se phalago gore o robale ka letswalo le le hlwekilego.”—Carla.

 SEO O KA SE DIRAGO

Ge o lebeletšane le kgateletšo ya dithaka ya gore o dire se se fošagetšego, leka dilo tše di latelago:

Nagana ka ditlamorago. Ipotšiše gore, ‘Go thwe’ng ge e ba ke ineela kgateletšong ke moka ka swarwa? Batswadi ba ka ba tla ntšea bjang? Nna ke tla itšea bjang?’—Molao wa motheo wa Beibele: Bagalatia 6:7.

“Batswadi ba ka ba mpotšiša dipotšišo tše bjalo ka e rego, ‘Go be go tla direga’ng ka wena ge o be o ka ineela?’ Ba nthuša gore ke bone kamoo kgateletšo ya dithaka e ka nkwetšago tseleng e fošagetšego.”—Olivia.

Matlafatša kgodišego ya gago. Ipotšiše gore, ‘Ke ka baka la’ng ke dumela gore tsela ye e ka gobatša nna goba ba bangwe?’—Molao wa motheo wa Beibele: Baheberu 5:14.

“Ge ke be ke sa le ngwana, ke be ke fo gana goba ke arabe ka boripana, eupša ga bjale ke kgona go hlalosa gabotse lebaka leo ka lona ke tla dirago goba nka se dirego selo se itšego. Ke kgodišegile ka ditumelo tša ka mabapi le se se lokilego le se se fošagetšego. Ke a ikarabela—ga ke arabelwe ke motho yo mongwe.”—Anita.

Nagana ka seo o lego sona. Ipotšiše gore, ‘Ke nyaka go ba motho wa mohuta mang?’ Ke moka o nagane ka kgateletšo yeo o lebeletšanego le yona gomme o ipotšiše gore, ‘Motho wa mohuta woo o be a tla dira’ng boemong bjo?’—Molao wa motheo wa Beibele: 2 Bakorinthe 13:5.

“Ke kgotsofetše ka seo ke lego sona, ka gona ga ke tshwenyege kudu ka seo ba bangwe ba se naganago ka nna. Ka ntle le moo, batho ba bantši ba rata go ba le motho yoo ke tlogago ke le yena.”—Alicia.

Naganela pele. Ge e ba e le gore o sa le sekolong, nywageng e sego kae goba dikgweding tše sego kae—batho bona bao o lekago go ba kgahla ba ka no se sa ba gona bophelong bja gago.

“Ke ile ka lebelela seswantšho sa ge ke be ke sa tsena sekolo gomme ke be ke se sa gopola le maina a ba bangwe bao ke bego ke tsena le bona ka klaseng. Eupša ge ke be ke sa tsena sekolo le bona, ke be ke tšeela godimo dikgopolo tša bona go e na le go botegela ditumelo tša ka. Ruri seo e be e le bošilo!”—Dawn, yo ga bjale a nago le nywaga e 22.

Lokišeletša boemo. Beibele e re: “Le tsebe kamoo le swanetšego go araba yo mongwe le yo mongwe ka gona.”—Bakolose 4:6.

“Batswadi ba ka ba thuša nna le ngwanešo gore re nagane ka maemo ao a ka tšwelelago, ke moka re a a diragatša e le gore ge re lebeletšana le boemo bja kgonthe, re tsebe seo re ka se dirago.”—Christine.

^ ser. 4 Maina a mangwe sehlogong se a fetotšwe.

Ithute ka mo go oketšegilego

Nka Ganetša Diteko Bjang?

Ithute ka megato e šomago yeo o ka e gatago go fokotša goba go fediša kgateletšo.

Go Thwe’ng ge e ba ke Gatelelwa go ba le Thobalano?

Na go ineela go na le mohola? Na o tla itshola?