Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  May 2013

 PONO YA BEIBELE

Sebopego sa Modimo

Sebopego sa Modimo

Modimo o na le mmele wa mohuta mang?

“Modimo ke Moya.”—Johane 4:24.

SEO BEIBELE E SE BOLELAGO

Beibele e hlalosa Modimo e le motho wa moya. (2 Bakorinthe 3:17) Ka baka leo, o re phagametše kudu gomme re ka se kgone go mo lemoga ka dikwi tša rena tša nama. Timotheo wa pele 1:17 e re Modimo ke: “Kgoši ya bosafelego, yeo e sa senyegego, yeo e sa bonagalego.” Beibele gape e re: “Ga go motho yo a kilego a bona Modimo le ka mohla.”—1 Johane 4:12.

Mmopi wa rena o re phagametše kudu moo e lego gore re ka se nagane le gore o lebelelega bjang. Jesaya 40:18 e re: “Le ka swantšha Modimo le mang, le gona le ka mo swantšha le eng?” Gaešita le magodimo a makatšago ga se selo ge a bapišwa le Ramatlaohle.—Jesaya 40:22, 26.

Lega go le bjalo, go na le dibopiwa tše bohlale tšeo di kgonago go bona Modimo le go boledišana le yena di mo lebeletše. Bjang? Ka gobane le tšona ke meoya gomme di phela legodimong. (1 Dikgoši 22:21; Baheberu 1:7) Ge a bolela ka dibopiwa tše tšeo di phagametšego batho, tšeo gape di bitšwago barongwa, Jesu Kriste o itše: “Ka mehla ba bona sefahlego sa Tate yo a lego legodimong.”—Mateo 18:10.

 Na Modimo ke mobagohle?

“Ka gona, le swanetše go rapela ka tsela ye: ‘Tatago rena wa magodimong.’”—Mateo 6:9.

SEO BEIBELE E SE BOLELAGO

Beibele ga e rute gore Modimo ke mobagohle, goba gore o gohle ka dinako tšohle, bjalo ka ge eka ke matla a itšego ao e sego motho. Go e na le moo, bjalo ka ge mantšu a Jesu ao a hwetšwago go Mateo 6:9 le 18:10 a bontšha, Modimo ke motho—‘Tate’—gomme o dula legodimong, e lego “lefelong la [gagwe] le le tsepamego la bodulo.”—1 Dikgoši 8:43.

Go ya bofelong bja bophelo bja gagwe, Jesu o itše: “Ke tlogela lefase gomme ke ya go Tate.” (Johane 16:28) Ka morago ga go hwa ga gagwe e le motho wa nama le go tsošwa ga gagwe e le motho wa moya, Kriste o ile a rotogela “legodimong gore bjale a bonagale pele ga Modimo.”Baheberu 9:24.

Ditherešo tše tša mabapi le Modimo di bohlokwa. Ka baka la’ng? Gare ga tše dingwe, ka gobane Modimo ke motho, re ka ithuta ka yena le go batamela kgauswi le yena. (Jakobo 4:8) Se sengwe ke gore therešo ka Modimo e re šireletša borapeding bja maaka, bjo bjalo ka go rapela diswantšho gotee le dilo tše di sa phelego. Johane wa pele 5:21 e re: “Bana ba ba rategago, itišeng go medingwana.”

Batho ba bopilwe bjang ka seswantšho sa Modimo?

“Modimo a bopa motho ka seswantšho sa gagwe, a mmopa ka go swantšha ka yena Modimo; a bopa yo motona le yo motshadi.”—Genesi 1:27.

SEO BEIBELE E SE BOLELAGO

Bjalo ka batho, re na le bokgoni bja go bonagatša dika tša semelo sa Modimo, tše bjalo ka lerato, toka le bohlale. Ge e le gabotse, Beibele e re: “Ebang baekiši ba Modimo, le le bana ba ba rategago.”—Baefeso 5:1, 2.

Le rena Modimo o re dirile re le dibopiwa tšeo di nago le boikgethelo, e lego seo se dirago gore re kgone go kgetha se se nepagetšego go e na le se se fošagetšego gotee le go rata ba bangwe ka ditsela tše di fapafapanego. (1 Bakorinthe 13:4-7) Gape re na le bokgoni bja go itlhamela dilo, go thabela dilo tše dibotse le go makatšwa ke lefase leo le re dikologilego. Godimo ga tšohle, re kgahlegela dilo tša moya, e lego kganyogo ya tlhago ya go ithuta ka Mmopi wa rena le thato ya gagwe ka rena.—Mateo 5:3.

Kamoo Beibele e ka go thušago ka gona. Ge re dutše re ithuta ka Modimo le go mo ekiša, ke moo re phelago ka tsela yeo a bego a rerile gore re phele ka yona. Ka baka leo, re hwetša lethabo le legolo bophelong, gotee le kgotsofalo ya kgonthe le khutšo ya ka gare. (Jesaya 48:17, 18) Ee, Modimo o tseba gore dika tša gagwe tše di rategago di kgoma dipelo tša batho, di gogela batho ba dipelo tše botegago go yena le go ba tsenya tseleng e išago bophelong bjo bo sa felego.—Johane 6:44; 17:3.