Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! AUGUST 2013

Na o Swanetše go Dumela Boraro Botee?

Na o Swanetše go Dumela Boraro Botee?

Batho ba fetago dibilione tše pedi ba ipolela gore ke Bakriste. Ba bantši ba tsena dikereke tšeo di rutago ka Boraro Botee—e lego thuto ya gore Tate, Morwa le moya o mokgethwa ke Modimo o tee. Go tlile bjang gore Boraro Botee e be thuto ya semmušo? Sa bohlokwa kudu, na thuto ye e dumelelana le Beibele?

BEIBELE e feditšwe go ngwalwa ka ngwaga wa 98 C.E. Dithuto tšeo di lebišitšego go theweng ga thuto ya Boraro Botee di thomile go beakanywa semmušo ka 325 C.E.—ka morago ga nywagakgolo e fetago e mebedi—lekgotleng leo le bego le swaretšwe motseng wa Nicaea kua Asia Minor, woo ga bjale e lego Iznik, kua Turkey. Go ya ka New Catholic Encyclopedia, thuto yeo e ile ya tlaleletša go theweng ga Lekgotla la Nicaea leo le hlomilego tlhaloso ya semmušo ya ‘tumelo ya Bokriste,’ go akaretša le tlhaloso ya Modimo le Kriste. Ka gona, ke ka baka la’ng go ile gwa lebelelwa go le bohlokwa go hlalosa Modimo le Kriste nywagakgolo ka morago ga ge Beibele e feditšwe go ngwalwa? Na Beibele ga e kwagale ditabeng tše tša bohlokwa?

NA JESU KE MODIMO?

Nakong ya ge Constantine a be a eba mmušanoši wa Mmušo wa Roma, batho bao ba bego ba ipolela gore ke Bakriste ba be ba arogane tabeng ya gore Modimo le Kriste ba tswalana bjang. Na Jesu e be e le Modimo goba na o be a bopilwe ke Modimo? Bakeng sa go rarolla taba yeo, Constantine o ile a biletša baetapele ba kereke kua Nicaea, e sego ka gobane a be a nyaka therešo ya bodumedi, eupša ka gobane a be a sa nyake gore bodumedi bo aroganye mmušo wa gagwe.

“Wa rena Modimo ké o tee fêla, Yêna Tata wešo.”—1 Bakorinthe 8:6, Beibele ya Sepedi

Constantine o ile a kgopela bapišopo, bao mo gongwe e bego e le ba makgolo, gore ba kwane ka lentšu letee, eupša kgopelo ya gagwe e ile ya ba ya lefeela. Ka morago o ile a šišinya gore lekgotla le amogele kgopolo yeo e sa kwešišegego ya gore Jesu “o be a le boemong bja go swana” (homoousios) le Tate. Polelwana ye ya filosofi ya Segerika yeo e sego gona ka Beibeleng e ile ya thea motheo bakeng sa thuto ya Boraro Botee yeo ka morago e ilego ya akaretšwa tumelong ya dikereke. Ruri, bofelong bja lekgolo la bone la nywaga, ge e le gabotse thuto ya Boraro Botee e be e šetše e le boemong bjoo e lego go bjona lehono, go akaretša le seo go thwego ke karolo ya boraro ya modimo wa boraro botee, e lego moya o mokgethwa.

KE KA BAKA LA ENG O SWANETŠE GO TSHWENYEGA?

Jesu o itše ‘barapedi ba kgonthe ba tla rapela Tate ka therešo.’ (Johane 4:23) Therešo e ngwadilwe ka Beibeleng. (Johane 17:17) Na Beibele e ruta gore Tate, Morwa le moya o mokgethwa ke batho ba bararo go Modimo o tee?

 Bohlatse bja pele ke gore Beibele ga e na polelwana e rego “Boraro Botee.” Bja bobedi ke gore Jesu le ka mohla ga se a ka a bolela gore o lekana le Modimo. Go e na le moo, Jesu o be a rapela Modimo. (Luka 22:41-44) Bohlatse bja boraro bo akaretša taba ya tswalano ya Jesu le balatedi ba gagwe. Gaešita le ka morago ga ge a tsošitšwe bahung a boela lefelong la moya, Jesu o ile a bitša balatedi ba gagwe gore ke “bana bešo.” (Mateo 28:10) Na e be e le bana babo Modimo Ramatlaohle? Ga go bjalo le gatee! Eupša ka go dumela ga bona go Kriste—Morwa yo bohlokwa wa Modimo—le bona ba ile ba ba barwa ba Tate o tee. (Bagalatia 3:26) Bapiša mangwalo a oketšegilego le polelwana e latelago yeo e tšwago tumelong yeo e dirilego gore go be le Lekgotla la Nicaea.

Seo Tumelo ya Nicaea e se Bolelago:

“Re dumela . . . go Morena Jesu Kriste o tee . . . yo a lego boemong bjo bo swanago le Tate, Modimo wa Modimo, Seetša sa Seetša, yena Modimo wa yena Modimo.”

Seo Beibele e se bolelago:

  • “Tate ó mpheta [Jesu] ka boxolo.”—Johane 14:28. *

  • “Ke [Jesu] rotoxêla xo Tate, le xo Tataweno, xo Modimo wa-ka, le xo Modimo wa lena.”—Johane 20:17.

  • “Wa rena Modimo ké o tee fêla, Yêna Tata wešo.”—1 Bakorinthe 8:6.

  • “A xo rêtwê Modimo Tata xo Mong wa rena Jesu Kriste.”—1 Petro 1:3.

  • “Xo bolêla Yêna Therešô [Jesu], . . . Yêna Mo-thôma-hlôlô-ya-Modimo.”Kutollo 3:14. *

^ ser. 13 Mongwalo o sekamego ke wa rena. Ditsopolo ka moka karolong ye di tšwa Beibeleng ya Sepedi.

^ ser. 17 Kgatišo ya go ithuta Beibele ya Ke Eng Seo ge e le Gabotse Beibele e se Rutago? e akaretša dithuto tše tše pedi tše rego: “Therešo ke Efe ka Modimo?” le “Jesu Kriste ke Mang?” O ka hwetša kopi go Dihlatse tša Jehofa goba o e bale Inthaneteng go www.jw.org.