Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JUNE 2013

Madireng a Lefase

Madireng a Lefase

Lefase

Mokgatlo wa Lefase wa tša Maphelo o phethile ka gore go dula moo go nago le dientšene tša dikoloi tša tisele “go tswalanywa le kotsi e oketšegago ya go ba le kankere ya maswafo,” mohlomongwe le kankere ya sebudula.

Antarctica

Mašaledi a modula le dipeu ao a hweditšwego lebatong la lewatle a utolla gore nywageng e mentši e fetilego, kua Antarctic go be go mela dihlare tša mepalema le dihlare tšeo di melago kgauswi le dithokgwa tša melatšatšing tšeo ga bjale di melago feela ditikologong tša melatšatšing. Ba bantši ba dumela gore nywageng e dimilione e fetilego, marega a kua Antarctic a be a sa tonye kudu e bile “a tloga a se na šobane” gomme boemo bja leratadima bja diphoulong bo be bo sa fapane gakaalo le bja kua mogarafaseng wa equator.

Ireland

Pego yeo e gatišitšwego ka 2012 ke Mokgatlo wa Baruti ba Katholika wa Ireland e bontšhitše gore 87 lekgolong ya Makatholika ao go boledišanwego le ona nageng ye e dumela gore baruti ba swanetše go dumelelwa go nyala; 77 lekgolong e dumela gore basadi ba swanetše go dumelelwa go tsenela boruti.

Dinaga tša Afrika tša ka Borwa bja Sahara le Borwabohlabela bja Asia

Go lekolwa ga diokobatši tša go lwantšha malaria go utolotše gore mafelong a mangwe gantši dihlare tšeo e be e le tša maemo a tlase goba tša bofora, tšeo di bego di dira gore kalafo e se atlege. Kua Borwabohlabela bja Asia, 36 lekgolong ya diokobatši tša mehlala tšeo di hlahlobilwego di ile tša hwetšwa e le tša bofora, go swana le 20 lekgolong ya diokobatši tša mehlala tša dinaga tša Afrika tša ka borwa bja Sahara.

El Salvador

Bogareng bja April 2012, bahlankedi ba mmušo ba ile ba tsebiša letšatši la pele la go hloka polao nywageng e nyakilego go ba e meraro kua El Salvador. Ka ge naga yeo e hlasetšwe ke bošoro bjo bo tswalanywago le dihlaretagi, ka 2011 go bolailwe batho ba 69 go ba bangwe le ba bangwe ba 100 000—e lego tekanyo e šiišago lefaseng.