Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JUNE 2013

 THUŠO BAKENG SA LAPA | LENYALO

Kamoo le ka Kgaotšago “go se Boledišane”

Kamoo le ka Kgaotšago “go se Boledišane”

TLHOHLO

Go tla bjang gore batho ba babedi bao ba ikannego gore ba tla ratana ba fihle boemong bja go tšea diiri tše dintši goba matšatši ba sa boledišane? Ba ipotša gore: ‘Go kaone ka gore re kgaoditše go lwa.’ Lega go le bjalo, kgang ga se ya rarollwa, gomme bobedi bja bona ga se ba thaba.

LEBAKA LA GO DIREGA GA SEO

Go itefeletša. Balekane ba bangwe ba diriša go se boledišane e le tsela ya go itefeletša. Ka mohlala, a re re monna o dira dithulaganyo tša mafelobekeng ka ntle le go rerišana le mosadi wa gagwe. Ge mosadi a se na go tseba ka seo, o a galefa gomme a mmotša gore ga a mo naganele. Monna yena o mmotša gore o kgopišega feela. Mosadi o tšwa a galefile gomme a homolela monna wa gagwe. Ge e le gabotse, mosadi o re: “O nkwešitše bohloko, ka gona le nna ke tlo go kweša bohloko.”

Go ikhola. Ba bangwe ba homolela balekane ba bona e le tsela ya gore ba hwetše seo ba se nyakago. Ka mohlala, nagana ge monna le mosadi ba rera go tšea leeto gomme mosadi a nyaka gore ba sepele le batswadi ba gagwe. Monna o a gana. O re go yena: “O nyalane le nna, e sego le batswadi ba gago.” Ke moka monna o homolela mosadi wa gagwe le go mo hlokomologa, e le ge a holofetše gore o tla hwa matwa gomme a dira seo yena a se nyakago.

Ke therešo gore go homola ka nakwana go ka nea banyalani sebaka sa go theola maswafo ge kgalefo e gakala. Go homola mo go bjalo e ka ba mo go holago. Beibele e re go na le “nako ya go homola.” (Mmoledi 3:7) Eupša ge e ba go dirišwa e le tsela ya go itefeletša goba go ikhola, go se boledišane ga go fo dira gore ngangišano e tšee nako e telele eupša gape go senya le tlhompho yeo banyalani ba hlomphanago ka yona. Le ka thibela bjang gore seo se se ke sa le diragalela?

 SEO O KA SE DIRAGO

Mogato wa pele wa go fediša go se boledišane ke go lemoga seo go se boledišane go lego sona, e lego mokgwa woo o šomago gabotse ka nakwana. Ke therešo gore go homola e ka ba tsela ya go itefeletša goba go gapeletša molekane wa gago gore a go nee seo o se nyakago. Eupša na ye ke tsela yeo o tlogago o nyaka go swara motho yo o ikannego gore o tla mo rata? Go na le ditsela tše kaone tša go rarolla diphapano.

Eba le temogo. Beibele e re lerato “ga le rumolege.” (1 Bakorinthe 13:4, 5) Ka gona dula o theošitše maswafo ge molekane wa gago a bolela a galefile mantšu a swanago le a rego, “Ga o ke o theetša” goba “O dula o šaletše.” Go e na le moo, lemoga gore o nyaka go re’ng ka mantšu ao. Ka mohlala, mantšu a rego, “Ga o ke o theetša” ge e le gabotse a ka ba a era gore, “Ke bona e ka ga o tšee dipono tša ka e le tša bohlokwa.”—Molao wa motheo wa Beibele: Diema 14:29.

Nagana ka molekane wa gago e le sebapadigotee le wena e sego e le mophenkgišani wa gago

Bolelela fase. Dingangišano di hlabiša batho mašata ge di dutše di tšwela pela. Eupša go na le seo o ka se dirago e le go thibela ngangišano gore e se ke ya gakala. Bjang? Puku ya Fighting for Your Marriage e re: “Go bolela ka boleta le go dumelelana le pono ya molekane wa gago ke didirišwa tše matla tšeo o ka di dirišago bakeng sa go tloša go se kwane le go fediša go hlaba mašata. Gantši ke sona seo se nyakegago.”—Molao wa motheo wa Beibele: Diema 26:20.

Naganela lena ka bobedi e sego wena feela. Beibele e re: “Anke yo mongwe le yo mongwe a tšwele pele a tsoma seo se holago motho yo mongwe, e sego seo se holago yena a nnoši.” (1 Bakorinthe 10:24) Ge e ba o nagana ka molekane wa gago e le sebapadigotee le wena e sego e le mophenkgišani wa gago, gona o ka no se kgopišege, wa se ngangišane le molekane wa gago gotee le go se nyake go boledišana le yena.—Molao wa motheo wa Beibele: Mmoledi 7:9.

Go se boledišane ga go sepedišane le seo Beibele e se bolelago ge e re: “Yo mongwe le yo mongwe wa lena a rate mosadi wa gagwe bjalo ka ge a ithata; ka lehlakoreng le lengwe, mosadi o swanetše go ba le tlhompho e tseneletšego go monna wa gagwe.” (Baefeso 5:33) Ke ka baka la’ng o sa dire tumelelano le molekane wa gago ya gore go se boledišane ga go a dumelelwa lenyalong la lena?

 

Ithute ka mo go oketšegilego

Kamoo go ka Phengwago Polelo e Gobatšago

O ka dira’ng ge e ba wena le molekane wa gago le dumeletše mantšu a gobatšago a kgoma tswalano ya lena?

Kgopela Thušo ya Modimo Gore o be le Lenyalo le le Thabilego

Go diriša dipotšišo tše pedi tše bonolo go ka go thuša go kaonefatša lenyalo la gago.