Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JUNE 2013

 TABA YA LETLAKALA LA KA NTLE: NA RE REKA KUDU?

Ke ka Baka la Eng re Reka?

Ke ka Baka la Eng re Reka?

Nyakišišong ya lefase ka bophara yeo e lokolotšwego ka 2012, batho ba tekanyo ya seripagare bao ba ilego ba arabela ba dumela gore ba be ba reka dilo tšeo ge e le gabotse ba bego ba sa di nyake. Ba tekanyo ya peditharong ba nagana gore bareki ba reka kudu. Go tshwenyega mo go bjalo go ka lokafatšwa. Bareki ba bantši ba kgakgetšwe dikolotong tšeo di oketšegago. Banyakišiši ba bolela gore go reka dilo tše dintši kudu go ka se re kgotsofatše ka mo go feletšego, eupša go ka lebiša kgateletšegong e kgolo le manyaming! Ka gona, ke ka baka la’ng re reka gakaakaa?

KA GE re le bareki, re phela re rekišetšwa dilo ka go se kgaotše. Morero wa barekiši ke ofe? Ke go dira gore dilo tšeo motho a ka kgonago go phela ntle le tšona di bonagale e le dinyakwa. Barekiši ba a tseba gore moreki o laolwa kudu ke maikwelo. Ka gona, dipapatšo le go reka di hlametšwe go dira gore moreki a ikwe a thabile kudu.

Puku ya Why People Buy Things They Don’t Need e re: “Ge moreki a rera go reka selo se sefsa, gantši o ipona a se tsoma, a se hwetša e bile e le sa gagwe.” Ditsebi tše dingwe di nagana gore bareki ba ka thaba kudu ge ba reka moo ba ka feleletšago ba tšewa ke maikwelo. Setsebi sa tša thekišo e lego Jim Pooler se hlalosa gore: “Ge e ba morekiši a ka lemoga gore moreki o ikwa bjang, a ka ikhola ka go tšeega maikwelo le go se kgone go ikemelela ga moreki.”

O ka itšhireletša bjang gore o se ke wa tanywa ke barekiši bao ba nago le bokgoni? Beela maikwelo ka thoko gomme o bapiše dikholofetšo tša barekiši le boemo bja kgonthe.

 KHOLOFETŠO: “Kaonefatša Bophelo bja Gago”

Ke ga tlhago go nyaka go phela bophelo bjo bokaone. Babapatši ba re imetša ka melaetša ya gore dikganyogo ka moka tša rena—boemo bjo bokaone bja tša maphelo, tšhireletšego, go se be le kgateletšego le ditswalano tša kgauswi le ba bangwe—di ka fihlelelwa ka go reka dilo tša maleba.

SEO SE DIREGAGO E LE KA KGONTHE:

Ge dithoto tšeo re nago le tšona di dutše di oketšega, boemo bja bophelo bja rena ge e le gabotse bo ka fokola. Go nyakega nako e oketšegilego gotee le tšhelete gore re hlokomele dithoto tše oketšegilego. Kgateletšego e a oketšega ka baka la dikoloto, gomme nako ya go ba le ba lapa le bagwera e a fokotšega.

Ge dithoto tšeo re nago le tšona di dutše di oketšega, boemo bja bophelo bja rena ge e le gabotse bo ka fokola

Molao wa Motheo: “Gaešita le ge motho a atetšwe ke dilo, fela bophelo bja gagwe ga bo tlišwe ke dilo tše a nago le tšona.”Luka 12:15.

KHOLOFETŠO: “Hwetša Maemo le Botumo”

Ga se batho ba bantši bao ba ka dumelago gore ba reka dilo bakeng sa go kgahla ba bangwe. Lega go le bjalo, Jim Pooler o re: “Ge batho ba reka, gantši e ba e le gore ba phenkgišana le bagwera, baagišani, bao ba šomago le bona gotee le ba leloko.” Ka baka leo, gantši dipapatšo di bontšha dilo tšeo e le tša batho ba atlegilego le ba humilego. Molaetša wa dipapatšo tšeo go bareki ke o rego: “Le wena o ka atlega le go huma!”

SEO SE DIREGAGO E LE KA KGONTHE:

Go kala bophelo bja rena ka go ipapiša le ba bangwe go dira gore re dule re sa kgotsofale. Ge motho a fihlelela selo se itšego seo a bego a se kganyoga, o thoma go duma se sengwe.

Molao wa Motheo: “Morati wa silifera a ka se kgotsofatšwe ke silifera.”Mmoledi 5:10

KHOLOFETŠO: “Ipontšhe Gore o Mang”

Puku ya Shiny Objects e hlalosa gore: “Tsela e tlwaelegilego ya go botša ba bangwe gore re bomang (goba gore re nyaka go ba eng) ke ka tsela yeo re dirišago le go bonagatša dithoto tša rena.” Barekiši ba tseba se gomme ba šomela go tswalanya maina a dilo—kudukudu dilo tša maemo tša maina—le ditsela tše itšego tša go phela le ditekanyetšo tša gona.

O itebelela bjang, gomme o nyaka ba bangwe ba go lebelela bjang? Bjalo ka motho wa fešene goba wa go bogega? Go sa šetšwe gore o nyaka go ba motho wa mohuta mang, barekiši ba holofetša gore ge o ka fo reka leina la go tuma, o ka ba motho wa mohuta woo o kganyogago go ba yena.

SEO SE DIREGAGO E LE KA KGONTHE:

Go reka selo se itšego go ka se fetoše seo re tlogago re le sona goba gwa re nea dika tšeo di kgahlišago, tše bjalo ka go botega.

Molao wa Motheo: “Go ikgabiša ga lena e se be . . . ga go rwala dikgabišo tša gauta goba go apara diaparo tša maphadiphadi, eupša e be ga motho wa sephiring wa pelo.”—1 Petro 3:3, 4.