Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! APRIL 2013

 TABA YA LETLAKALA LA KA NTLE

Bofelo bja Bošoro bja ka Gae

Bofelo bja Bošoro bja ka Gae

Boemo 1: Batswadi ba Isabel * ba etile. Ba thabela mantšiboa ba ena le morwedi wa bona gotee le monna wa gagwe, ba boledišana ba thabile. Motswadi le ge e le ofe o be a ka thabela gore morwedi wa gagwe o nyetšwe ke monna wa mohuta wo. O mo swere ka botho.

Boemo 2: Frank o galefile o šoro. Le mo nakong ye, o tla ntšha bogale bja gagwe bjalo ka mehleng—seo go yena se bolelago gore o swanetše go itia mosadi wa gagwe sefahlegong, a mo rage, a mo goge ka meriri goba a bethantšhe hlogo ya gagwe leboelela lebotong.

O KA makatšwa ke go kwa gore maemo a ka bobedi a bolela ka banyalani batee.

Go swana le batho ba bantši bao ba bakago bošoro bja ka gae, Frank o tseba go itira motho yo botse ge a le moo a bonwago ke batho goba ge a na le batswadi ba mosadi wa gagwe. Eupša ge a na le mosadi wa gagwe feela, Frank ke yo šoro ka go fetišiša.

Banna ba bantši ba swanago le Frank ba goletše malapeng ao a nago le bošoro, gomme ge ba šetše ba godile ba nagana gore boitshwaro bja bona bo a amogelega—e bile bo  tlwaelegile. Eupša ga go na seo se tlwaelegilego ka bošoro bja ka gae. Ke ka baka leo batho ba bantši ba makalago ge ba ekwa gore monna o bethile mosadi wa gagwe.

Le gona, bošoro bja ka gae bo atile ka tsela e hlobaetšago. Ka mohlala, kua United States, nyakišišo e nngwe e hweditše gore ka letšatši letee mafelong ao go ona go leletšwago megala bakeng sa go kgopela thušo mabapi le bošoro bja ka gae, nageng ka moka go be go hwetšwa palogare ya megala ya ka godimo ga 16 ka motsotso. Bošoro bja ka gae ke leuba la lefase ka moka leo le ka hwetšwago bathong ba ditšo ka moka, ba maemo a sa swanego a boiphedišo le ba maemo a sa swanego setšhabeng. Ka ge ditiragalo tše dintši tša gona di sa begwe, ga go pelaelo gore boemo bo mpefetše go feta kamoo dipalopalo di bontšhago ka gona. *

Dipego tša bošoro bja ka gae di tsoša dipotšišo tše di latelago: Go tla bjang gore monna a be a fihle bokgoleng bja go swara motho le ge ele ofe—kudukudu mosadi wa gagwe—ka sehlogo gakaakaa? Na banna bao ba bethago basadi ba bona ba ka thušwa?

Dihlatse tša Jehofa, bagatiši ba makasine wo, di dumela gore keletšo ya Beibele e šomago e ka thuša balekane ba nago le bošoro go fetoša mokgwa wa bona. Na phetogo e bjalo e bonolo? Aowa. Na e a kgonega? Ee! Thuto ya Beibele e thušitše ba bantši gore ba tlogele go ba ba šoro gomme e be batho ba botho le ba nago le tlhompho. (Bakolose 3:8-10) Ela hloko mohlala wa Troy le Valerie.

Tswalano ya lena e be e le bjang mathomong?

Valerie: Bošegong bjoo Troy a ilego a mpeeletša ka bjona, o ile a mphasola kudu moo ke ilego ka fetša beke ke na le matetelo. O ile a kgopela tshwarelo ka kudu gomme a nkholofetša gore o be a ka se tsoge a bušeleditše seo.  Nywageng yeo e ilego ya latela, ke ile ka kwa mantšu ao gantši kudu.

Troy: Ke be ke selekwa ke selo le ge e le sefe—ka mohlala, ge mosadi a be a ka apea ka morago ga nako. Ke ile ka betha Valerie ka sethunya gatee. Lebakeng le lengwe, ke ile ka mmetha o šoro moo ke bego ke nagana gore ke mmolaile. Ka morago, ke ile ka leka go mo tšhošetša gore ke tla bolaya morwa wa rena ke mmeile thipa mogolong.

Valerie: Ke be ke dula ke tšhogile. Ka dinako tše dingwe ke be ke swanelwa ke go tšhaba go fihlela ge Troy a theošitše maswafo. Gaešita le ge ke be ke bethwa o šoro, ke be ke hwetša ke palelwa kudu ke go kgotlelela go hlaselwa ka mantšu go feta go bethwa.

Troy, na o be o dutše o le motho yo šoro?

Troy: Ee, go tloga bjaneng bja ka. Ke goletše tikologong ya bošoro. Tate o be a dula a betha mma pele ga ka le bana bešo. Ka morago ga ge a tlogile, mma o ile a dula le monna yo mongwe, gomme le yena o ile a mmetha. O ile a ba a kata kgaetšedi ya ka—gotee le nna. O ile a swarwa a ya kgolegong bakeng sa seo. Go ba gona, ke a lemoga gore ditirong tšeo ga go seo nka itshwarelelago ka sona bakeng sa mokgwa wo wa ka.

Valerie, ke ka baka la eng o ile wa kgetha go dula lenyalong le?

Valerie: Ke be ke boifa. Ke be ke ipotšiša gore, ‘Go thwe’ng ge e ba a ka nnyaka a nkhwetša gomme a bolaya nna goba batswadi ba ka? Go thwe’ng ge e ba nka mmega gomme boemo bja mpefalela pele?’

Dilo di thomile go fetoga neng?

