Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  November 2013

 POLEDIŠANO | ELDAR NEBOLSIN

Sebapadi sa Piano sa Mmino wa Classic se Hlalosa Tumelo ya Sona

Sebapadi sa Piano sa Mmino wa Classic se Hlalosa Tumelo ya Sona

Eldar Nebolsin wa Uzbekistan ke sebapadi sa piano sa ditšhabatšhaba. O ile a bapala piano a nnoši dihlopheng tša mmino wa diletšo kua London, Moscow, St. Petersburg, New York, Paris, Roma, Sydney, Tokyo le Vienna. Eldar o goletše Soviet Union e le moilaModimo. Eupša ka morago o ile a phetha ka gore batho ba bopilwe ke Mmopi yo lerato. Phafoga! e mmotšišitše ka mmino wa gagwe le tumelo ya gagwe.

Go tlile bjang gore o be sebapadi sa mmino?

Batswadi ba ka ka bobedi ke dibapadi tša piano. Ba thomile go nthuta yona ge ke be ke sa na le nywaga e mehlano. Ka morago, ke ile ka ithuta sekolong sa maemo a godimo sa mmino kua Tashkent.

Re botše ka ditlhohlo tša go bapala le sehlopa sa mmino wa diletšo.

Ga go na dihlopha tše pedi tša mmino wa diletšo tšeo di swanago. Di swana le diletšo tša mmino tše dikgolo tšeo go ka thwego di bapalwa ke baopediši ba tšona. Mohlomongwe tlhohlo e kgolo bakeng sa motho yo a bapalago piano a nnoši ke gore a kgone go sepedišana le moopediši gabotse. Go swana le poledišano magareng ga bagwera—go e na le gore o tee e be yena a dulelago go bolela, bobedi bja bona ba swanetše go fana sebaka. Gantši, o ba le sebaka setee goba tše pedi tša go itlwaetša e le gore o kgone go sepedišana le moopediši.

O tšea nako e kaaka’ng o itlwaetša?

Bonyenyane diiri tše tharo ka letšatši—gomme seo ga e fo ba go itlwaetša dikarolo tše thata. Ke ithuta le kagego ya mmino woo ke o lokišeletšago, ntle le go o bapala. Selo se sengwe seo ke se dirago ke go theetša mmino o mongwe wa mohlami, e lego seo se dirago gore ke kgone go kwešiša mmino wo ke šomago ka wona.

O be o ka re sebapadi se sebotse sa mmino se hlaolwa ka eng?

Ka bokgoni bja sona bja go dira gore piano e kwagale eka e a opela. Anke ke hlalose. Piano ke mohuta wa seletšo sa go tulwa. Ka morago ga ge konotswana e kgotlilwe, modumo wa yona o ka fokotšega—ka ge o sa swane le wa diletšo tša moya goba lentšu la motho, leo le kgonago go swara segalo goba gaešita le go oketša modumo wa sona. Tlhohlo yeo dibapadi tša piano di lebeletšanago le yona ke go fenya tshekamelo ya go hwelela ga modumo. Di dira seo ka go sepediša menwanwa ya tšona goba manakailana a diatla ka tsela e sa lemogegego,  gotee le go sepedišana ka tsela e raraganego le terapa ya ka go le letona, yeo e gogago modumo le go o dira gore o kwagale ka go se swane. Ge dibapadi tša piano e šetše e le dikgwari tša go dira dilo tše tše thata, di ka dira gore piano e kwagale bjalo ka naka, phalafala goba gaešita le go kwagala bjalo ka sehlopha sa diletšo tša mmino. Gape di ka e dira gore e lle go swana le seletšo seo se di phalago tšohle sa mmino, e lego lentšu la motho.

Go molaleng gore o tloga o rata mmino kudu.

Ke tšea mmino e le leleme leo le hlalosago dilo ka go lebanya le leo le tsošago maikwelo ao go lego thata, ge e ba e le gore go ka se kgonege, go a hlalosa ka mantšu.

Ke eng seo se dirilego gore o kgahlegele dilo tša moya?

Ntlong ya gešo go be go dula go tletše dipuku, tšeo tate a bego a etšwa le tšona Moscow. Puku yeo e bego e tloga e nkgahla kudu e be e le ya dikanegelo tša Beibele tša mabapi le mathomo a histori le diphihlelo tša Baisiraele. Puku e nngwe yeo ke ilego ka e hwetša e be le ya O ka Phela ka mo go sa Felego Paradeiseng mo Lefaseng, yeo e gatišitšwego ke Dihlatse tša Jehofa. * Ke kgahlilwe ke kamoo e hlalosago dithuto tša Beibele ka mo go kwagalago. Ge ke be ke hudugela Sepania ka 1991 go yo ithutela mmino, ke ile ka sepela le puku yeo gomme ka e bala ka makga a mmalwa. Ke ile ka hwetša tumelo yeo e sa thewago maikwelong feela eupša gape e le yeo e theilwego mabakeng a kwagalago le bohlatseng bjo bo kgodišago.

