Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! MAY 2013

 POLEDIŠANO | RACQUEL HALL

Mosadi wa Mojuda o Hlalosa Lebaka Leo a Ilego a Hlahloba Tumelo ya Gagwe Lefsa

Mosadi wa Mojuda o Hlalosa Lebaka Leo a Ilego a Hlahloba Tumelo ya Gagwe Lefsa

Racquel Hall o belegwe ke mosadi wa Moisiraele wa Mojuda le tate wa Moaustria yo a bego a sokologetše bodumeding bja Sejuda. Batswadi ba mmagwe e be e le ba bodumedi bja Zion bao ba bego ba hudugetše Isiraele ka 1948, e lego ngwageng woo e ilego ya ba Naga yeo e ipušago. Phafoga! e ile ya botšiša Racquel mabapi le seo se dirilego gore a hlahlobišiše tumelo ya gagwe ya Sejuda.

Re botše ka setlogo sa gago.

Ke belegwe ka 1979 kua United States. Ge ke be ke ena le nywaga e meraro, batswadi ba ka ba ile ba hlalana. Mma o ile a nkgodiša go ya ka meetlo ya Sejuda gomme a nthomela go di-yeshiva, goba dikolo tša Sejuda. Ge ke be ke ena le nywaga e šupa, re ile ra yo dula Isiraele lebaka la ngwaga, gomme ka tsena sekolo tikologong ya batho ba šomago yeo e bitšwago kibbutz. Ke moka, nna le mma re ile ra hudugela Mexico.

Gaešita le ge go be go se na sinagoge tikologong, ke ile ka kgomarela meetlo ya Sejuda. Ke be ke gotetša dikerese ka Sabatha, ke bala puku ya rena ya Torah, gomme ke rapela ke thušwa ke siddur, goba puku ya dithapelo. Sekolong, ke be ke fela ke botša bao ke tsenago le bona ka klaseng gore bodumedi bja ka e be e le bja mathomo. Ke be ke se ka ka ka bala seo ka tlwaelo se bitšwago Testamente e Mpsha, yeo e ahlaahlago bodiredi le dithuto tša Jesu Kriste. Ge e le gabotse, mma o ile a ntemoša gore ke se ke ka e bala, ka ge a be a boifa gore ke tla šilafatšwa ke dithuto tša yona.

Ke ka baka la eng o ile wa dira phetho ya go bala Testamente e Mpsha?

Ge ke fetša nywaga e 17, ke ile ka boela United States go yo feleletša thuto ya ka e phagamego. Gona moo, motho yo mongwe yo ke bego ke mo tlwaetše o ile a re yena ke Mokriste gomme a mpotša gore bophelo bja ka e be e tla ba bjo bo sa felelago ntle le Jesu.

Ke ile ka re go yena: “Batho bao ba dumelago go Jesu ba lahlegile.”

O ile a botšiša ka gore: “Na o šetše o kile wa bala Testamente e Mpsha?”

Ke ile ka araba ka gore: “Aowa.”

O ile a re: “Bjale na ga o nagane gore ga o tsebe selo gomme o  ntšha dikgopolo tša gago ka selo seo o sa tsebego selo ka sona?”

Mantšu a gagwe a ile a ntlhaba kudu, ka ge ka mehla ke be ke go tšea e le bošilo gore motho a ntšhe dikgopolo tša gagwe a sa tsebe selo. Ke swabišitšwe ke seo, ke ile ka ya le Beibele ya gagwe gae gomme ka thoma go bala Testamente e Mpsha.

Seo o bego o se bala se ile sa go kgoma bjang?

Ke ile ka makatšwa ke go hwetša gore bangwadi ba Testamente e Mpsha e be e le Bajuda. Le gona, ge ke dutše ke bala, ke moo ke ilego ka bona gore Jesu e be e le Mojuda yo botho le yo a ikokobeditšego yo a bego a nyaka go thuša batho, e sego go ikhola ka bona. Ke ile ka ba ka ya bokgobapukung ka yo adima dipuku tšeo di bolelago ka yena. Lega go le bjalo, ga go le e tee ya tšona yeo e ilego ya nkgodiša gore e be e le Mesia. Tše dingwe di be di mo šupa e le Modimo, e lego pono yeo e bego e se na tlhaologanyo go nna. Go ba gona, Jesu o be a rapela mang—na o be a ithapela? Go feta moo, Jesu o ile a hwa. Lega go le bjalo, Beibele ge e bolela ka Modimo e re: “Ga o hwe.” *

O ile wa hwetša bjang dikarabo tša dipotšišo tšeo?

