Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JUNE 2013

 PONO YA BEIBELE

Sathane

Sathane

Na Sathane ke motho wa kgonthe?

“Noga ya kgale yeo e bitšwago Diabolo le Sathane, . . . e [timetša] lefase ka moka.”—Kutollo 12:9.

SEO BATHO BA SE BOLELAGO

Batho ba bangwe ba dumela gore Sathane Diabolo ga se motho eupša ke seka sa bobe seo se lego ka gare ga motho yo mongwe le yo mongwe.

SEO BEIBELE E SE BOLELAGO

Sathane ke motho wa kgonthe. Ke morongwa wa lerabele, sebopiwa sa moya seo se ganetšago Modimo. Beibele e bolela ka Sathane gore ke “mmuši wa lefase le.” (Johane 12:31) O diriša “dipontšho . . . tša bofora” le “bofora” go phethagatša merero ya gagwe.—2 Bathesalonika 2:9, 10.

Beibele e bega ka poledišano ya legodimong ya magareng ga Sathane le Modimo. Ka ge Modimo a ile a boledišana le Sathane, gona Sathane ga se seka sa bobe ka gobane Modimo ga a na bobe ka go yena. (Doiteronomio 32:4; Jobo 2:1-6) Go molaleng gore Sathane ke motho wa kgonthe e sego feela bobe bjo bo mothofaditšwego.

KE KA BAKA LA ENG SEO SE LE BOHLOKWA GO WENA?

Mabaka a Sathane a go nyaka gore o dumele gore ga a gona a swana le a sesenyi seo se utago seo se lego sona e le gore se ka tšwela pele se tshela molao se sa lemogwe. E le gore o itšhireletše go Sathane, sa pele o swanetše go lemoga gore o gona.

 Sathane o dula kae?

“Go madimabe lefase . . . gobane Diabolo o theogetše go [wena].”Kutollo 12:12.

SEO BATHO BA SE BOLELAGO

Ba bantši ba dumela gore Sathane o dula mollong wa dihele bogareng bja lefase. Ba bangwe ba dumela gore o ka gare ga batho ba babe.

SEO BEIBELE E SE BOLELAGO

Sathane ke sebopiwa sa moya, ka gona o dula lefelong leo le sa bonagalego. Sathane o feditše nako e telele a dumeletšwe go tsena le go tšwa ka mo a ratago moo Modimo le barongwa bao ba botegago ba dulago gona. (Jobo 1:6) Lega go le bjalo, ga bjale yena gotee le dibopiwa tše dingwe tše kgopo tša moya ba rakilwe kgauswi le Modimo, gomme ba lahletšwe lefaseng.—Kutollo 12:12.

Na se se ra gore Sathane o dula lefelong le tee le itšego lefaseng? Ka mohlala, mohlomongwe o ile wa bala ka motse wa bogologolo Peregamo wo go bego go thwe ke “moo Sathane a dulago gona.” (Kutollo 2:13) Ge e le gabotse, polelwana yeo e be e šupa tabeng ya go ata ga borapedi bja Sathane moo. Sathane ga a dule lefelong le itšego lefaseng. Go e na le moo, Beibele e bolela gore “mebušo ka moka ya lefase” ke ya gagwe.—Luka 4:5, 6.

Na Sathane a ka gobatša goba a laola batho?

“Lefase ka moka le rapaletše matleng a yo kgopo.”1 Johane 5:19.

SEO BEIBELE E SE BOLELAGO

Batho ba bantši ba dumeletše tutuetšo ya Sathane e ba timetša, gomme ka baka leo ba laolwa ke yena. (2 Bakorinthe 11:14) Ntlha ye e thuša go hlalosa lebaka leo ka lona batho ba paletšwego ke go kaonefatša maemo a lefase.

Beibele gape e bega ka maemo a šoro, ao Sathane le barongwa ba bangwe ba ilego ba laola batho gomme ba ba gobatša nameng.—Mateo 12:22; 17:15-18; Mareka 5:2-5

SEO O KA SE DIRAGO

Ga se wa swanela go boifa matla a Sathane. E le gore o pheme go ba ka tlase ga tutuetšo goba taolo ya Sathane, o swanetše go ithuta gore o laola batho bjang, gore o ‘tsebe maano a gagwe.’ (2 Bakorinthe 2:11) Ka go bala Beibele, o ka hwetša tsebo e bohlokwa ka maano a Sathane gomme wa phema go ba mohlaselwa.

Phema dilo le ge e le dife tšeo di tswalanago le ditiro tša botemona. (Ditiro 19:19) Dilo tšeo di akaretša dipheko, dikgatišo, dibidio, mmino, mananeo a khomphutha ao a kgothaletšago go dirišana le meoya le bonoge.

Beibele e re: “Le ganetše Diabolo, yena o tla le tšhaba.” (Jakobo 4:7) Ka go kwa keletšo e bohlale ya Beibele, o ka itšhireletša ditirong tše mpe tša bohwirihwiri tša Sathane.Baefeso 6:11-18