Thuto yeo e ilego ya nkgahla kudu e bile kholofetšo ya Beibele ya gore batho ba ka phela ka mo go sa felego mo lefaseng. Seo se be se tloga se kwagala! Nka oketša ka gore ke be ke se ka hlwa ke kopana le Dihlatse tša Jehofa ka nako yeo. Eupša ke ile ka phetha ka gore ge ke be nka kopana le tšona, ke be ke tla kgopela gore di nthute Beibele.

O kopane bjang le Dihlatse?

Ka morago ga matšatši a sego kae ke dirile phetho yeo, ke ile ka bona makgarebe a mabedi, le lengwe le le lengwe le swere Beibele ka seatleng. Ke ile ka nagana gore, ‘Ba swana le batho bao ke badilego ka bona ka pukung ya ka. Ba dira boboledi go fo swana le ge Bakriste ba be ba dira mehleng ya Beibele.’ Go se go ye kae, ke ge ke ithuta Beibele le Hlatse e nngwe. Lehono, ke thabišwa kudu ke go thuša ba bangwe go ithuta ka Mmopi wa rena.

Ke eng seo se go kgodišitšego gore o dumele go Mmopi, ka ge o be o le moilaModimo?

Ke kgodišitšwe ke mmino ka bowona. Mo e nyakilego go ba motho yo mongwe le yo mongwe o thabela mmino, le gona ka tsela yeo go se nago phoofolo yeo e ka kgonago go o thabela. Mmino o kgona go hlalosa maikwelo a lethabo, kgodišego, bonolo le mo e nyakilego go ba maikwelo a mangwe ka moka. Ka tlhago re binela morethetho wa mmino. Eupša na mmino o a nyakega bakeng sa gore re phologe? Na o kgatha tema tabeng ya seo go thwego ke go phologa ga tšeo di tiilego feela, go etša ge borathutatlhagelelo ba ruta? Ga ke nagane bjalo. Go ya ka pono ya ka, ga se mo go kwagalago go phetha ka gore bjoko bja motho, bjoo bo nago le bokgoni bja go hlama le go thabela mmino o swanago le wa Mozart le Beethoven, bo tšweleditšwe ke tlhagelelo. Tlhaloso e kwagalago kudu ke ya gore bjoko bja rena bo tšweleditšwe ke Mmopi yo bohlale le yo lerato.

Beibele e swana le mmino o ngwadilwego le go hlangwa ka tsela ya maemo a godimo, wo o rulagantšwego ka bokgwari le molaetša o matla bakeng sa batho ka moka

Ke eng seo se dirilego gore o dumele gore Beibele e tšwa go Modimo?

Beibele e bopša ke dipuku tše 66 tše dinyenyane tšeo di ngwadilwego lebakeng la nywaga e ka godimo ga e 1 600 ke banna bao e ka bago ba 40. Ke ile ka ipotšiša gore, ‘Ke mang yo a ka bago a rulagantše go ngwalwa ga puku ye ya maemo a godimo yeo e dumelelanago?’ Karabo e nnoši e kwagalago ke ya gore ke Modimo. Seo ke se naganago ke gore Beibele e swana le mmino o ngwadilwego le go hlangwa ka tsela ya maemo a godimo, wo o rulagantšwego ka bokgwari le molaetša o matla bakeng sa batho ka moka.

^ ser. 15 Ga bjale Dihlatse tša Jehofa di diriša kgatišo ya go ithuta Beibele ya Ke Eng Seo ge e le Gabotse Beibele e se Rutago? E ka hwetšwa go www.jw.org/nso.

Ithute ka mo go Oketšegilego

MOROKAMI

Ke eng seo se tutuetšago batho ba bantši gore ba naganišiše ka go ba gona ga Mmopi?

Na batho ba bopilwe ke Modimo goba ba tšwa diphoofolong?

DITABA TŠE DIBOTSE TŠE DI TŠWAGO GO MODIMO!

Na ruri Ditaba tše Dibotse di tšwa go Modimo?

Re ka tseba bjang ge e ba molaetša wa Beibele e le therešo?