Therešo ga e ikganetše, gomme ke be ke ikemišeditše go hwetša therešo. Ka gona, ke ile ka rapela Modimo go tšwa pelong e bile ke lla—e le la mathomo ke rapela ke sa thušwe ke siddur ya ka. Go se go ye kae ka morago ga ge ke feditše go rapela ke ge go kokotwa mojako. E be e le Dihlatse tša Jehofa tše pedi. Di ile tša mpha e nngwe ya dikgatišo tša tšona tša go ithuta Beibele. Kgatišo ye gotee le dipoledišano tšeo di ilego tša latela tšeo ke bilego le tšona le Dihlatse, di ile tša nkgodiša gore ditumelo tša tšona di be di theilwe Beibeleng. Ka mohlala, Dihlatse ga di tšee Jesu e le karolo ya Boraro Botee, eupša di mo tšea e le “Morwa wa Modimo” * le “mathomo a tlholo ya Modimo.” *

Ka moragonyana ga moo, ke ile ka boela Mexico, moo ke ilego ka tšwela pele ke ithuta le Dihlatse ka boporofeta bja mabapi le Mesia. Ke ile ka makatšwa ke go bona gore go na le diporofeto tše dintši gakaakaa! Lega go le bjalo, ke ile ka dula ke sa kgolwe ka tsela e itšego. Ke be ke ipotšiša gore: ‘Na Jesu e be e le yena feela yoo a swanelago tlhaloso yeo?’ le gore ‘Go thwe’ng ge e ba e be e fo ba sebapadi seo se hlalefilego seo se itirago eka ke yena?’

Ke eng seo se ilego sa go kgodiša?

Dihlatse di ile tša mpontšha diporofeto tšeo go se nago moikgakanyi yo a bego a ka di diragatša. Ka mohlala, nywageng e fetago e 700 e sa le pele, moporofeta Mika o ile a re Mesia o be a tla belegelwa Betlelehema, kua Judea. * Ke mang yo a ka laolago gore yena o tla belegelwa kae? Jesaya o ile a ngwala gore Mesia o be a tla bolawa bjalo ka sesenyi seo se nyatšegago, eupša o be a tla bolokwa le bahumi. * Dipolelelopele tše ka moka di ile tša phethagala ka Jesu.

Karolo ya mafelelo ya bohlatse e be e akaretša lešika la Jesu. Beibele e be e boletše gore Mesia e be e tla ba setlogolo sa Kgoši Dafida. * Ka ge Bajuda ba bogologolo ba be ba boloka dipego tša mašika tša batho bohle le tša ka gae, ge nkabe Jesu e be e se wa leloko la Dafida, manaba a gagwe a ka be a ile a goeletša seo a le ka godimo ga dintlo! Eupša ga se a ka a dira bjalo, ka gobane go tswalana ga Jesu le Dafida go be go sa ganetšege. Mašaba a ile a ba a mmitša “Morwa wa Dafida.” *

Ka 70 C.E.—nywaga e 37 ka morago ga lehu la Jesu—madira a Roma a ile a fediša Jerusalema, gomme dipego tša mašika di ile tša lahlega goba tša fedišwa. Ka baka leo, e le gore a hlaolwe go ya ka lešika, Mesia o ile a swanelwa ke go tšwelela pele ga 70 C.E.

Go lemoga se go ile gwa go kgoma bjang?

Go Doiteronomio 18:18, 19, go boletšwe e sa le pele gore Modimo o be a tla tsoša moporofeta yo a swanago le Moshe kua Isiraele. “Ke tla sekiša [motho yo mongwe le yo mongwe] yo a ka se kego a theetša mantšu ao moporofeta yoo a tlago go a bolela ka leina la ka.” Go ithuta ga ka Beibele ka moka ka mo go tseneletšego go ile gwa nkgodiša gore Jesu wa Natsaretha e be e le moporofeta yoo.