Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! SEPTEMBER 2013

 POLEDIŠANO | CÉLINE GRANOLLERAS

Setsebi sa Dipshio se Hlalosa Tumelo ya Sona

Setsebi sa Dipshio se Hlalosa Tumelo ya Sona

Ngaka Céline Granolleras ke ngaka ya kua Fora yeo e lego setsebi sa bolwetši bja dipshio. Ka morago ga nywaga e fetago e 20 e le ngaka, o ile a phetha ka gore go na le Mmopi yo a nago le taba le rena. Phafoga! e mmotšišitše dipotšišo mabapi le mošomo wa gagwe le tumelo ya gagwe.

Re botše ka tša bjaneng bja gago.

Ge ke be ke na le nywaga e senyane, lapa lešo le ile la tloga Sepania la hudugela Fora. Batswadi ba ka e be e le Makatholika, eupša ke ile ka kgaotša go dumela go Modimo ge ke be ke na le nywaga e 16. Ke be ke tšea bodumedi bo se bohlokwa bophelong. Ge motho a be a ka mpotšiša gore bophelo bo thomile bjang ge e ba go se na Modimo, ke be ke araba ka gore: “Gabjale, borathutamahlale ga ba kgone go hlalosa seo, eupša ka letšatši le lengwe ba tla se hlalosa.”

Ke eng seo se dirilego gore o ithute ka bolwetši bja dipshio?

Ke tsene sekolo sa tša kalafo kua Montpellier, Fora. Gona moo moprofesara yo mongwe o ile a boledišana le nna ka taba ya go šoma lefapheng leo le bitšwago nephrology, e lego lefapha la tša kalafo leo le šomago ka dipshio. Mošomo wa gona o be o akaretša go dira nyakišišo le go hlokomela balwetši. E be e le sona seo ke bego ke se nyaka. Ka 1990, ke ile ka thoma go tšea karolo nyakišišong ya mabapi le go dirišwa ga erythropoietin (EPO) ya maitirelo ka tsela ya kalafo tabeng ya go laola go tšweletšwa ga disele tše dikhwibidu tša madi marapong a rena. Ka nako yeo, lefapha leo le be le tšewa e le lefapha le lefsa la go dira nyakišišo.

Ke eng seo se dirilego gore o thome go nagana ka Modimo?

Morago kua ka 1979, monna wa ka, Floréal, o ile a thoma go ithuta Beibele le Dihlatse tša Jehofa. Eupša ke be ke se na kgahlego. Ke be ke tennwe ke bodumedi ge ke be ke sa le ngwana. Lega go le bjalo, monna wa ka le bana ba ile ba ba Dihlatse, gomme go se go ye kae ke ge mo e nyakilego go ba bagwera ba rena ka moka e le Dihlatse.  Yo mongwe wa bona e lego Patricia, o ile a šišinya gore ke leke go rapela. O ile a re: “Ge e ba go se na motho legodimong, ga go na seo o ipeago kotsing ka sona. Eupša ge e ba a le gona, o tla bona seo se tlago go direga.” Ka morago ga nywaga e mentši, ke ile ka thoma go ipotšiša ka morero wa bophelo, gomme ka gopola mantšu a Patricia. Ke ile ka thoma go rapelela gore ke be le kwešišo.

Ke eng seo se dirilego gore o ipotšiše ka morero wa bophelo?

Go hlaselwa ga World Trade Center ke batšhošetši kua New York go ile gwa ntira gore ke ipotšiše lebaka leo ka lona go nago le bobe bjo bontši gakaakaa bathong. Ke ile ka nagana gore: ‘Go fišegela thoko ga bodumedi go bea bokamoso bja rena kotsing. Lega go le bjalo, ke dikologilwe ke Dihlatse tša Jehofa tšeo di nago le khutšo. Tšona ga di fišegele thoko. Di latela Beibele. Mohlomongwe ke swanetše go lekola seo e se bolelago.’ Ka gona ke ile ka thoma go ipalela Beibele.

Ka ge o le ngaka, na o ile wa thatafalelwa ke go dumela go Mmopi?

Aowa. Ke be ke hlompha kudu tsela e raraganego yeo mebele ya rena e hlamilwego ka yona. Ka mohlala, tsela yeo dipshio tša rena di laolago tekanyo ya disele tše dikhwibidu mading a rena e tloga e makatša.

Ke ka baka la eng o re’alo?

Ke ile ka hlabelwa ke seetša sa gore Modimo ke yena feela yo a ka hlamago tshepedišo yeo e botse

Ka ge o ka ba o tseba, disele tše dikhwibidu di sepediša oksitšene. Ge e ba o lahlegelwa ke madi a mantši goba ge e ba o hlatlogela godimo kudu, mmele wa gago o tla hlaelelwa ke oksitšene. Dipshio tša rena di na le ditlhohlomiši tša go lemoga oksitšene. Ge di lemoga go hlaelela ga oksitšene mading, di dira gore EPO e tšweletšwe gomme tekanyo ya EPO mading e ka hlatloga ka makga ao e ka bago a sekete. EPO e dira gore moko wa marapo o tšweletše disele tše dikhwibidu tše oketšegilego, tšeo ka morago di sepedišago oksitšene e oketšegilego. Seo se a kgahliša! Se se makatšago ke gore ke ithutile mogato wo ka nywaga e lesome pele nka hlabelwa ke seetša sa gore Modimo ke yena feela yo a ka hlamago tshepedišo yeo e botse.

O ile wa kgahlwa ke eng ka Beibele?

Ke be ke badile dipuku tše dintši kudu tša histori le dipadi tšeo di tumilego, eupša ke ile ka lemoga di tloga fase gore Beibele e be e fapane le tšona. Keletšo ya yona e šoma kudu mo e lego gore e swanetše go ba e tšwa mothopong wo o phagametšego motho. Ke kgahlilwe ke semelo sa Jesu. Ke ile ka lemoga gore e be e le motho wa kgonthe. O be a na le maikwelo e bile a na le bagwera. Ka ge ke be ke sa nyake go diriša dikgatišo tša Dihlatse tša Jehofa, ke ile ka dira nyakišišo ka diensaeklopedia le dipuku tše dingwe tša ditšhupetšo ge go be go rotoga dipotšišo.

O ile wa nyakišiša ka eng?

Ke ile ka dira nyakišišo dipukung tša histori . . . Mafelelong, ke ile ka phetha ka gore boporofeta bjo bja Beibele bo be bo phethagetše ka nako e swanetšego

Ka mohlala, ke kgahlilwe ke tsela yeo Beibele e bego e boletše e sa le pele ka ngwaga woo Jesu a bego a tla kolobetšwa ka wona. E bontšha gabotse gore go be go tla feta nako e kaaka’ng magareng ga ngwaga wa bo-20 wa pušo ya mmuši wa Peresia e lego Arithasasitha le ngwaga woo Jesu a bego a tla itšweletša ka wona e le Mesia. * Ke tlwaetše go dira nyakišišo—ke karolo ya mošomo wa ka. Ka gona ke ile ka dira nyakišišo dipukung tša histori go kgonthišetša dinako tša pušo ya Arithasasitha le dinako tša bodiredi bja Jesu. Mafelelong, ke ile ka phetha ka gore boporofeta bjo bja Beibele bo be bo phethagetše ka nako e swanetšego le gore bo swanetše go ba bo buduletšwe ke Modimo.

^ ser. 19 Bona puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa, matlakala 197-199.