Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! MARCH 2013

 NA GO HLAMILWE?

Go se Bone Gabotse ga Segokgo sa go Taboga

Go se Bone Gabotse ga Segokgo sa go Taboga

SEGOKGO sa go taboga se na le mokgwa o kgethegilego wa go bona woo o se kgontšhago go balela monabo o lekanego woo se swanetšego go o taboga. Segokgo se dira bjang seo?

Ela hloko: E le gore se ele monabo woo se swanetšego go o taboga gore se fihle selong se itšego, segokgo sa go taboga se diriša karolo ya moswananoši ya mahlo a sona a magolo, ao le lengwe le le lengwe la ona le nago le retina yeo e nago le mealo e mentši. Ge moalo o mongwe o amogela seetša se setala se bonagala gabotse, moalo o mongwe wona o se amogela e le seswantšho seo se sa bonagalego gabotse. Ge seswantšho seo se tloga se sa bonagale gabotse moalong woo, e ba e le ge selo seo se batametše kudu leihlong la segokgo. Ntlha ye yeo e sa fetogego e dira gore segokgo se kgone go balela monabo o lekanego wo se swanetšego go o taboga gore se sware selo seo se nyakago go se bolaya.

Banyakišiši ba rata go ekiša mokgwa wa segokgo sa go taboga bakeng sa go hlama dikhamera tšeo di bontšhago gabotse kudu gotee le diroboto tšeo di ka kgonago go ela monabo wa bokgole bja selo se itšego. Go ya ka Wepesaete ya ditaba tša Inthaneteng ya ScienceNOW, go bona ga segokgo sa go taboga go nea “mohlala o kgahlišago wa kamoo diphoofotšwana tša botelele bja seripa sa senthimithara tše di nago le bjoko bjo bo fetwago ke bja ntšhi le tšona di kgonago go kgoboketša tsebišo e raraganego ya go bona le go dira ka go dumelelana le yona.”

O nagana’ng? Na go diriša ga segokgo sa go taboga go se bone gabotse ga sona go bile gona ka tlhagelelo? Goba na go hlamilwe?