Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! AUGUST 2013

 POLEDIŠANO | IRÈNE HOF LAURENCEAU

Ngaka ya go Bua Marapo le Malokololo e Hlalosa Tumelo ya Yona

Ngaka ya go Bua Marapo le Malokololo e Hlalosa Tumelo ya Yona

Ngaka Irène Hof Laurenceau ke ngaka ya go bua marapo le malokololo kua Switzerland. Ka nako e nngwe o kile a belaela go ba gona ga Modimo. Eupša ka morago ga nywaga e itšego o ile a phetha ka gore Modimo o gona le gore ke Mothomi wa bophelo. Phafoga! e mmotšišitše ka mošomo wa gagwe le tumelo ya gagwe.

O ile wa kgahlwa ke eng ka thutamahlale?

Ge ke be ke sa le ngwana, ke be ke rata tlhago kudu. Ke goletše Richterswil, e lego motsana o mobotse wa Switzerland lebopong la Letsha la Zurich. Batswadi ba ka le bagolwane ba ka ba be ba fela ba nntšha gore re sepelesepele gomme ba mpotša ka diphedi le dimela tšeo re bego re di bona tseleng.

Ke ka baka la eng o ile wa ithutela go ba ngaka ya go bua marapo le malokololo?

Tate o ile a šoma nakwana e le mothuši phapošing ya go direla diophareišene sepetleleng sa motseng. Seo a ilego a se bona se ile sa mo dira gore a bolele ka phišego mabapi le diophareišene. Phišego ya gagwe e ile ya nkgahla kudu moo e lego gore ka morago ke ile ka kgetha go ithutela go ba ngaka ya go bua. Ke ile ka ithutela go bua marapo le malokololo ka gobane ke rata tsela yeo metšhene e dirišwago ka yona. Dingaka tša go bua marapo le malokololo di swanetše go nagana bjalo ka moentšeneare gore di kgone go lokiša marapo, mešifa le ditšhika tšeo di dirago gore re kgone go sepela.

Sa bohlokwa kudu ke gore ke thabela go bona boemo bja tša maphelo bja balwetši ba ka bo kaonefala. Ke tloga ke thabela go šoma ka batho.

Ke ka baka la eng o be o belaela go ba gona ga Modimo?

Dipelaelo tša ka di thomile ke sa le yo mofsa gomme ke be ke tutuetšwa ke dintlha tše pedi ka mo go kgethegilego. Ya pele ke gore ke ile ka hwetša gore bahlahli ba bangwe ba bodumedi kua kerekeng ba be ba gobogile boitshwarong gomme se se be se ntshwenya kudu. Ya bobedi ke gore kua sekolong, ba bangwe ba barutiši ba ka ba thutaphedi ba be ba dumela thuto ya tlhagelelo—e lego thuto yeo ke ilego ka e amogela, kudukudu ge ke be ke eya yunibesithing.

Ke ke baka la eng o ile wa amogela thuto ya tlhagelelo?

Ke be ke kgolwa baprofesara ba ka. Go oketša moo, ke be ke nagana gore go swana ga kagego ya  mmele magareng ga mehuta e itšego ya diphoofolo go be go bontšha gore di tšwa mohuteng o tee le go thekga kgopolo ya gore diphetogo dikarolwaneng tša leabela di tšweletša mehuta e mefsa ya diphedi.

Lega go le bjalo, ke ka baka la eng ge nako e dutše e eya o ile wa fetoša monagano?

Mogwera o ile a ntaletša sebokeng sa Dihlatse tša Jehofa. Ke ile ka kgahlwa ke phuthego e nago le bogwera gotee le dipolelo tšeo di rutago. Ka morago, mosadi yo a nago le bogwera wa phuthegong yeo o ile a nketela, gomme ka mmotšiša gore: “Nka kgodišega bjang gore Beibele e bolela therešo?”

