Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! APRIL 2013

 DINAGA LE BATHO

Go Etela Indonesia

Go Etela Indonesia

INDONESIA e bopša ke dihlakahlaka tše 17 000. Batho ba yona ba tsebja ka mo go kgethegilego ba ena le bogwera, go se fele pelo, botho le go amogela baeng.

Dijo tša Indonesia gantši di akaretša reise le dišebo tše dingwe—tšeo gantši di tšhelwago dinoko—gotee le dienywa. Mafelong a mangwe, malapa a ja a dutše legogweng, a eja ka diatla gomme a kopanya sešebo le reise. Maindonesia a mantši a bolela gore dijo tšeo di jewago ka tsela ye di bose.

Seenywa se se bitšwago durian se na le dinama tše nago le meetse tša makhura e bile se ratwa ke batho ba bantši go sa šetšwe monkgo wa sona o hlabago

Maindonesia a rata bokgabo, go bina le mmino. Seletšo seo se bitšwago angklong ke seletšo seo se tlwaelegilego sa Indonesia; se dirilwe ka dinaka tša semela sa bamboo tšeo di kgomareditšwego ka go arogana foreimeng. Dinaka tšeo di beakanywa ka tsela ya gore di tšweletše medumo e itšego ge di šikinywa. Bakeng sa go bapala modumo o itšego, dibapadi tše mmalwa di swanetše go swarišana, se sengwe le se sengwe se šikinye seletšo sa sona sa angklong ka nako e nepagetšego.

Phoofolo e bitšwago orangutan—yeo e hwetšwago kudu dithokgweng tša dipula tša Sumatra le Borneo—ke phoofolo e kgolo kudu lefaseng yeo e dulago dihlareng. Roto ya yona e gotšego ka mo go feletšego e ka imela dikhilograma tše 90 e bile e na le matsogo a botelele bja dimithara tše 2

Indonesia e ile ya tutuetšwa kudu ke Bohindu le Bobuddha go fihlela lekgolong la bo-15 la nywaga C.E. Lekgolong la bo-16 la nywaga, Bomoseleme bo ile bja thoma go tutuetša setšo sa Indonesia. Mayuropa ao a tsomago dinoko a ile a fihla lekgolong la bo-16 la nywaga gomme a tliša madumedi a Bojakane.

 Dihlatse tša Jehofa, tšeo di tsebjago lefaseng ka bophara ka modiro wa tšona wa go ruta ka Beibele, di be di dutše di swaregile ka modiro woo kua Indonesia ga e sa le go tloga ka 1931. Ga bjale, go na le Dihlatse tša ka godimo ga tše 22 000 kua Indonesia gomme di dira maiteko a go fihlelela difoa. Morago bjale, batho ba ka godimo ga ba 500 ba bile gona sebokeng se se kgethegilego sa polelo ya diatla seo se bego se swerwe ke Dihlatse tša Jehofa sa go gopola lehu la Jesu Kriste.

Phafoga! e gatišwa ka maleme a 98, go akaretša le Seindonesia (seo gape se bitšwa Bahasa Indonesia).