Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! DECEMBER 2013

 PONO YA BEIBELE

Jesu

Jesu

Na Jesu ke Modimo?

“Ga go motho yo a kilego a bona Modimo ka nako le ge e le efe.”—Johane 1:18.

SEO BATHO BA SE BOLELAGO

Batho ba bantši ba dumela gore Jesu ga se Modimo. Lega go le bjalo, ba bangwe ba šupa go ditemana tša Beibele tšeo ba naganago gore di bontšha gore Jesu o lekana le Modimo.

SEO BEIBELE E SE BOLELAGO

Beibele ga e hlalose Jesu e le Modimo Ramatlaohle goba gore o lekana le Modimo. Ka mo go fapanego, e ruta gabotse gore Jesu o fetwa ke Modimo. Ka mohlala, Beibele e bega mantšu a Jesu ka noši a rego: “Tate o mpheta ka bogolo.” (Johane 14:28) Beibele gape e re: “Ga go motho yo a kilego a bona Modimo ka nako le ge e le efe.” (Johane 1:18) Jesu e ka se be Modimo ka gobane ge e le gabotse batho ba bantši ba ile ba bona Jesu.

Balatedi ba pele ba Jesu ga se ba bolela gore Jesu e be e le Modimo. Ka mohlala, mongwadi wa Ebangedi e lego Johane o boletše mabapi le dilo tšeo a di begilego ka gore: “Tše di ngwadilwe gore le dumele gore Jesu ke Kriste Morwa wa Modimo.”Johane 20:31. *

 Jesu o belegwe neng?

“Go be go. . . na le badiši bao ba bego ba dula merakeng ba dišitše mehlape ya bona bošego.”—Luka 2:8.

SEO BATHO BA SE BOLELAGO

Batho ba bangwe ba keteka Keresemose ka December 25—yeo ba bangwe ba naganago gore ke letšatši la matswalo a Jesu. Ba bangwe ba keteka matswalo a Jesu mathomong a January.

SEO BEIBELE E SE BOLELAGO

Beibele ga e bolele letšatši leo Jesu a belegwego ka lona. Go e na le moo, e bolela gore nakong ya go belegwa ga Jesu, “go be go . . . na le badiši bao ba bego ba dula merakeng ba dišitše mehlape ya bona bošego.” (Luka 2:8) Ga go bonagale badiši bao ba be ba ka leta mehlape ya bona ka ntle bošego nakong ya December le January. Ka baka la’ng?

Lefelo leo Jesu a belegetšwego go lona le tonya kudu nakong ya December le January. Beibele e bega gore nakong yeo ya ngwaga, batho ba be ba “thothomela . . . ka baka la go na ga pula.” (Esera 10:9, 13; Jeremia 36:22) Yeo e be e ka se be nako ya ngwaga yeo badiši ba bego ba ka “dula merakeng” le mehlape ya bona.

Na ruri Jesu o ile a boela a phela ka morago ga gore a hwe?

“Modimo o mo [Jesu] tsošitše bahung.”—Ditiro 3:15.

SEO BATHO BA SE BOLELAGO

Batho ba bangwe ba dumela gore ga go kgonege gore go ile gwa ba le motho yo a ilego a boela a phela ka morago ga gore a hwe, go akaretša le Jesu.

SEO BEIBELE E SE BOLELAGO

Jesu o boditše balatedi ba gagwe gore o be a tla “[tlaišwa] ka dilo tše dintši, . . . a bolawe ke moka letšatšing la boraro a tsošwe.” (Mateo 16:21) Beibele e bega gore ka morago ga gore a bolawe le go tsošwa, Jesu o ile a iponagatša go batho ba ka godimo ga ba 500. (1 Bakorinthe 15:6) Ga go pelaelo gore dihlatse tšeo tše di bonego ka mahlo di be di kgodišegile gore o be a tsošitšwe bahung. Le tšona di be di ikemišeditše go hwela tumelo yeo!—Ditiro 7:51-60; 12:1, 2.

LEBAKA LEO KA LONA GO TSEBA SEO GO LEGO BOHLOKWA

Beibele e ruta gore lehu la Jesu le tsogo ya gagwe di buletše batho ka moka tsela ya gore ba holwe ke lefase la Paradeise leo le holofeditšwego ka Beibeleng. (Psalme 37:11, 29; Kutollo 21:3, 4) Re na le tebelelo ya go thabela bophelo bjo bo thabišago bjo bo sa felego lefaseng leo la Paradeise, ka baka la lerato leo le bontšhitšwego ke Jesu le Tatagwe, Modimo Ramatlaohle, e lego Jehofa.—Johane 3:16; Baroma 6:23.

^ ser. 7 Beibele ga e rute gore Modimo o na le mosadi wa kgonthe yo a bilego le bana le yena. Go e na le moo, e bitša Jesu gore ke “Morwa wa Modimo” ka gobane Jesu o bopilwe ke Modimo ka go lebanya, e bile o na le dika tša go swana le tša Tatagwe.