O ile a mpontšha diporofeto tša Beibele mabapi le ditiragalo tšeo di hlaolago mehla ya rena. Mohlala ke boporofeta bja Jesu bja gore mehla ya bofelo ya lefase la gona bjale e be e tla hlaolwa ka dintwa lefaseng ka moka, “ditšhišinyego tše dikgolo” le “leuba la malwetši le tlhaelelo ya dijo” * gohle. Gape o ile a bolela ka diporofeto tšeo di bego di bolela e sa le pele ka go senyega ga tša leago le go oketšega ga megabaru gotee le dilo tše dingwe tše mpe tšeo re di bonago kudu lehono. * Go se go ye kae, ke ile ka thoma go ithuta Beibele gomme kapejana ka lemoga gore dipolelelopele tša yona di a phethagala ka mehla. Gape ke ile ka thoma go hlahlobišiša dipono tša ka mabapi le gore bophelo bo thomile bjang.

Na nyakišišo ya gago ya tša kalafo e go thušitše gore o naganišiše ka gore bophelo bo thomile bjang?

Ee. Ge ke be ke thoma go ithuta Beibele, ke be ke nyakišiša ka ophareišene ya letolo. Go thoma mafelelong a bo-1960, borathutamahlale ba ile ba thoma go kwešiša gabotse go šoma ga letolo mo go raraganego. Ba ile ba hwetša gore letolo la rena ga le kobegele ka lehlakoreng letee feela go swana le segono. Go e na le moo, le a bidikana e bile le a thedimoga—e lego motswako o dirilwego ka bohlale wo o dirago gore letolo le kgone go ya kua le kua ka mo go nabilego, e lego seo se dirago gore re kgone go sepela, go bina, go thedimoga lehlweng le go dira dilo tše dingwe tše dintši kudu.

Go tšere nywaga e 40 banyakišiši ba leka go hlama letolo la maitirelo. Eupša ga go bonolo go ekiša letolo la motho ka baka la go raragana ga lona. Go oketša moo, ge matolo a maitirelo a bapišwa le letolo la rena, ga a swarelele lebaka le letelele. Gaešita le ge bahlami bao ba na le didirišwa tšeo di kaonefaditšwego, ba a thaba ge matolo ao ba a dirilego a swarelela lebaka la nywaga e 20. Go ba gona, letolo la rena le dirilwe ka disele tšeo di phelago tšeo di dulago di mpshafatšwa. Go ya ka nna, letolo le hlatsela bohlale bja Modimo, e sego megato e se nago bohlatse ya thuto ya tlhagelelo.

Go thwe’ng ka diphetogo dikarolwaneng tša leabela le go swana ga kagego magareng ga mehuta e mengwe ya diphedi?

Go swana moo go šupa gore Mohlami ke o tee. Go oketša moo, diphetogo dikarolwaneng tša leabela ga di kaonefatše tsela yeo diphedi di hlamilwego ka yona ka go di dira gore e be tša mohuta wa maemo a godingwana. Go e na le moo, go bonagala diphetogo tšeo di senya dikarolwana tša leabela. Go ba gona, go a kgonega gore kotsi e phethe morero o itšego o nago le mohola—mohlomongwe go ka thwe go swana le ge setimela se thula leporogo gomme se le phušola, ka go re’alo seo se šireletša motse madireng ao a šwahlelago. Eupša kotsi yeo ga se ya kaonefatša motse. Ka mo go swanago, diphetogo dikarolwaneng tša leabela ga di kaonefatše diphedi. Le gona, di ka se tsoge di tšweleditše selo seo se hlamilwego ka bohlale kudu go swana le letolo la motho—go sa bolelwe ka dikarolo tše dingwe tša mmele wa motho.

Diphetogo dikarolwaneng tša leabela di ka se tsoge di tšweleditše selo seo se hlamilwego ka bohlale kudu go swana le letolo la motho

Ke ka baka la eng o ile wa ba yo mongwe wa Dihlatse tša Jehofa?

Ge ke be ke thoma go diriša melao ya motheo ya Beibele, bophelo bja ka bo ile bja kaonefala kudu. Go oketša moo, ka 2003, ke ile ka ya kopanong ya ditšhabatšhaba ya Dihlatse tša Jehofa gomme moo ka bona botee bjo bo kgethegilego bja go swana le bja lapa, gaešita le gare ga batlakopanong bao ba bego ba sa ka ba kopana pele. Ba be ba bontšhana lerato la kgonthe, gomme ke be ke nyaka go ba karolo ya seo.