Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! AUGUST 2013

 THUŠO BAKENG SA LAPA | GO GODIŠA NGWANA

Ge Ngwana wa Gago yo a Lego Mahlalagading a Ikgobatša

Ge Ngwana wa Gago yo a Lego Mahlalagading a Ikgobatša

TLHOHLO

O thoma go lemoga gore go šetše go fetile nako e itšego ngwana wa gago yo a lego mahlalagading a dutše a ikgobatša ka boomo. O ipotšiša gore: ‘E le gore molato ke’ng? Na morwedi wa ka o leka go ipolaya?’

Gantši ga se gore o ba a nyaka go ipolaya. Lega go le bjalo, ge ngwana wa gago yo a lego mahlalagading a ikgobatša, * o hloka thušo. O ka mo thuša bjang? Thoma ka go nyakišiša seo se dirago gore a itshware ka tsela ye yeo e hlobaetšago. *

LEBAKA LA GO DIREGA GA SEO

Na go ikgobatša e fo ba e le mokgwa wo o lego fešeneng? Bafsa ba bangwe ba a dumela gore ba ile ba thoma go ikgobatša ka ge ba kwele ka bafsa ba bangwe bao ba ikgobatšago. Lega go le bjalo, ba bantši ga ba ikgobatše ka ge ba kwele ka ba bangwe. Ba fapana ka’ng? Gantši motho yo a ikgobatšago o dira bjalo ka sephiring e bile o lešwa dihlong kudu ke mokgwa wo wa gagwe. Celia * wa nywaga e 20 o re: “Ke be ke sa nyake gore seo ke se dirago se tsebje ke motho. Ke be ke uta mabadi a ka gore a se bonale le gatee.”

Na go ikgobatša e fo ba e le mokgwa wa go ikgogela tlhokomelo? Ba bangwe ba ka go dirišetša go ikgogela tlhokomelo. Eupša batho bao ba ikgobatšago bao re bolelago ka bona sehlogong se gantši ba uta mokgwa wa bona e bile ga ba leke go ikgogela tlhokomelo ka dintho tšeo ba itshegilego tšona goba moo ba rurugilego gona. Lega go le bjalo, motho yo mongwe yo a kilego a ba le mokgwa wa go ikgobatša o re o ile a duma eka nkabe go bile le motho yo a lemogago dintho tša gagwe gore taba yeo e tsebje gomme a thušwe e sa le ka pela.

Bjale, ke ka baka la’ng batho ba ikgobatša? Dibaki tša go ikgobatša di raragane, eupša tabakgolo ke gore gantši mofsa o ba a ekwa bohloko maikwelong gomme a sa tsebe gore a ka bo hlalosa bjang. Steven Levenkron yo e lego setsebi sa maphelo ditabeng tša monagano, o hlalosa ka pukung ya gagwe ya Cutting gore motho yo a ikgobatšago ke “motho yo a bonego gore bohloko bja mmele bo ka fodiša bohloko bja maikwelo.”

Gantši motho yo a ikgobatšago o kwa bohloko maikwelong gomme a sa tsebe gore a ka bo hlalosa bjang

Go thwe’ng ge e ba o ipona molato? Go e na le go hlwa o tshwenyega ka gore ngwana wa gago yo a lego mahlalagading o ikgobatša ka baka la phošo yeo wena o e dirilego ge o dutše o mo godiša, nagana ka tema e botse yeo o e kgathago ya botswadi ge o dutše o mo thuša go boela sekeng.

 SEO O KA SE DIRAGO

Kgothaletša ngwana wa gago yo a lego mahlalagading gore a go botše seo se mo tshwenyago. Ditšhišinyo tše di latelago di ka thuša.

Mo homotše. Ge ngwana wa gago yo a lego mahlalagading a go utollela gore o na le mokgwa wa go ikgobatša, leka go se tšhoge goba go arabela ka tsela e šoro. Go e na le moo, bolela le yena o theošitše maswafo le ka tsela e homotšago.—Molao wa motheo wa Beibele: 1 Bathesalonika 5:14.

Mmotšiše dipotšišo ka tsela yeo e sa kwagalego e mo tšhošetša. Ka mohlala, o ka re: “Ke a tseba gore go na le seo se felago se go tshwenya. Ke’ng seo se go ferekanyago kudu?” goba “Nka dira’ng go go thuša ge o ikwa eka go na le seo o belaelago ka sona goba se go gateletšago?” goba “Ke’ng seo o ka thabago kudu ge nka se dira gore re kaonefatše tswalano ya rena?” Ge a araba, mo theetše ntle le go mo tsena ganong.—Molao wa motheo wa Beibele: Jakobo 1:19.

Thuša ngwana wa gago yo a lego mahlalagading gore a itebelele ka tsela e lekalekanego. Ka ge gantši batho bao ba ikgobatšago ba tshwenyega kudu ka mafokodi a bona, mohlomongwe o ka kgothaletša ngwana wa gago yo a lego mahlalagading gore a lemoge dika tša gagwe tše dibotse. O ka ba wa šišinya gore a ngwale fase bonyenyane dilo tše tharo tšeo a di ratago ka yena. Kgarebe e bitšwago Briana e re: “Go ngwala dilo tšeo ke di kgonago go nthušitše go bona gore ke na le dika tše dibotse.” *

Kgothaletša ngwana wa gago yo a lego mahlalagading gore a rapele Jehofa Modimo. Beibele e re: “[Lahlelang] dipelaelo tša lena ka moka go yena, gobane o a le hlokomela.” (1 Petro 5:7) Lorena wa nywaga e 17 o re: “Ke ile ka katanela go ntšhetša Jehofa sa mafahleng, kudukudu ge ke be ke ikwa ke lekega go ikgobatša. Seo se nthušitše go katana kudu gore ke kgaotše.”—Molao wa motheo wa Beibele: 1 Bathesalonika 5:17.

^ ser. 5 Go ikgobatša ke go lemalela mokgwa wa go ikweša bohloko, e ka ba ka go itshega, go intšha dintho, go ipetha goba mokgwa o mongwe.

^ ser. 5 Le ge sehlogong se re bolela ka motho yo a ikgobatšago e le motho wa mosadi, melao ya motheo yeo e ahlaahlwago mo e šoma go banna le basadi.

^ ser. 7 Maina mo sehlogong se a fetotšwe.

^ ser. 15 Gantši mokgwa wa go ikgobatša ke pontšho ya gore motho o gateletšegile goba o swerwe ke bolwetši bjo itšego. Maemong a bjalo, go ka nyakega thušo ya tša kalafo. Ga go na mokgwa woo Phafoga! e šišinyago gore o latelwe. Lega go le bjalo, Bakriste ba swanetše go kgonthišetša gore kalafo le ge e le efe yeo ba e kgethago ga e kgahlanong le melao ya motheo ya Beibele.

Ithute ka mo go oketšegilego

Ke ka Baka La’ng ke Itshega?

Go ikgobatša ke bothata bja bafsa ba bantši. Ge e ba o na le bothata bjo, o ka hwetša thušo bjang?