Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! JUNE 2013

Kamoo o ka Dirišago Tšhelete ka mo go Lekalekanego

Kamoo o ka Dirišago Tšhelete ka mo go Lekalekanego

Go oketša kgateletšong yeo re lebeletšanego le yona ya barekiši, maikwelo a rena le mekgwa ya rena di ka tlaleletša tabeng ya go diriša ga rena tšhelete ka mo go feteletšego. Ditšhišinyo tše tshela tša go go thuša go diriša tšhelete ka mo go lekalekanego ke tše.

  1. O se ke wa reka o se wa rera. Na o thabišwa ke go reka le go hwetša phokoletšo? Ge e ba go le bjalo, o ka ba le tshekamelo ya go reka o se wa rera. Bakeng sa go thibela mokgwa woo, ema go se nene gomme o naganišiše ka ditlamorago tša go reka dilo tšeo o rerago go di reka, go ba le tšona le go di hloko- mela. Ema gomme o gopole dilo tšeo o ilego wa di reka nakong e fetilego o se wa rera gomme ka morago wa itshola. Iphe nako ya go nagana ka seo pele o ka dira phetho.

  2. Phema go rekela gore o ikwe o thabile. Go reka go ka go dira gore o ikwe o thabile ka nakwana. Eupša ge o boelwa ke manyami, o ka ikwa o gapeletšega kudu gore o reke bakeng sa gore o ikwe o thabile. Go e na le gore o rekele gore o ikwe o thabile, tsoma bagwera bao ba ka go thekgago goba o itšhidulle ka tsela itšego bjalo ka go sepelasepela.

  3.   O se ke wa itapološa ka go reka. Mafelo a maemo a godimo a melokeloke ya mabenkele a dirile gore go reka go fetoge boitapološo. Gaešita le ge o ka etela lefelong la mabenkele goba wa fetleka Inthaneteng feela bakeng sa go ithabiša, bontši bja dilo tšeo o di bonago di hlametšwe go tsoša kganyogo ya gago ya go nyaka go reka. Reka feela ge o ena le selo seo o nyakago go se reka gomme o reke sona feela.

  4. Kgetha bagwera ba gago ka šedi. Tsela yeo bagwera ba gago ba phelago ka yona le dipolelo tša bona di tutuetša dikganyogo tša gago kudu. Ge e ba o diriša tšhelete ka mo go feteletšego gore o swane le bagwera ba gago, gona kgetha bagwera bao ba sa tšeelego tšhelete le dithoto godimo.

  5. Diriša dikarata tša mokitlana ka bohlale. Dikarata tša mokitlana di go nolofaletša go reka mola o sa nagane ka ditlamorago. Leka go lefelela dikoloto tša dikarata tša mokitlana ka botlalo kgwedi le kgwedi. Tseba ditswalo tša karata ya gago ya mokitlana le ditefelo tša gona, gomme o bapiše ditshenyagalelo tša dikarata tša mokitlana tšeo di bapatšwago bakeng sa go hwetša dikarata tšeo di sa bitšego kudu. Ela hloko dikarata tšeo di nago le ditshenyagalelo tše oketšegilego tša kadimo gomme di nea mehola yeo o sa e nyakego. Go e na le go reka ka sekoloto, boloka tšhelete bakeng sa go reka dilo tše dikgolo.

  6. Tseba boemo bja gago bja tša ditšhelete. Go bonolo go diriša tšhelete ka mo go feteletšego ge e ba o sa kgonthišega ka boemo bja gago bja tša ditšhelete. Boloka dipego tšeo di lego nakong gomme o tsebe boemo bja gago bja tša ditšhelete ka botlalo. Dira thulaganyo ya kgwedi le kgwedi ya tirišo ya tšhelete yeo e theilwego mogolong wa gago le ditshenyagalelong tša nakong e fetilego. Dula o tseba gore tšhelete ya gago e dirišetšwa eng gomme o bapiše seo le thulaganyo ya gago. Kgopela mogwera yoo o mmotago gore a go thuše go kwešiša ditaba tša tša ditšhelete tšeo o sa tlwaelanago le tšona.