Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! OCTOBER 2013

 NA GO HLAMILWE?

Go kwa mo go Makatšago ga Tšie e Bitšwago Katydid

Go kwa mo go Makatšago ga Tšie e Bitšwago Katydid

TŠIE ya sethokgweng e bitšwago katydid ya kua Amerika Borwa (Copiphora gorgonensis) e na le ditsebe tša botelele bja ka tlase ga milimithara, eupša di šoma go swana le kamoo ditsebe tša batho di šomago ka gona. Tšie ye e kgona go kgetholla medumo ya mehutahuta go tšwa mafelong a kgole. Ka mohlala, e kgona go kwa phapano magareng ga modumo wa tšie e nngwe ya katydid le modumo o hlabago wa mankgagane wo o tsomago.

TSEBE YA TŠIE E BITŠWAGO KATYDID

Ela hloko: Ditsebe tša tšie ya katydid di maotong a yona a ka pele. Ka go swana le tsebe ya motho, tsebe ya tšie ya katydid e kgoboketša modumo, e a o fetoša gomme ya o sekaseka. Eupša borathutamahlale ba utolotše setho sa moswananoši ka gare ga tsebe ya tšie ye, e lego mokoti wo o tletšego ka seela se se pitleleditšwego wo o swanago le paluni yeo e telefaditšwego. Setho se, seo se bitšwago acoustic vesicle, se šoma go swana le kgopanatsebe ya diamuši eupša ke se senyenyane kudu. Setho se seo se bitšwago acoustic vesicle ke sona se dirago gore tšie ya katydid e kwe ka tsela ye e makatšago.

Moprofesara Daniel Robert wa Sekolo sa Dithutamahlale tša Thutaphedi sa Yunibesithi ya Bristol kua United Kingdom, o re selo se seo se utolotšwego se tla thuša baentšeneare “go hlama dilo tša go thuša go kwa tše dinyenyane le tšeo di šomago ka tsela e nepagetšego kudu go feta le ge e le neng pele.” Banyakišiši ba dumela gore se se tla tsenya letsogo le boentšeneareng bja thekinolotši ya go hlama dilo tša modumo o phagamego kudu bja moloko o latelago, go akaretša le ditshepedišo tša go tšea diswantšho dipetleleng.

O nagana eng? Na go kwa mo go makatšago ga tšie e bitšwago katydid go bile gona ka tlhagelelo? Goba na go hlamilwe?