Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  September 2013

 TABA YA LETLAKALA LA KA NTLE

Therešo Mabapi le Halloween

Therešo Mabapi le Halloween

Na Halloween e a ketekwa moo o dulago gona? Kua United States le Canada, Halloween e tumile e bile e ketekwa ngwaga le ngwaga ka October 31. Lega go le bjalo, meetlo ya Halloween e ka hwetšwa dikarolong tše dingwe tše dintši tša lefase. Mafelong a mangwe go binwa matšatši a maikhutšo ao a nago le dilo tšeo a swanago ka tšona le Halloween, gaešita le ge a bitšwa ka maina a mangwe, e lego: go ikgokaganya le lefase la meoya leo le akaretšago meoya ya bahu, badimomothwana (di-fairy), baloi gaešita le diabolo le barongwa bao e lego batemona.—Bona lepokisi le le rego,  “Menyanya Yeo e Swanago le Halloween Lefaseng ka Moka.”

WENA ka bowena o ka ba o sa dumele go meoya e phagametšego matla a tlhago. O ka fo ba o lebelela go tšea karolo go ketekeng Halloween le menyanya e mengwe e swanago le yona e le tsela ya go ithabiša le go ruta bana ba gago go ithuta dilo tše dingwe tša boikgopolelo. Lega go le bjalo, batho ba bantši ba tšea menyanya ye e le kotsi ka baka la mabaka a latelago:

  1. Encyclopedia of American Folklore e hlalosa gore: “Ge e le gabotse Halloween e sepedišana le tebelelo ya go ikgokaganya le meoya, yeo e mentši ya yona e tšhošetšago goba e tšhošago.” (Bona lepokisi le le rego,  “Tatelano  ya Ditiragalo ya Halloween.”) Ka mo go swanago, menyanya e mentši e swanago le Halloween e thomile boheiteneng gomme e tsemile medu borapeding bja badimo. Gaešita le lehono, lefaseng ka bophara batho ba diriša matšatši a go ikgokaganya le seo go thwego ke meoya ya bahu.

  2. Gaešita le ge Halloween e be e dutše e lebelelwa kudu e le letšatši la maikhutšo la Maamerika, ngwaga le ngwaga batho dinageng tše oketšegago ba be ba dutše ba e keteka. Lega go le bjalo, batho ba bantši bao ba thomago go keteka monyanya wo ga ba lemoge gore dika tša Halloween, mekgabišo ya yona le meetlo di tšwa boheiteneng, tšeo tše dintši tša tšona di tswalanago le dibopiwa tšeo di nago le matla a phagametšego a tlhago le matla a boloi.—Bona lepokisi le le rego,  “E tšwa Kae?”

  3. Mawicca, ao a latelago ditirelo tša bogologolo tša ma-Celt, a sa bitša Halloween ka leina la yona la kgale la Samhain gomme a e tšea e le bošego bjo bokgethwa ka go fetišiša mo ngwageng. Kuranta ya USA Today ge e tsopola motho yo a ipolelago gore ke moloi, e re: “Bakriste ‘ga ba lemoge se, eupša ba bina letšatši la rena la maikhutšo gotee le rena. . . . Re thabela seo.’”

  4.   Menyanya e swanago le Halloween e thulana le dithuto tša Beibele. Beibele e lemoša ka gore: “Le ka mohla go se ke gwa ba le ge e le mang gare ga lena yo . . . a dirago tša bonoge, yo e lego senoge, sedupe goba moloi, yo a dirišago dipheko, yo a ikopanyago le dipoko goba meoya, goba yo a bitšago bahu.”—Doiteronomio 18:10, 11, The Jerusalem Bible; bona gape le Lefitiko 19:31; Bagalatia 5:19-21.

Ka baka la seo se boletšwego ka mo godimo, ke gabohlale gore o tsebe ka ditlogo tše mpe tša Halloween le menyanya e swanago le yona. Go kwešiša ditaba ka botlalo ka tsela yeo go ka go tutuetša gore o tlatše ba bangwe ba bantši bao ba sa ketekego matšatši a a maikhutšo.

“Bakriste ‘ga ba lemoge se, eupša ba bina letšatši la rena la maikhutšo gotee le rena. . . . Re thabela seo.’”—Kuranta ya USA Today, ge e tsopola motho yo a ipolelago gore ke moloi

^ ser. 37 Hallow ke lentšu la kgale leo le šupago go yo go thwego ke mokgethwa. Letšatši la Bakgethwa ka Moka ke letšatši la maikhutšo la go hlompha bakgethwa bao ba hwilego. Leina la mantšiboa a pele ga Letšatši la Bakgethwa ka Moka le be le bitšwa All Hallow Even gomme ka morago la khutsofatšwa ya ba Halloween.

Ithute ka mo go oketšegilego

Ke Eng Seo ge e le Gabotse Beibele e se Rutago?

Na re Swanetše go Bina Matšatši a Maikhutšo?

Motlwae wa go bina matšatši a mantši a maikhutšo a go tuma a moo o dulago o thomile kae? Karabo ya potšišo ye e ka go makatša.