Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  July 2013

Ithute ka Katse ya Santeng e Bonwago ka Sewelo

Ithute ka Katse ya Santeng e Bonwago ka Sewelo

Ka morago ga ge katse ye e emere ka dikgwedi tše pedi, gantši e ka hlatša dikatsana tše tharo

GAREGARE ga leganata le omilego kudu, bošegong bja kgampi ya leswiswi, katse ya santeng e tšwa ka segoleng sa yona gomme ya ema. E lebelela gohle gomme ya theetša. Ke moka, ka go khukhunetša, e thoma go sepela ka setu santeng ya leganateng.

Gateetee, katse ya santeng e tabogela phoofotšwana yeo e sa itebetšego, e lego legotlo. Ka morago ga moo, katse ya santeng e tšwela pele e tsoma ka tsela yeo bošego ka moka, gomme e fela e fofela godimo gore e sware diphoofotšwana tše dingwe. Ge e ba katse ye e ka swara dijo tše dintši tšeo e ka se di fetšego, e khupetša tše di šetšego santeng. E boela segoleng sa yona ka masa gomme e tšwa ka sewelo mosegare. Ela hloko dilo tše dingwe tše makatšago ka phoofolo ye yeo e bonwago ka sewelo.

  • Go kwa ka tsela e makatšago ga dikatse tše go di thuša go hwetša diphoofotšwana tšeo di di jago, le ge diphoofotšwana tšeo di le ka meleteng

  • Katse e tona e bitša e tshadi ka go llela godimo. Go kwa ga e tshadi ka tsela e makatšago go e thuša gore e kgone go kwa ge e tona e lla le ge e le kgole

  • Boya bjoo bo apešitšego marofa a katse ye bo e thuša gore e se sobelele santeng le go a šireletša dithempheretšheng tše di fišago kudu goba tše di tonyago kudu tša santa

  •  Ka gare ga ditsebe tša yona go na le boya bjo bontši bjo bošweu, bjoo bo e šireletšago gore e se ke ya tsenwa ke santa e tšewago ke moya

  • Go tsoma katse ya santeng ga go bonolo ka ge bogato bja marofa a yona bo apešitšwe ke boya bjo bontši bjo bo dirago gore mehlala ya yona e se bonagale

  • Dikatse tše di kgona go phela ka meetse ao di a hwetšago diphoofotšwaneng tšeo di iphedišago ka tšona

  • Santa ya Leganata la Kara-Kum e ka fiša go fihla go 80°C. Ka dinako tše dingwe thempheretšha ya moo e ka theogela go 25°C