Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! APRIL 2013

 PONO YA BEIBELE

Boemo bja tša Maphelo

Boemo bja tša Maphelo

Na Modimo o na le taba le tsela yeo re swarago mebele ya rena ka yona?

“O se ke wa ba gare ga bao ba nwago beine kudu, gare ga bao ba jago nama ka bojato.”—Diema 23:20.

KE KA BAKA LA ENG GO LE BOHLOKWA?

Beibele ga se puku ya tša kalafo; e bile ga e laole karolo e nngwe le e nngwe ya boitshwaro bja motho. Lega go le bjalo, o ka holwa ke go kwešiša pono ya Modimo ka boemo bja tša maphelo bjalo ka ge e hlaloswa ka Beibeleng.

SEO BEIBELE E SE BOLELAGO

Ditemana tše dintši tša Beibele di nea tshedimošo mabapi le kamoo Modimo a ikwago ka gona ka tsela yeo re swarago mebele ya rena ka yona. Ka mohlala, Beibele e thibela go fetiša tekanyo mo go gobatšago, go akaretša botagwa le bojato. (Diema 23:20) Molao wa Modimo woo o bego o filwe Baisiraele ba bogologolo o be o akaretša ditaelo tšeo di bego di laola gomme mabakeng a mangwe di bego di thibela malwetši. Molao gape o be o ena le ditaelo tše di lebanyago tša tšhireletšego bakeng sa go thibela go gobala. (Doiteronomio 22:8) Go molaleng gore Beibele e re kgothaletša go hlokomela mebele ya rena le go gata megato e kwagalago ya go šireletša boemo bja rena bja tša maphelo.

 Go ya ka Beibele, ke ka baka la eng re babja?

“Ka motho o tee sebe se tsene lefaseng gomme lehu la tsena ka sebe.”—Baroma 5:12.

SEO BATHO BA SE BOLELAGO

Batho ba bantši ba dumela gore bolwetši e fo ba e le phošo ya tlhagelelo ya batho. Ba bangwe ba nagana gore matla a sa tsebjego, a bjalo ka meoya e mebe, ke ona a re bakelago mathata a tša maphelo.

SEO BEIBELE E SE BOLELAGO

Go ya ka Beibele, re babja ka baka la ge motho wa pele a ile a rabela go Modimo. (Baroma 5:12) Pele ga ge batswadi ba rena ba pele, Adama le Efa, ba ka rabela, ba be ba ena le boemo bjo bo phethagetšego bja tša maphelo. Ba be ba tseba gore ba be ba tla hwa ge ba be ba ka intšha tlhokomelong ya Modimo e lerato. (Genesi 2:16, 17) Lega go le bjalo, ba ile ba senya ka boomo segwera sa bona le Modimo gomme ba lahlegelwa ke phethagalo ya bona. *

Go se phethagale ga batswadi ba rena ba pele ba marabele go fetišeditšwe go rena. Ka baka leo, re sa dutše re babja go sa šetšwe maiteko ka moka a go fediša malwetši a batho.

O KA DIRA ENG?

Beibele e ruta gore ge o ka boelana le Modimo ka go kwa melao ya gagwe e bohlale ya motheo, o tla feleletša ka go ba le boemo bjo bo phethagetšego bja tša maphelo lefaseng la paradeise. (Jesaya 33:24) Modimo o holofetša go fediša bohloko, bolwetši le lehu.—Kutollo 21:3, 4.

Na Beibele e thibela tlhokomelo ya tša kalafo?

“Batho ba ba phetšego gabotse ga ba nyake ngaka, eupša ba babjago ba a e nyaka.”—Mateo 9:12.

SEO BATHO BA SE BOLELAGO

Batho ba bangwe ba kgothaletša phodišo ya moya (yeo gape e tsebjago e le phodišo ya tumelo) go e na le tlhokomelo ya tša kalafo.

SEO BEIBELE E SE BOLELAGO

Modimo o ile a dumelela ditsebi tša tša maphelo di šoma bathong ba gagwe mehleng ya Beibele. (Genesi 38:28; Bakolose 4:14) Ka Beibeleng, ga go selo seo se bontšhago gore Modimo o be a sa kgahlwe ke ge ba diriša dimela tša go alafa, ditlolo, go ja dijo tše di kgethegilego gotee le mekgwa e mengwe ya tša kalafo. Ge e le gabotse, Jesu o ile a bolela gore “batho ba ba phetšego gabotse ga ba nyake ngaka, eupša ba babjago ba a e nyaka.”—Mateo 9:12.

Lega go le bjalo, Beibele ga e fo dumelela mehuta ka moka ya kalafo. Ka mohlala, Beibele ga e dumelele mokgwa wa mehleng yeno wa phodišo ya tumelo. Le gona Modimo ga a dumelele diphodišo tšeo di akaretšago mekgwa ya go dirišana le meoya. (Bagalatia 5:19-21) Ka ntle le mekgwa yeo Beibele e sa e dumelelego, selo se se nago le tlhaologanyo seo o ka se dirago ge o babja e tla ba go tsoma tlhokomelo ya maleba ya tša kalafo ka pelapela, ge e ba e hwetšagala.

^ ser. 10 Sehlogong se, re diriša mantšu “phethagala” le “phethagalo” go bolela ka boemo bjo bobotse bja tša maphelo bjoo Modimo a bopilego batho ba pele ba ena le bjona, ba sa kgongwe ke bolwetši le lehu.