Troy: Mosadi wa ka o ile a thoma go ithuta Beibele le Dihlatse tša Jehofa. Mathomong, ke be ke mo hufegela ka bagwera ba gagwe ba bafsa, gomme ke nagana gore ke be ke swanetše go mo šireletša go seo ke bego ke bona e le sehlotswana se sa tlwaelegago. Ka gona, ke ile ka ba yo šoro le go feta, e sego go Valerie feela eupša le go Dihlatse. Eupša ka letšatši le lengwe morwa wa rena wa nywaga e mene, e lego Daniel, yo a bego a swerwe ke bolwetši bja go wa, o ile a robala sepetlele lebaka la mo e nyakilego goba dibeke tše tharo. Nakong yeo, Dihlatse di ile tša re direla dilo tše dintši kudu—gaešita le go fihla bokgoleng bja go hlokomela morwedi wa rena wa nywaga e tshela, e lego Desiree. Hlatse e nngwe ka morago ga go šoma bošego, e ile ya hlwa le Daniel e le gore Valerie a kgone go robala. Botho bja batho bao—bona batho bao ke bego ke ikgogomošetša bona kudu—bo ile bja nkgoma e le ruri. Ke ile ka lemoga gore ke be  ke bone kamoo Bakriste ba therešo ba itshwarago ka gona, ka baka leo ka kgopela Dihlatse gore di ithute Beibele le nna. Ge ke dutše ke ithuta Beibele, ke ile ka ithuta tsela yeo monna a swanetšego go swara mosadi wa gagwe ka yona le yeo a sa swanelago go mo swara ka yona. Ke ile ka tlogelela sa ruri mokgwa wa ka wa bošoro le go swara ba bangwe gampe. Ke ile ka feleletša ke le yo mongwe wa Dihlatse tša Jehofa.

Ke melao efe ya motheo ya Beibele yeo e go thušitšego go fetoga?

Troy: Ke e mentši kudu. Go 1 Petro 3:7, Beibele e re ke swanetše go ‘godiša’ mosadi wa ka. Lengwalo la Bagalatia 5:23 le kgothaletša go ba le “botho” le “boitshwaro.” Lengwalo la Baefeso 4:31 le sola “polelo e gobošago.” Lengwalo la Baheberu 4:13 le re “dilo ka moka di hlobotše” go Modimo. Ka gona, Modimo o bona boitshwaro bja ka gaešita le ge baagišani ba ka ba sa bo bone. E bile ke ithutile gore ke be ke swanetše go hwetša bagwera ba bafsa, ka ge “ditlwaelano tše mpe di senya mekgwa e holago.” (1 Bakorinthe 15:33) Ge e le gabotse, bagwera ba ka ba nakong e fetilego ba be ba nkgothaletša go ba yo šoro. Ba be ba nagana gore go betha mosadi go lokile bakeng sa “go mo dira gore a laolege.”

Le ikwa bjang ka lenyalo la lena gona bjale?

Valerie: E šetše e le nywaga e 25 mola Troy e bago yo mongwe wa Dihlatse tša Jehofa. Ga e sa le go tloga ka nako yeo, o mpontšhitše lerato, botho le go nnaganela e le ka kgonthe.

Troy: Nka se kgone go fetoša bohloko bjoo ke bo baketšego ba lapa la ka, e bile mosadi wa ka o be a tloga a sa swanelwe ke tshwaro yeo ke bego ke mo swere ka yona le gatee. Eupša ke fagahletše go bona Jesaya 65:17 e phethagala, ge bohloko bjo bja bophelong bja rena bja nakong e fetilego bo ka se sa gopolwa.

Ke keletšo efe yeo yo mongwe le yo mongwe wa lena a ka e neago malapa ao a tlaišwago ke bošoro bja ka gae?

Troy: Ge e ba o swere ba lapa la gago ka bošoro goba o ba goboša ka mantšu, amogela gore o nyaka thušo, gomme o ka e hwetša. Go na le thušo e ntši yeo e ka hwetšwago. Ge e le nna, go ithuta Beibele le Dihlatse tša Jehofa le go kopanela le tšona go nthušitše go fenya mekgwa ya ka e tseneletšego ya bošoro.

Valerie: O se ke wa akgofela go bapiša boemo bja gago le bja motho le ge e le ofe goba go latela keletšo ya batho bao ba naganago gore ba tseba seo se tlogago se go loketše. Gaešita le ge e ka se be batho ka moka bao ba bago le ditlamorago tše swanago, ke thabela gore ga se ka tlogela monna wa ka, ka gobane ga bjale re šegofaditšwe ka go ba le tswalano e botse.

GO FEDIŠA BOŠORO BJA KA GAE

Go ithuta Beibele go thušitše banna ba bantši go dira diphetogo tše di nyakegago

Beibele e re: “Lengwalo ka moka le buduletšwe ke Modimo gomme le hola ka go ruta, go kgala, go phošolla.” (2 Timotheo 3:16) Ka go swana le Troy, yoo taba ya gagwe e anegilwego ka mo godimo, balekane bantši ba nago le bošoro ba dirišitše keletšo ya Beibele gomme ba kgonne go fetoša tsela ya bona ya go nagana gotee le boitshwaro bja bona.

Na o ka rata go ithuta ka mo go oketšegilego mabapi le kamoo lenyalo la gago le ka holwago ke Beibele? Bakeng sa tsebišo e oketšegilego, ikgokaganye le Dihlatse tša Jehofa tša lefelong la geno goba o tsene go www.jw.org.

^ ser. 3 Maina a mangwe sehlogong se a fetotšwe.

^ ser. 8 Ke therešo gore palo e kgolo ya banna e bethwa ke basadi. Lega go le bjalo, ditiragalong tše dintši kudu tša bošoro bja ka gae tšeo di begwago, banna ke bona ba bakago bošoro bjoo.